ވޮޝިންގޓަނަށް އީރާނުގެ ފަހުގެ އިންޒާރު، އެމެރިކާގެ މަނަވަރުތައް ތައްޔާރީ ހާލަތުގައި
9 ނޮވެމްބަރު 2026 | ހޯމަ 07:06އީރާނުގެ ހުށަހެޅުންތަކަށް އެމެރިކާއިން އިޖާބަނުދީފިނަމަ ވަރުގަދަ ހަމަލާތަކެއް ދޭނެ ކަމުގެ އިންޒާރު އެ ޤައުމުގެ ޚާރިޖީ ވަޒީރު ދެއްވައިފި. މީގެ ރައްދުގައި ރައީސް ޓްރަމްޕް ވިދާޅުވީ އީރާނުން އެއްބަސްވުމެއްގައި ސޮއިނުކޮށްފިނަމަ އެ ޤައުމުގެ މުހިންމު އަމާޒުތަކަށް ހަމަލާދޭން ތައްޔާރަށް އޮތް ކަމަށް. ދެ ޤައުމުގެ މެދުގައި ބަހުގެ ހަމަލާތައް ވަރުގަދަވެފައި މި ވަނީ ހުރްމުޒް ކަނޑުއޮޅީގައި ނުތަނަވަސްކަން ބޮޑުވެފައިވާ ދަނޑިވަޅެއްގައި
އީރާނުގެ ޚާރިޖީ ވަޒީރު ޢައްބާސް ޢަރާޤްޗީ ބައްދަލުވުމެއްގައި ބައިވެރިވެވަޑައިގަންނަވަނީ | އޭޕީ
އެމެރިކާއިން އަލުން ހަމަލާތައް ދޭން ފަށައިފިނަމަ، ތެހެރާނުން "ނަރަކައިގެ އަލިފާން އޮއްސައިލާނެ" ކަމަށް ވިދާޅުވެ، ދެ ޤައުމުގެ ދެމެދުގައި ހިނގަމުންދާ އަށް މަސް ދުވަހުގެ ހަނގުރާމަ ނިމުމަކަށް ގެނައުމަށް ޓަކައި ވޮޝިންގޓަނަށް އީރާނުގެ ޚާރިޖީ ވަޒީރު ޢައްބާސް ޢަރާޤްޗީ ފަހުގެ އިންޒާރު ދެއްވައިފި އެވެ.
"ހުރިހާ މައިދާނެއްގައި ކުރެވެމުންދާ ހަނގުރާމަ ނިމުމަކަށް ގެނައުން ހިމެނޭހެން، އަޅުގަނޑުމެން ހުށަހަޅާފައިވާ ޝަރުތުތަކަށް އިޖާބަދީފިނަމަ އޭގެ ނަތީޖާ ފެންނާނެ ކަމަށް ބުނެ އަޅުގަނޑުމެން ހުށަހެޅި ދެ ދުވަހުގެ މުހުލަތު އަދިވެސް އެބައޮތް،" އާދީއްތަ ދުވަހު ސޯޝަލް މީޑިއާގައި ކުރެއްވި ޕޯސްޓެއްގައި ޢަރާޤްޗީ ވިދާޅުވި އެވެ. "ނޫންނަމަ ހަނގުރާމަ އިޚުތިޔާރުކޮށް، ހުޝިޔާރުވެ ތިބި އަދި ހަނގުރާމައިގެ ތަޖުރިބާ ލިބިފައިވާ އަޅުގަނޑުމެންގެ ހަނގުރާމަވެރިން 'ނަރަކައިގެ އަލިފާން އޮއްސައިލާ' މަންޒަރު ބަލަން ތިބޭ،" ޢަރާޤްޗީ ވިދާޅުވި އެވެ.
މި އިންޒާރުތަކާ ގުޅިގެން، ތެހެރާނުގެ ނިއުކްލިއަރ ޕުރޮގުރާމާ ގުޅޭގޮތުންނާއި ހުރްމުޒް ކަނޑުއޮޅި އަލުން ހުޅުވާލުމާ ބެހޭގޮތުން ކުރިއަށްދާ މަޝްވަރާތަކުގައި ކުރިއެރުންތަކެއް ލިބޭނަމަ، އިރާނަށް އަލުން ހަމަލާ ދިނުމަކީ "ވަރަށް ނާދިރު" ކަމެއް ކަމަށް އާދީއްތަ ދުވަހު އެމެރިކާގެ ރައީސް ޑޮނަލްޑް ޓްރަމްޕް ވިދާޅުވި އެވެ.
