މާޖިދާ އަށް އަނިޔާވެ ބަދަލު ކުރަން ޖެހުނު ހިސާބުން ގޭމު އެނބުރުނު: އަދީލް

ސެންޓްރަލް އޭޝިއަން ވޮލީބޯޅަ އެސޯސިއޭޝަން (ކާވާ) ޗެލެންޖް ކަޕްގެ ފުރަތަމަ މެޗުގައި ކަޒަކިސްތާނާ ދެކޮޅަށް ކުޅުނު މެޗުގެ ދެ ވަނަ ސެޓުގައި ރާއްޖޭގެ އައިޝަތު މާޖިދާ އަށް އަނިޔާވެ ބަދަލު ކުރަން ޖެހުނު ހިސާބުން ގޭމު އެނބުރު ކަމަށް ޤައުމީ އަންހެން ވޮލީ ޓީމުގެ އެސިސްޓެންޓް ކޯޗު އަޙުމަދު އަދީލް (ބޭބެ ކޯޗު) ބުނެފި އެވެ.

ކަޒަކިސްތާނު މެޗަށްފަހު ވާހަކަ ދައްކަމުން އަދީލް ބުނީ، ފުރަތަމަ ދެ ސެޓުގައި ރާއްޖެ އިން ވަރަށް ރަނގަޅަށް ކުޅުނު ކަމަށެވެ. ނަމަވެސް ވަކި ހިސާބަކުން މާޖިދާ އަށް އަނިޔާވެ ބަދަލު ކުރަން ޖެހުމުން ގޭމު ކޮންމެވެސް ވަރަކަށް އެނބުރުނު ކަމަށް އަދީލް ބުންޏެވެ. އޭނާ ބުނީ ބަދަލުގައި އެރުވި ޒުވާން ކުޅުންތެރިންނަށް މި ފެންވަރުގައ ކުޅުމަށް އިތުރު މެޗުތަކެއް ބޭނުންވާނެ ކަމަށެވެ. ބޮޑު މުބާރާތެއްގެ ޒުވާން ކުޅުންތެރިންތަކެއް އަލަށް، ކުއްލިއަކަށް މެޗަށް އަރުވަން ޖެހުމުން އެކަމުގެ އުނދަގޫ ތަކެއް ވެސް ކުރިމަތިވި ކަމަށް އަދީލް ދެކެ އެވެ. ނަމަވެސް ކުރިއަށް އޮތް ތަނުގައި ކުޅުން ރަނގަޅު ވާނެ ކަމަށް އުންމީދު ކުރާ ކަމަށް ވެސް އޭނާ ބުންޏެވެ.

މީގެ އިތުރުން އޭނާ ބުނީ މުބާރާތުގެ ފޭވަރިޓުންގެ ގޮތުގައި ރާއްޖެ އިން ޤަބޫލު ކުރާ ދެ ޓީމަކީ ކަޒަކިސްތާނު އަދި އިންޑިއާ ކަމަށެވެ. އަނެއްކޮޅު ރާއްޖެ ހިމެނޭ ގްރޫޕްގައި އޮތް އުޒްބަކިސްތާނަކީ ވެސް ފޭވަރިޓުންގެ ގޮތުގައި ދެކޭ ޓީމެއް ކަމަށް އޭނާ ބުންޏެވެ. އެހެންކަމުން ކުރިއަށް އޮތް އުޒްބަކިސްތާނު މެޗުގައި ރާއްޖެ އިން ވަރަށް ބުރަކޮށް މަސައްކަތް ކުރަން ޖެހޭނެ ކަަމަށާއި، ރަނގަޅޫ ނަތީޖާއެއް ނެރެވޭނެ ކަމަށް އުންމީދު ކުރާ ކަމަށް އަދީލް ބުންޏެވެ.

ހަމައެއާއެކު އަދީލް ބުނީ ގާތް ގާތުގައި މެޗުތަކެއް ކުޅެން ޖެހުމުން ކޮންމެވެސް ވަރެއްގެ އުނދަގޫތަކެއް ކުރިމަތިވާ ކަމަށެވެ. ޚާއްސަކޮށް ކުޅުންތެރިންގެ ރިކަވަރީ އަށް ވަގުތު ބޭނުންވާނެ ކަމަށެވެ. އަދީލް ބުނީ ކުރިއަށް އޮތް މެޗަށް ކުޅުންތެރިން މެންޓަލީ ފިޓުކޮށްގެން ނެރެ، މެޗުން ރަނގަޅު ނަތީޖާއެއް ހޯދުމަށް ވަރަށް ބޮޑަށް މަސައްކަތް ކުރާނެ ކަމަށެވެ.

މުބާރާތުގައި ރާއްޖެގެ ދެ ވަނަ މެޗުގައި އަންގާރަ ދުވަހު ރާއްޖެ ގަޑިން 17:45 ގައި ނިކުންނާނީ އުޒްބަކިސްތާނާ ދެކޮޅަށެވެ.