ތިންވަނަ މެޗުގައި ލަންކާ އަތުންވެސް ރާއްޖެ ބަލިވެއްޖެ

ނޭޕާލުގައި މިހާރު ކުރިއަށްދާ ސެންޓްރަލް އޭޝިއަން ވޮލީބޯޅަ އެސޯސިއޭޝަން (ކާވާ) ޗެލެންޖް ކަޕްގެ ތިންވަނަ މެޗުގައި ސްރީލަންކާއާ ދެކޮޅަށް ކުޅުނު މެޗުން ސީދާ ތިން މެޗުން ދިވެހިރާއްޖެ ބަލިވެއްޖެއެވެ.

ގްރޫޕް ބީގެ ފަހު މެޗަށް ނިކުތްއިރު ދެ ޓީމުވެސް ވަނީ މުބާރާތުން ކަޓާފައެވެ. އެއީ ގްރޫޕް ސްޓޭޖުގައި ކުޅުނު ދެ މެޗުންވެސް ބަލިވެފައި އޮތުމުންނެވެ. އެހެންކަމުން މޮޅަކުން މުބާރާތް ނިންމާލަން ދެ ޓީމަށްވެސް މި މެޗު ވަރަށް ބޭނުންތެރިއެވެ.

ބުދަ ދުވަހުގެ ހަވީރު ކަތުމަންޑޫގެ ނެޝަނަލް ސްޕޯޓްސް ކޮމްޕްލެކްސް ވޮލީ ކޯޓުގައި ކުޅުނު މެޗު ފަށައިގެން ރަނގަޅަށް ކުޅެމުން ދިޔައީ ސްރީލަންކާއެވެ. ނަމަވެސް ވަކި ހިސާބަކުން ރާއްޖެއިން ވަނީ ކުޅުން ރަނގަޅުކޮށް، ޕޮއިންޓުގެ ފަރަގު ކުޑަކޮށްފައެވެ. އެހެންނަމަވެސް ލަންކާއިން ވަނީ އެ ޓީމުގެ ލީޑު ފުޅާކޮށްފައެވެ. ލަންކާއިން ފުރަތަމަ ސެޓު ކާމިޔާބުކުރީ 25-18ންނެވެ. ދެވަނަ ސެޓު ފަށައިގެންވެސް ކުރީގައި އޮތީ ލަންކާއެވެ. ނަމަވެސް ރާއްޖެއިން މަޑުމަޑުން ކުޅުމުގެ ތެރެއަށް ވަދެ، ޕޮއިންޓަކަށް ފަރަގު ކުޑަކުރިއެވެ. ނަމަވެސް މި ސެޓުގައި ރާއްޖެއަށް ވަނީ ގިނަ ގޯސްތަކެއް ހެދިފައެވެ. އެކަމުގެ ފައިދާ ނަގައި ލަންކާއިން ދިޔައީ އެ ޓީމުގެ ފަރަގު ބޮޑުކުރަމުންނެވެ. ލަންކާއިން ދެވަނަ ސެޓު ކާމިޔާބުކުރީ 25-13ންނެވެ.

ފުރަތަމަ ދެ ސެޓާ އެއްގޮތަށް ތިންވަނަ ސެޓުގައިވެސް ލީޑުކުރަމުން ދިޔައީ ލަންކާއިންނެވެ. ނަމަވެސް ރާއްޖެއިން ވަނީ ކުޅުން ރަނގަޅުކޮށް، އެއްވަރުކޮށް، ލީޑުވެސް ނަގާފައެވެ. މި ސެޓުގައި ރާއްޖޭގެ ކެޕްޓަން ހައްވާ ރާޝިދާ (ހައްވަ)ގެ ބާރު ހަމަލާތައް ވަނީ ފެނިފައެވެ. މީގެ އިތުރުން މި ސެޓުގައި ރާއްޖޭގެ ކުޅުންތެރިން ވަނީ ޑިފެންސްގައިވެސް ރަނގަޅު މަސައްކަތެއް ކޮށްފައެވެ. މި ސެޓުގައި ރާއްޖެއިން ރަނގަޅު އެޓޭކުތަކެއް ކުރިނަަަމަވެސް، ލަންކާގެ ޑިފެންސްގައި ކުޅުންތެރިން ވަނީ ހުޝިޔާރުކަން ދައްކާފައެވެ. ވާދަވެރިކޮށް ދިޔަ ތިންވަނަ ސެޓުގައި ރާއްޖެއިން ވަނީ ދެ ޕޮއިންޓުގެ ލީޑެއް ނަގާފައެވެ. ނަމަވެސް ލަންކާއިން ވަނީ ފަހަތުން އަރައި އެއްވަރުކޮށް، ލީޑު ނަގާފައެވެ. އޭގެ ފަހުން ރާއްޖެއިން ކުޅުން ރަނގަޅުކޮށް، ސެޓުގެ ލީޑު އަލުން ހޯދިއެވެ. އެ ރޫހުގައި ރާއްޖެއިން ގޭމް ޕޮއިންޓު ހޯދައި ސެޓު ނިންމުމާ ގާތަށް ޖެހިލިއެވެ. ނަމަވެސް ލަންކާއިން ވަނީ ފަހު ވަގުތު އެއްވަރުކޮށް، ސެޓު ކާމިޔާބުކޮށްފައެވެ. ތިންވަނަ ސެޓު ލަންކާއިން ކާމިޔާބުކުރީ 26-24ންނެވެ.

ރާއްޖެއަށް މުބާރާތުގައި ބާކީ ދެން އޮތީ ރޭންކިންގ މެޗުތަކެވެ. ރޭންކިންގގެ ފުރަތަމަ މެޗުގައި ބުރާސްފަތި ދުވަހު ނިކުންނާނީ ކިރިގިސްތާނާ ދެކޮޅަށެވެ.