އެމެރިކާގެ އަސްކަރީ ތައްޔާރީތަކާއި ޓްރަމްޕްގެ ބަސްމަގު
"އެ ކަން ބިނާވެގެން ވަނީ ވަރަށް ވަރުގަދަ އެއްބަސްވުމެއްގައި އެ މީހުން ސޮއިކުރާނެތޯ ނުވަތަ ނޫންތޯ،" އެމެރިކާއިން އީރާނަށް ހަމަލާ ދިނުން ކުރިއަށް ގެންދިއުމާ ގުޅޭގޮތުން ކުރެވުނު ސުވާލަކަށް ޖަވާބު ދެއްވަމުން، ޓްރަމްޕް ވިދާޅުވި އެވެ. ހަމަމިއާއެކު، "ބޭނުންވެއްޖެ ހާލަތެއްގައި އަޅުގަނޑު ހަމަލާތައް ކުރިއަށް ގެންދާނަން، ނަމަވެސް އަޅުގަނޑުމެން ވާނީ އެ މީހުންނަށް ވަރަށް ވަރުގަދަ ހަމަލާތަކެއް ދީފައި،" ޓްރަމްޕް ވިދާޅުވި އެވެ.
އެ ސަރަހައްދުގައި އެމެރިކާގެ އަސްކަރިއްޔާގެ ތިން މަތިންދާބޯޓު އުފުލާ މަނަވަރު "ހަމަލާ ދިނުމަށް ފުރިހަމައަށް ތައްޔާރުވެފައި" އެބައޮތް ކަމަށާއި، ބޭނުންވެއްޖެ ހާލަތެއްގައި އަލުން ހަމަލާތައް ކުރިއަށް ގެންދެވޭނެ ކަމަށް ޓްރަމްޕް އިންޒާރު ދެއްވި އެވެ. މީގެއިތުރުން، އިރާނުގެ 38 ބުރިޖެއް އެމެރިކާގެ އަމާޒުތަކުގެ ތެރޭގައި ހިމެނޭ ކަމަށާއި، އެމެރިކާގެ އަސްކަރިއްޔާއަށް "އެއް ގަޑިއިރުގެ ތެރޭގައި" އެ ހުރިހާ ބުރިޖެއް ބިމާ ހަމަކޮށްލެވިދާނެ ކަމަށް ވެސް ޓްރަމްޕް ވިދާޅުވި އެވެ.
ހުރްމުޒް ކަނޑުއޮޅީގެ ނުތަނަވަސްކަމާއި އިރާނުގެ ރައްދު
އެ ސަރަހައްދުގައި ހުރި އެމެރިކާގެ އަމާޒުތަކަށް އީރާނުން "ދޫނުދޭނެ" ކަމަށް ޢަރާޤްޗީއާ ހަވާލާދީ އިރާނުގެ ޚާރިޖިއްޔާއިން އާދީއްތަ ދުވަހުގެ ކުރީކޮޅު ނެރުނު ބަޔާނެއްގައި ބުންޏެވެ.
ޢަރާޤްޗީ މި މޭރުމުން ވާހަކަފުޅު ދައްކަވާފައި މި ވަނީ، ހުރްމުޒް ކަނޑުއޮޅީގެ އިރުމަތީ ސަރަހައްދުން ދަތުރުކުރި ތެޔޮ ޓޭންކަރެއް ކަނޑުއަޑީގެ މައިނެއްގައި ޖެހި، އާދީއްތަ ދުވަހުގެ ހެނދުނު އަލިފާނުގެ ހާދިސާއެއް ހިނގާފައިވާ ކަމަށް އިރާނުގެ ކަނޑުގެ ސިފައިންނާ ހަވާލާދީ ދައުލަތުގެ މީޑިއާއިން ރިޕޯޓުކޮށްފައި ވަނިކޮށެވެ. އެ ބޯޓުގެ އައިޑެންޓިފިކޭޝަން ސިސްޓަމްތައް ނިއްވާލާފައިވާ ކަމަށާއި، ބޯޓު ދަތުރުކުރަމުން ދިޔައީ ކަނޑުއޮޅީގެ މަނާ ސަރަހައްދުން ކަމަށް ކަނޑުގެ ސިފައިން ބުންޏެވެ.
