ޒުވާން ކުޅުންތެރިން ކުޅެން ނުކުތުމަކީ ޓީމަށް ލިބޭ ހިތްވަރެއް: ފައިސަލް

ޒުވާން ކުޅުންތެރިންނަށް ކުޅުމުގެ ފުރުސަތު ލިބުމަކީ ޤައުމީ ޓީމަށް ލިބޭނެ އިތުރު ހިތްވަރަކަށް ވާނެ ކަމަށް ޤައުމީ އަންހެން ޓީމުގެ އެސިސްޓެންޓް ކޯޗު މުޙައްމަދު ފައިސަލް ބުނެފި އެވެ.

ފައިސަލް މިހެން ބުނީ ނޭޕާލުގެ ކަތަމަންޑޫގައި ކުރިއަށްދާ ސެންޓްރަލް އޭޝިއަން ވޮލީބޯޅަ އެސޯސިއޭޝަން (ކާވާ) ޗެލެންޖް ކަޕްގައި އުޒްބަކިސްތާނު އަތުން ރާއްޖެ ބަލިވި މެޗަށްފަހު ވާހަކަ ދައްކަމުންނެވެ. ފައިސަލް ބުނީ، ޒުވާން ކުޅުންތެރިން ކުޅެން ނުކުތުމަކީ ޓީމަށް ލިބޭނެ އިތުރު ކުރިއެރުމެއް އަދި ހިތްވަރަކަށް ވާނެ ކަމަށެވެ. އެގޮތުން އުޒްބަކިސްތާނު މެޗުގައި ކުޅުނު ދެ ވަނަ ލިބަރޯ މައިހާ އަލީގެ ކުޅުން ފައިސަލް ވަނީ ފާހަގަކޮށްފަ އެވެ. އޭގެ ކުރިން ފުރަތަމަ މެޗުގައި ކަޒަކިސްތާނާ ދެކޮޅަށް ކުޅުނުއިރު، ޒުވާން ކުޅުންތެރިޔާ މާޔާ ޙުސެއިން ޞަލާހު ވެސް ރަނގަޅު ކުޅުމެއް ދެއްކި ކަމަށް ފައިސަލް ބުންޏެވެ. އެހެންކަމުން ޒުވާން ކުޅުންތެެރިންނަށް ލިބެމުން މި އަންނަ ފުރުސަތަކީ އެ ކުޅުންތެރިން ކުރިއަށް ދިޔުމަށް ވެސް ލިބޭނެ ވަރަށް ބޮޑު ފުރުސަތަކަށް ވާނެ ކަމަށް ފައިސަލް ދެކެ އެވެ.

އުޒްބަކިސްތާނު މެޗާ ގުޅޭ ގޮތުން ވާހަކަ ދައްކަމުން ފައިސަލް ބުނީ، ރާއްޖެ އަށް އެންމެ ބޮޑަށް ދިމާވީ އަނިޔާގެ މައްސަލަ ކަމަށެވެ. ޚާއްސަކޮށް އެންމެ މުހިންމު އެއް ކުޅުންތެރިޔާ އައިޝަތު މާޖިދާ އަށް އަނިޔާވެ ކުޅުމާ ދުރުގައި ހުންނަން ޖެހުނުކަން އޭނާ ފާހަގަކުރި އެވެ. އެއާއެކު މާޖިދާގެ ބަދަލުގައި ހިމެނި ކުޅުންތެރިންނާއެކު މެޗު ފަށައިގެން ރާއްޖެ އިން ރަނގަޅަށް ކުޅެމުން ދިޔަ ކަމަށާއި، ވަކި ހިސާބަކުން ކޮންޓްރޯލް ގެއްލެނީ އެންމެ ފުރިހަމަ އަށް ނިންމާ ނުލެވިގެން ކަމަށް ފައިސަލް ބުންޏެވެ. ޚާއްސަކޮށް ލީޑުގައި އޮވެ ފުރަތަމަ ސެޓު ގެއްލުނީ ޓީމުގެ އެޓޭކު ދަށްވެގެން ކަމަށް ވެސް އޭނާ ބުންޏެވެ.

