ނޭޕާލުގައި މިހާރު ކުރިއަށްދާ ސެންޓްރަލް އޭޝިއަން ވޮލީބޯޅަ އެސޯސިއޭޝަން (ކާވާ) ޗެލެންޖް ކަޕްގައި ސީދާ ތިން ސެޓުން ދިވެހި ރާއްޖެ ބަލިކޮށް އުޒްބަކިސްތާން މުބާރާތުގެ ސެމީ ފައިނަލުގެ ޖާގައެއް ކަށަވަރުކޮށްފިއެވެ.

އަންގާރަ ދުވަހުގެ ހަވީރު ކަތުމަންޑޫގެ ނެޝަނަލް ސްޕޯޓްސް ކޮމްޕްލެކްސް ވޮލީ ކޯޓުގައި ކުޅުނު މެޗަށް ދެ ޓީމު ނިކުތްއިރު، އުޒްބަކިސްތާނު ވަނީ ކުޅުނު ފުރަތަމަ މެޗުގައި ސްރީލަންކާއާ ވާދަކޮށް މޮޅުވެފައެވެ. ރާއްޖޭގެ ފުރަތަމަ މެޗުގައި ވަނީ ކަޒަކިސްތާނު އަތުން ބަލިވެފައެވެ. އެހެންކަމުން މުބާރާތުގައި ދެމިއޮތުމަށް ރާއްޖެއަށް ކޮންމެހެންވެސް މި މެޗުން މޮޅުވުން އޮތީ މަޖުބޫރުވެފައެވެ. އުޒްބަކިސްތާނާ ދެކޮޅަށް ކުޅެން ރާއްޖެއިން ފުރަތަމަ ނެރުނު ހަ ކުޅުންތެރިންނަކީ ކެޕްޓަން ހައްވާ ރާޝިދާ (ހައްވަ)، ނަރީމާ އިދުރީސް (ނަންނި)، ފާތިމަތު ޖޫޒާން ޒަރީރު، އާމިނަތު ޝަހާ ޝާމިން، އާމިނަތު ރިޔާޝާ އަދި މަރިޔަމް އަޒުމާއެވެ. ފުރަތަމަ މެޗުގައި ލިބުނު އަނިޔާގެ ސަބަބުން މި މެޗުގައި އާއިޝަތު މާޖިދާއަށް ކުޅެވޭގޮތެއް ނުވިއެވެ.

މެޗުގެ ފުރަތަމަ ސެޓު ފަށައިގެން ލީޑުގައި އޮވެ ކުޅެމުން ދިޔައީ އުޒްބަކިސްތާނެވެ. ނަމަވެސް ރާއްޖެއިން ވަނީ މަޑުމަޑުން ކުޅުން ރަނގަޅުކޮށް، ސެޓުގެ މެދުތެރެއިން ނަތީޖާ ހަމަހަމަކޮށްފައެވެ. ރާއްޖޭގެ ހައްވައާއި ޝަހާ ޝާމިންގެ ހަމަލާތަކުން ރާއްޖެއިން ވަނީ ސެޓުގައި ކުރިވެސް ހޯދައިފައެވެ. ނަމަވެސް ރާއްޖެއަށް ލިބުނު ލީޑު ހިފެހެއްޓޭގޮތެއް ނުވިއެވެ. ދެވަނަ ފަހަރަށް އުޒްބަކިސްތާނުން ސެޓުގައި ކުރިހޯދައި، ލީޑު ދެމެހެއްޓިއެވެ. އެ ލީޑުގައި އޮވެ އުޒްބަކިސްތާނުން ސެޓު ކާމިޔާބުކުރީ 25-18ންނެވެ. ފުރަތަމަ ސެޓުގެ ވަކި ހިސާބަކުން އަޒުމާގެ ބަދަލުގައި ޒުވާން ކުޅުންތެރިޔާ ފާތިމަތު ޝަމްހާއަށް ވަނީ ފުރުސަތު ދީފައެވެ.

ދެވަނަ ސެޓު ފަށައިގެން ލީޑުގައި އޮވެ ކުޅެމުން ދިޔައީ އުޒްބަކިސްތާނުންނެވެ. ނަމަވެސް ރާއްޖެއިން ވަނީ ކުޅުން ރަނގަޅުކޮށް، ޕޮއިންޓަކަށް ފަރަގު ކުޑަކޮށްފައެވެ. ނަމަވެސް އުޒްބަކިސްތާނުން ވަނީ ވަކި ހިސާބަކުން އެ ޓީމުގެ ލީޑު ފުޅާކޮށްފައެވެ. މި ސެޓުގައި ރާއްޖެއިން ވަނީ ނަންނިގެ ބަދަލުގައި ހައްވާ ޝަޚާ، އަދި ޖޫޒާގެ ބަދަލުގައި ހައިފާ އިމާދު ކުޅެން އަރުވައިފައެވެ. ފުރަތަމަ ސެޓާ ޚިލާފަށް ދެވަނަ ސެޓު އުޒްބަކިސްތާނުން ކާމިޔާބުކުރީ 25-14ންނެވެ. ފުރަތަމަ ދެ ސެޓާ ޚިލާފަށް ތިންވަނަ ސެޓު ފަށައިގެން އުޒްބަކިސްތާނުން ވަނީ ބޮޑު ލީޑެއް ނަގައިފައެވެ. ސެޓުގެ މެދާ ހަަމައަށް ދިޔައިރު އުޒްބަކިސްތާނުން ވަނީ 12 ޕޮއިންޓުގެ ލީޑެއް ނަގައިފައެވެ. އެ ލީޑު ދަމަހައްޓައި، އުޒްބަކިސްތާނުން ތިންވަނަ ސެޓު ނިންމާލީ 25-4ންނެވެ. މި ނަތީޖާއާއެކު ރާއްޖެ ވަނީ މުބާރާތުން ކަަޓައިފައެވެ.

މި ގްރޫޕުގައި އަންގާރަ ދުވަހު ކަޒަކިސްތާނުން ވަނީ ސްރީލަންކާއާ ދެކޮޅަށް ކުޅުނު މެޗު ކާމިޔާބުކޮށް، ސެމީ ފައިނަލަށް ދަތުރުކޮށްފައެވެ. މި ގްރޫޕުގައި ބާކީ ދެން އޮތީ ދެ މެޗެވެ. އެއީ އުޒްބަކިސްތާނާއި ކަޒަކިސްތާނު ބައްދަލުކުރާ މެޗާއި، ސްރީލަންކާއާއި ރާއްޖެ ބައްދަލުކުރާ މެޗެވެ. ގްރޫޕްގެ އެއްވަނަ ޓީމު ކަނޑައެޅޭނީ އުޒްބަކިސްތާނާއި ކަޒަކިސްތާން ބައްދަލުކުރާ މެޗުންނެވެ.