ރޮނާލްޑޯގެ ހެޓްރިކާއެކު ރެއާލް ފައިނަލާ ގާތަށް

އެތުލެޓިކޯ މެޑްރިޑާ ދެކޮޅަށް ކުޅުނު މެޗުގައި ކްރިސްޓިއާނޯ ރޮނާލްޑޯ ހެދި ހެޓްރިކާއެކު ރެއާލް މެޑްރިޑުން ޗެމްޕިއަންސް ލީގުގެ ފައިނަލްގެ އުންމީދު އާކޮށްފިއެވެ.

ޗެމްޕިއަންސް ލީގުގައި ބާސެލޯނާގެ ތަރި ލިއޮނަލް މެސީ ހަދާފައިވާ ހެޓްރިކް ރިކޯޑާއި ރެއާލްގެ މެޑްރިޑްގެ އިތުބާރު ފޯވާޑް ކްރިސްޓިއާނޯ ރޮނާލްޑޯ އަރާ ހަމަކޮށްފިއެވެ.

ރޮނާލްޑޯ މި ރިކޯޑާއި އަރާ ހަމަކުރީ ޗެމްޕިއަންސް ލީގުގެ ސެމީފައިނަލްގެ ފުރަތަމަ ލެގުގައި އަންގާރަ ދުވަހުގެރޭ އެތްލެޓިކޯ މެޑްރިޑާއި ބައްދަލުކުރި މެޗުގައި ކާމިޔާބުކުރި ތިން ގޯލާއެކީގައެވެ. އެ ތިން ގޯލާއެކީ ރޮނާލްޑޯ ޗެމްޕިއަންސް ލީގުގައި ހެދި ހެޓްރިކްގެ އަދަދު ހަތަކަށް އަރާފައިވާއިރު މެސީއަށް ވެސް މި މުބާރާތުގައި ހެޓްރިކް ހެދިފައިވަނީ މިއަދަދަށެވެ.

މި މެޗުގައި ރޮނާލްޑޯ ވަނީ ސަޕޯޓަރުން އެދޭ ފަދަ އާދަޔާ ހިލާފު މޮޅު ކުޅުމެއް ދައްކާފައެވެ. އެގޮތުން މެޗު ފެށިގެން މާ ގިނައިރު ތަކެއް ނުވަނީސް 10 ވަނަ މިނެޓުގައި އޭނާވަނީ ބޮލުން ޖަހައި ރެއާލް އަށް މެޗުގެ ލީޑު ނަގާދީފައެވެ.

އަދި ރެއާލްގެ ދެ ވަނަ ލަނޑު މެޗުގެ މެޗުގެ 73 ވަނަ މިނެޓުގައި ރޮނާލްޑޯ ކާމިޔާބު ކޮށްދިން އިރު، ތިން ވަނަ ލަނޑު ރޮނާލްޑޯ ޖެހީ މެޗުގެ 86 ވަނަ މިނެޓުގައެވެ މި މެޗަށް ފަހު ރެއާލްގެ ކޯޗު ޒައިނުއްދީން ޒިދާން ބުނީ، މެޗުގައި ހުރިހާ ކުޅުންތެރިންގެ ފަރާތުން ވެސް ފެނިގެން ދިޔައީ ތަފާތު މޮޅު ކުޅުމެއް ކަމަށެވެ.

އުމުރުން 32 އަހަރުގެ ރޮނާލްޑޯ އަކީ ޗެމްޕިއަންސް ލީގުގައި އެންމެ ގިނަ ގޯލު ކާމިޔާބުކުރި ކުޅުންތެރިއާ ވެސް މެއެވެ. އޭނާ ވަނީ މިހާތަނަށް 103 ގޯލު މި މުބާރާތުގައި ކާމިޔާބުކޮށްފައެވެ.

ރެއާލް އާއި އެތްލެޓިކޯ ބައްދަލުކުރާ ދެވަނަ ލެގުގެ މެޗު އޮންނާނީ މި މަހުގެ 10 ވަނަ ދުވަހުގެ ރެއެވެ.