އަސްކަރީ ގާބިލުކަން އިތުރުކުރުމާއި ސިޔާސީ މަސްރަހު
ޚާރިޖީ ވަޒީރުގެ ވާހަކަތަކަށް ބާރުދެއްވައި، ކުރިއަށް އޮތް އަހަރުތަކަށް ބޭނުންވާ މިންވަރަށް ހަތިޔާރު "ކަށަވަރުކޮށްފައިވާ" ކަމަށް އިރާނުގެ އިސްލާމިކް ރިވޮލޫޝަނަރީ ގާޑް ކޯގެ (އައިއާރްޖީސީ) އޭރޯސްޕޭސް ފޯސްގެ ކޮމާންޑަރުގެ މުޝީރަކު ވިދާޅުވި އެވެ.
"ސިފައިން ތިބީ ތައްޔާރަށް، އަދި ދުޝްމަނުން ގޯހެއް ހަދައިފިނަމަ، އިރާނުގެ ރައްދު ވާނީ ވަރަށް ގެއްލުންބޮޑު އަދި ހަރުކަށި ރައްދަކަށް،" ސޯޝަލް މީޑިއާގައި ނެރުއްވި ބަޔާނެއްގައި އައިއާރްޖީސީގެ ބްރިގޭޑިއަރ ޖެނެރަލް ޢަލީ ބަލާލީ ވިދާޅުވި އެވެ. "ސިފައިންގެ އިސް ކޮމާންޑަރުން ފާހަގަކުރައްވާފައިވާ ފަދައިން، ރޯދަމަހުގެ ހަނގުރާމައަށް ފަހު އަޅުގަނޑުމެން މި ވަނީ އަޅުގަނޑުމެންގެ އަސްކަރީ ގާބިލުކަން އިތުރަށް މަތިކޮށްފައި،" ބަލާލީ ވިދާޅުވި އެވެ.
މި ދެ ޤައުމުގެ އިސް ވެރިންގެ މެދުގައި ބަހުގެ ހަމަލާތައް ބަދަލުކުރެވެމުން މި ދަނީ، އެމެރިކާގައި ދާދިފަހުން ބޭއްވުނު މިޑްޓަރމް އިންތިޚާބުގައި ޓްރަމްޕްގެ ރިޕަބްލިކަން ޕާޓީ ބަލިކޮށް، ކޮންގްރެސްގެ ދެ މަޖިލީހުގެ އަޣުލަބިއްޔަތު އިދިކޮޅު ޑިމޮކްރެޓިކް ޕާޓީން ކާމިޔާބުކޮށްފައިވާ ދަނޑިވަޅެއްގަ އެވެ.
އެމެރިކާގެ އިންތިޚާބުގެ ސަބަބުން މަޝްވަރާތައް ލަސްވެފައިވާ ކަމަށް ވިދާޅުވި ނަމަވެސް، ކުރިއަށް ދާނެ މަގަކަށް އިންތިޒާރު ކުރައްވާ ކަމަށް ޢަރާޤްޗީ ވިދާޅުވި ކަމަށް އެ ޤައުމުގެ ދައުލަތުގެ މީޑިއާއިން ރިޕޯޓުކުރެ އެވެ. "ކަންކަން ހަމައަކަށް އެޅި، މެދުވެރިން އަލުން ޒިޔާރަތްތައް ފެށުމަށް އެކަށީގެންވާ މާހައުލެއް ގާއިމުވުމަށް ކޮންމެ ވެސް ވަރެއްގެ ވަގުތެއް ނަގާނެ،" ކަމަށާއި، "އަޅުގަނޑުމެން ޖެހޭނީ އިންތިޒާރުކުރަން،" ކަމަށް ޚާރިޖީ ވަޒީރު ވިދާޅުވި އެވެ.
މަސްދަރު: އަލް ޖަޒީރާ
