ނޭޕާލުގައި އާދިއްތަ ދުވަހު ފެށި ސެންޓްރަލް އޭޝިއަން ވޮލީބޯޅަ އެސޯސިއޭޝަން (ކާވާ) އަންހެން ވޮލީ މުބާރާތުގައި ކުޅުނު ފުރަތަމަ މެޗުގައި ކަޒަކިސްތާނާ ވާދަކޮށް ސީދާ ތިން ސެޓުން ދިވެހިރާއްޖެ ބަލިވެއްޖެއެވެ.

ނޭޕާލުގެ ވެރިރަށް ކަތަމަންޑޫގައި ހުންނަ ދަޝަރަތު ސްޓޭޑިއަމްގައި ކުޅުނު މެޗުގައި ރާއްޖެއިން ފުރަތަމަ ކުޅެން އެރި ހަ ކުޅުންތެރިންނަކީ ކެޕްޓަން ހައްވާ ރާޝިދާ (ހައްވަ)، ނަރީމާ އިދުރީސް (ނަންނި)، ފާތިމަތު ޖޫޒާން ޒަރީރު، އާމިނަތު ރިޔާޝާ، އާއިޝަތު މާޖިދާ އަދި އާމިނަތު ޝަހާ ޝާމިނެވެ. ފުރަތަމަ ސެޓު ފަށައިގެން ރާއްޖެއިން ވަނީ ލީޑު ނަގައިފައެވެ. ކަޒަކިސްތާނުގެ ކުޅުންތެރިންގެ ޝޮޓުތައް ބްލޮކްކޮށް، ރާއްޖެއިން ވަނީ ރަނގަޅަށް އެޓޭކުވެސް ކޮށްފައެވެ. ނަމަވެސް ކަޒަކިސްތާނުން ނަތީޖާ ހަމަހަމަކުރީ ރާއްޖެއަށް ހެދުނު ގޯސްތަކަކުންނެވެ. ސެޓުގެ މެދާ ހަމައިން އަލުން ކުޅުން ރަނގަޅުކޮށް ރާއްޖެއިން ލީޑު ނެގިނަމަވެސް، އަމިއްލަ ގޯސްތަކުން ރާއްޖެއަށް ވަނީ ލީޑު ގެއްލިފައެވެ. ސެޓުގެ މެދާ ހަމައިން ނެގި ލީޑާއެކު ކަޒަކިސްތާނުން ފުރަތަމަ ސެޓު ކާމިޔާބުކުރީ 25-16ންނެވެ.

ދެވަނަ ސެޓު ފަށައިގެން ލީޑުގައި ކުޅެމުން ދިޔައީ ކަޒަކިސްތާނުންނެވެ. ފުރަތަމަ ސެޓާ ޚިލާފަށް މި ސެޓުގެ މެދާ ހަމައަށް ދިޔައިރުވެސް ކަޒަކިސްތާނުން ވަނީ ލީޑު ހިފަހައްޓައިފައެވެ. ސެޓުގެ މެދު ތެރެއިން ރާއްޖޭގެ މާޖީގެ ފަޔަށް ލިބުނު އަނިޔާއެއްގެ ސަބަބުން ވަނީ ބަދަލުކޮށްފައެވެ. މާޖީގެ ބަދަލުގައި ކުޅެން ނިކުތީ ޒުވާން ކުޅުންތެރިޔާ މާޔާ ހުސައިން ސަލާހެވެ. އޭގެފަހުން ރާއްޖެއިން ވަނީ ޝަހާ ޝާމިންގެ ބަދަލުގައި ފާތިމަތު ޝަމްހާ ކުޅެން އަރުވައިފައެވެ. ރާއްޖޭގެ ފަރާތުން އެދެވޭ ފެންވަރުގެ ކުޅުމެއް ނުދެއްކުނު ދެވަނަ ސެޓު ކަޒަކިސްތާނުން ކާމިޔާބުކުރީ 25-14ންނެވެ. ތިންވަނަ ސެޓުގައިވެސް ލީޑުކުރަމުން ދިޔައީ ކަޒަކިސްތާނުންނެވެ. ސެޓު ފަށައިގެން ލީޑުކުރަމުން ގޮސް އެ ޓީމުން ތިންވަނަ ސެޓު ނިންމައިލީ 26-6ގެ ބޮޑު ތަފާތަކުންނެވެ.

ރާއްޖޭގެ ދެވަނަ މެޗުގައި އަންގާރަ ދުވަހު ނިކުންނާނީ އުޒްބަކިސްތާނާ ދެކޮޅަށެވެ. ގްރޫޕް ބީގައި އުޒްބަކިސްތާނު ކުޅުނު ފުރަތަމަ މެޗުގައި ވަނީ ސްރީ ލަންކާގެ މައްޗަށް ސީދާ ތިން ސެޓުން ކުރި ހޯދައިފައެވެ. ގްރޫޕްގެ ފަހު މެޗުގައި ބުދަ ދުވަހު ރާއްޖެ ނިކުންނާނީ ލަންކާއާ ދެކޮޅަށެވެ.