ރޮނަލްޑޯގެ އެހީގައި މޮޅުވެ, އައްނަސްރުން ސައޫދީ ޕްރޯ ލީގުގެއް އެއްވަނަ މަގާމް ދަމަހައްޓައިފިއެވެ.

ރޮނާލްޑޯ ކުޅެމުން އަންނަ އައްނަސްރުން ތައާވޫން އަތުން މޮޅުވީ 2-1ންނެވެ. މީގެކުރިން މިސީޒަންގެ ލީގުގައި ތައާވޫން އަތުން އެ ޓީމް ވަނީ ބަލިވެފައެވެ. އެއީ މިސީޒަންގެ ލީގުގައި އައްނަސްރު ބަލިވި ހަަމައެކަނި މެޗެވެ. ހުކުރު ދުވަހުގެރޭ އެ ޓީމުން މެޗު ކާމިޔާބުކުރީ 1-1ން މެޗު އެއްވަރުވެފައިވަނިކޮށް, އަބްދުﷲ މަދޫ 78 ވަނަ މިނިޓްގައި ޖެހި ލަނޑުންނެވެ. މެޗު ފަށައިގެން 17 ވަނަ މިނިޓްގައި އައްނަސްރަށް ލީޑް ނަގައިދިނީ އަބްދުއްރަހުމާން ގަރީބެވެ. މިލަނޑު ޖަހަން ރޮނަލްޑޯ ފުރުސަތު ތަނަވަސްކޮށްދިނީ އަމިއްލަ ހާފްގައި ހުރެ ދިން ބޯޅައަކުންނެވެ. ދެވަނަ ހާފް ފަށައިގެން ދެވަނަ މިނިޓްގައި އަލްވާރޯ މެޑްރާން ލަނޑެއް ޖަހައި ނަތީޖާ ހަމަހަމަކުރިއެވެ.

އައްނަސްރުން ތާވަލްގެ އެއްވަނާގައި އޮތީ 17 މެޗުން 40 ޕޮއިންޓާއެކުއެވެ. ދެވަނާގައި އޮތް އަލްއިއްތިހާދުވެސް އޮތީ 40 ޕޮއިންޓާއެކުއެވެ. ދެޓީމްގެ ފަރަގަކީ ދެ ގޯލެވެ.