ކުރިއަށް އޮތް ސްރީ ލަންކާ މެޗާ ގުޅޭ ގޮތުން ފައިސަލް ބުނީ، އުންމީދަކީ އެ ޓީމު އަތުން މޮޅުވުން ކަމަށެވެ. އެހެންކަމުން ރާއްޖެ އިން ކުޅުނު ދެ މެޗުގައި ހެދުނު ގޯސްތައް ރަނގަޅުކޮށްގެން ކުރިއަށް އޮތް މެޗުން މޮޅުވަން މަސައްކަތް ކުރާނެ ކަމަށް ވެސް އޭނާ ބުންޏެވެ. ލަންކާ އަތުން މޮޅުވާން ބޭނުންނަމަ އެންމެ ފުރަތަމަ ކުރަން ޖެހޭނެ ކަމެއްގެ ގޮތުގައި ފައިސަލް ފާހަގަ ކުރީ އިތުބާރާއެކު އެޓޭކު ކުރުމެވެ. އެޓޭކު ކުރާ ވަގުތުގައި އިދިކޮޅުން ބްލޮކް ކުރާ ނަމަ، ޓަޗް އައުޓަށް ޖެހުމަށް ވިސްނަން ޖެހޭނެ ކަމަށް ވެސް ފައިސަލް ބުންޏެވެ. އޭނާ ބުނީ ދަނޑު ބޭރުގައި ތިބިގެން ކޯޗިން ސްޓާފުން އެކަން ބުނެދެމުން އަންނަ ކަމަށާއި، ބްލޮކް ކުރާ ވަގުތުގައި ކަންތައް ކުރާނެ ގޮތް ވެސް ބުނެދެމުން އަންނަ ކަމަށެވެ. ފައިސަލް ފާހަގަ ކުރި ގޮތުގައި ރާއްޖޭގެ ކެޕްޓަން ޙައްވާ ރާޝިދާ (ޙައްވަ) ގެ ފަރާތުން ފެނުނީ ވަރަށް އިތުބާރު ކުޅުމެކެވެ. ނަމަވެސް އެހެން ކުޅުންތެރިންގެ ފަރާތުން އެކަން ނުފެންނަނީ އެވަރުގެ ތަޖުރިބާއެއް ނެތުމުން ކަމަށް ވެސް އޭނާ ބުންޏެވެ.

ޤައުމީ ޓީމުގައި ހިމެނޭ ޒުވާން ކުޅުންތެރިންގެ ފަރާތުން މޮޅު ކުޅުމެއް ފެންނަމުން އަންނަ ކަމަށް ކޯޗު ވެސް ވަނީ ފާހަގަކޮށްފަ އެވެ. ފުރަތަމަ މެޗަށްފަހު ކޯޗު ބުނީ ޒުވާން ކުޅުންތެރިން މި ފެންވަރުގެ މުބާރާތަކަށް އައު ކަމަށާއި، މިކަހަލަ މުބާރާތްތައް ނުވަތަ މެޗުތައް ކުޅުމަށް ގިނައިން ލިބޭ ވަރަކަށް އެ ކުޅުންތެރިންގެ ކުޅުން ރަނގަޅުވެ، ހުނަރު ތަރައްޤީވާނެ ކަމަށެވެ.

މުބާރާތުގާއި ރާއްޖެ އަށް ދެން އޮތީ ލަންކާއާ ދެކޮޅަށް ކުޅޭ މެޗެވެ. ދެ ޓީމު ވެސް ވަނީ ކުޅުނު ދެ މެޗުން ވެސް ބަލިވެފަ އެވެ. އެހެންކަމުން ދެ ޓީމު ވެސް ބޭނުންވާނީ މޮޅަކުން މުބާރާތް ނިންމާލުމަށެވެ. ބުދަ ދުވަހު ރާއްޖެ އިން ލަންކާއާ ދެކޮޅަށް ނުކުންނާނީ ރާއްޖޭ ގަޑިން ހަވީރު 16:45 ގައެވެ.