ކޯޗުގެ ކަންބޮޑުވުމަކީ ޓީމެއްގެގޮތުގައި ނުކުޅެވުން

ގައުމީ އަންހެން ވޮލީ ޓީމަށް ދިމާވާ މައްސަލައަކީ ޓީމެއްގެގޮތުގައި ނުކުޅެވުންކަމަށް، ޓީމުގެ ކޯޗު ވިޗީޕޮން ފޯންޗާޓްޔިންޗީޕް ބުނެފިއެވެ.

އޭނާ މިހެން ބުނީ ނޭޕާލުގެ ކަތަމަންޑޫގައި މިހާރު ކުރިއަށްދާ ސެންޓްރަލް އޭޝިއަން ވޮލީބޯޅަ އެސޯސިއޭޝަން (ކާވާ) ޗެލެންޖް ކަޕްގައި މިހާތަނަށް ރާއްޖެއިން ކުޅުނު ހަތަރު މެޗުންވެސް ބަލިވެފައިވާތީއެވެ. މުބާރާތުގައި ރާއްޖެ ހިމެނުނު ގްރޫޕް ބީގައި ކަޒަކިސްތާން، އުޒްބަކިސްތާން އަދި ސްރީލަންކާއާ ދެކޮޅަށް ކުޅުނު މެޗުން ރާއްޖެ ވަނީ ބަލިވެފައެވެ. ގްރޫޕް ސްޓޭޖަށްފަހު ދެން ރާއްޖެއިން ކުޅުނީ ރޭންކިންގެ ފުރަތަމަ މެޗެވެ. އެ މެޗުގައި ކިރްގިސްތާނާ ވާދަކޮށްވެސް ރާއްޖެ ވަނީ ބަލިވެފައެވެ.

ކޯޗު ބުނީ، މެޗު ފަށައިގެން ރާއްޖެއިން ރަނގަޅަށް ކުޅެމުން އަންނަކަމަށާއި، ނަމަވެސް ވަކި ހިސާބުން ލިބިފައި އޮންނަ ލީޑު ގެއްލެނީ ކަމަށެވެ. ޚާއްސަކޮށް ސެޓުގެ އެންމެ ޕްރެޝަރު ވަގުތުގައި ރާއްޖެ އަތުން ލީޑު ގެއްލެމުން ދަނީ ކުޅުންތެރިންނަށް ހެދޭ ގޯސްތައް ގިނަވުމުން ކަމަށްވެސް ކޯޗު ވަނީ ބުނެފައެވެ. އެކަން ފާހަގަކޮށް ކޯޗު ބުނީ، ކުޅުންތެރިންގެ ފޯކަސް މުޅި މެޗަށް ބަހައްޓަންޖެހޭ ކަމަށާއި، އެންމެ މުހިންމީ ޓީމެއްގެ ގޮތުގައި މަސައްކަތްކުރުން ކަމަށެވެ. ޚާއްސަކޮށް މެޗުގައި އެ އަންނަ ޕްރެޝަރު ވަގުތުގައި އެކަން ކުރަންޖެހޭކަމަށް ކޯޗު ބުންޏެވެ. އެ ކަންބޮޑުވުން ފާޅުކޮށް ކޯޗު ބުނީ އެއީ ވަރަށް ބޮޑަށް ރަނގަޅުކުރަން ޖެހޭ ކަމެއް ކަމަށެވެ.

މުބާރާތުގައި ބާކީ ރާއްޖެއަށް އޮތީ ރޭންކިންގެ ފަހު މެޗެވެ. އެ މެޗުގައި ރާއްޖެއިން ހޮނިހިރު ދުވަހު ނިކުންނާނީ ބަންގްލަދޭޝްއާ ދެކޮޅަށެވެ. ބަންގްލަދޭޝްވެސް ވަނީ މިހާތަނަށް ކުޅުނު ހަތަރު މެޗުންވެސް ބަލިވެފައެވެ. މި މެޗުން މޮޅުވާ ޓީމަކަށް މުބާރާތުގެ ރޭންކިންގެ ހަތްވަނަ ލިބޭއިރު، ބަލިވާ ޓީމެއް ދާނީ ފުލަށެވެ.

މުބާރާތަށް ރާއްޖެއިން ކުރިމަތިލީއިރުވެސް ޓީމުގައި އަނިޔާގެ މައްސަލަތައް އުޅުނެވެ. އެގޮތުން ކެޕްޓަން ހައްވާ ރާޝިދާ (ހައްވަ) މުޅިން ފިޓު ނޫންއިރު، މުބާރާތުގެ ތެރެއިން އާއިޝަތު މާޖިދާއަށް ލިބުނު އަނިޔާގެ ސަބަބުން ހުންނަން ޖެހުނީ ކުޅުމާ ދުރުގައެވެ. އަނެއްކޮޅުން އެންމެ ފަހުން ކިރްގިސްތާނާ ދެކޮޅަށް ކުޅުނު މެޗުގައި ރާއްޖޭގެ ލިބަރޯ، ފައިހާ މުހައްމަދުވެސް ކުޅެފައެއްނުވެއެވެ.

މިއަހަރުގެ މުބާރާތުގައި ޖުމުލަ 8 ޓީމެއް ވަނީ ވާދަކޮށްފައެވެ. މުބާރާތުގެ ސެމީ ފައިނަލްގެ މެޗުތައް ވަނީ ހުކުރު ދުވަހު ކުޅެފައެވެ. މިއަހަރުގެ މުބާރާތުގެ ފައިނަލްގައި ވާދަކުރާނީ އިންޑިއާއާއި އުޒްބަކިސްތާނެވެ. އިންޑިއާއިން ފައިނަލަށް ދަތުރުކުރީ ސެމީގައި ކަޒަކިސްތާނުގެ މައްޗަށް ކުރިހޯދައިގެންނެވެ. އުޒްބެކިސްތާނުން ފައިނަލަށް ދަތުރުކުރީ، މުބާރާތް ބާއްވާ ގައުމު ކަމަށްވާ ނޭޕާލުގެ މައްޗަށް ކުރިހޯދައިގެންނެވެ. ފައިނަލް މެޗު އޮންނާނީ އާދީއްތަ ދުވަހުއެވެ.