ރޮނާލްޑޯގެ އަދަބު ލުއިކޮށްދެވޭކަށް ނެތް: ސްޕެނިޝް ފުޓްބޯޅަ ފެޑެރޭޝަން

ޕޯޗުގަލްއާއި ރެއާލް މެޑްރިޑުގެ ތަރި ކްރިސްޓިއާނޯ ރޮނާލްޑޯ އަށް ދީފައިވާ އަދަބު ލުއިކޮށްދެވެން ނެތް ކަމަށް ސްޕެނިޝް ފުޓްބޯޅަ ފެޑެރޭޝަނުން ބުނެފިއެވެ.

އެކަން ހާމަކޮށް، ސްޕެނިޝް ފުޓްބޯޅަ ފެޑެރޭޝަނުން ނެރުނު ބަޔާނެއްގައި ބުނެފައި ވަނީ ރެއާލް މެޑްރިޑުން ރޮނާލްޑޯގެ އަދަބު ލުއިކޮށްދިނުމަށް އެދިފައިވާ ކަމަށާއި އެހެން ނަމަވެސް ރޮނާލްޑޯއަށް އެ ފެޑެރޭޝަނުން ދީފައިވާ އަދަބު ލުއިކޮށްދެވެން ނެތް ކަމަށެވެ.

ސްޕެނިޝް ފުޓްބޯޅަ ފެޑެރޭޝަނުން ނެރެފައިވާ މި ބަޔާނުގައި ބުނެފައި ވަނީ ރޮނާލްޑޯ އަށް ދީފައިވާ އަދަބަކީ އޭނާ ކުރި ކުށަށް ދީފައިވާ ހައްޤު އަދަބެއް ކަމަށެވެ. ރޮނާލްޑޯ އަށް އެ އަދަބު ދީފައި ވަނީ މައްސަލަ ރަނގަޅަށް ބެލުމަށް ފަހުގައި ކަމަށް ވެސް އެ އިދާރާގެ ބަޔާނުގައި ބުނެފައިވެއެވެ.

" ރޮނާލްޑޯގެ މައްސަލަ އާއި ގުޅިގެން ރެއާލް މެޑްރިޑުން އަދަބު ލުއި ކޮށްދިނުމަށް އެދިފައިވޭ. އެހެން ނަމަވެސް މައްސަލައިގެ ބާވަތަށް ބަލާފަ އަދަބު ދިނީ. އިތުރަށް ކޮށްދެވޭނެ ކަމެއްނެތް ." ބަޔާނުގައި ވެއެވެ.

ސްޕެނިޝް ފުޓްބޯޅަ ފެޑެރޭޝަނުގެ މި ނިންމުމާއި މެދު ރޮނާލްޑޯ ވަނީ ވަރަށް ބޮޑަށް ހިންހަމަ ނުޖެހުން ފާޅު ކޮށްފައެވެ. އެގޮތުން ރޮނާލްޑޯ ވަނީ ސްޕެނިޝް ފުޓްބޯޅަ ފެޑެރޭޝަނަށް ފާޑުކިޔާ އޭނާގެ ހިސްޓަގްރާމް ޕޭޖުގައި ޕޯސްޓެއް އާންމު ކޮށްފައެވެ.

ރޮނާލްޑޯ ހިސްޓަގްރާމް ޕޭޖު މެދުވެރިކޮށް ކުރި ޕޯސްޓުގައި ބުނެފައި ވަނީ ސްޕެއިންގެ ފުޓްބޯޅަ ފެޑެރޭޝަނުން އަމަލު ކުރަމުން ގެންދަނީ އެއްވެސް އިންސާފެއް ނެތިކަމަށާއި އެގޮތުން އޭނާއަށް ފަސް މެޗުގައި ނުކުޅެވޭ ގޮތަށް ދީފައިވާ އަދަބަކީ އެކަމުގެ ހެއްކެއް ކަމަށެވެ.

އަދި ހުރިހާ ކަމަކުން ވެސް އޭނާއާ މެދު ކަންތައް ކުރަމުން ގެންދަނީ ނާއިންސާފުން ކަމަށާއި އެގޮތަށް ކަންތައް ކުރަން ފުރުޞަތު ނުދޭނޭ ކަމަށެވެ. އަދި އަލުން އެނބުރި ކުރިޔަށް ވުރެ ވެސް ވަރުގަދަކޮށް އަންނާނެ ކަމަށް ވެސް ރޮނާލްޑޯ ވަނީ ބުނެފައެވެ.

" އަނެއްކާވެސް އިތުރު ނާއިންސާފު ނިންމުމެއް އެ ނިންމީ. އެއް ނިންމުމަށް ފަހު އަނެއް ނިންމުން. އަހަރެންނާއި މެދު އެއްވެސް ކަމެއް އިންސާފުން ނުނިންމާ. މީ ކަންބޮޑުވާ ކަމެއް. އެހެން ނަމަވެސް އެގޮތަށް އަބަދަކު ކަންތަކެއް ނުކުރެވޭނެ. އަހަރެން ދެންވެސް އެނބުރި އަންނާނީ ކުރިޔަށް ވުރެ ވަރުގަދަ ކޮށް. އެކަން ސާބިތު ކޮށްދޭނަން." ރޮނާލްޑޯ ބުނެފައިވެއެވެ.

ސްޕެއިންގެ ފުޓުބޯޅަ އިދާރާއިން ދިން މި އަދަބާ މެދު ރޮނާލްޑޯވަނީ މީގެ ކުރިންވެސް އޭނާގެ އިންސްޓަގްރާމް ޕޭޖުގައި ނުރުހުން ފާޅު ކޮށްފައެވެ. އެގޮތުން އޭނާ ވަނީ މި އަދަބަކީ ކުރެވުނު ކުށާއި ނުބައްދަލު އަދަބެއް ކަމަށް ބުނެ މި އަދަބުގެ ސަބަބުން އޭނާއަށް އެތަކެއް އަސަރުތަކެއް ކުރާނެ ކަމަށް ބުނެފައި ވެއެވެ. އަދި އޭނާ ވަނީ އޭނާގެ ޓީީމުގެ ކުޅުންތެރިންނާއި ސަޕޯޓަރުން ދެމުންދާ ހިތްވަރަށް ޝުކުރު އަދާކޮށްފައެވެ.

ރެއާލްގެ ކޯޗު ޒައިނުއްދީން ޒިދާން ވެސް ވަނީ މިކަމާ މެދު ހިތްހަމަނުޖެހުން ފާޅުކޮށްފައެވެ.

ސްޕެނިޝް ފުޓްބޮޅަ ފެޑެރޭޝަނުން ރޮނާލްޑޯއަށް މި އަދަބު ދީފައި ވަނީ ސްޕެނިޝް ސުޕަކަޕުގެ ފުރަތަމަ ލެގުގައި ބާސެލޯނާއާ ދެކޮޅަށް ކުޅެ 1-3 ގެ ނަތީޖާއިން މޮޅުވި މެޗުގައި ރެފްރީގެ ބުރަކަށީގައި އަތްއަޅާ ކޮސްފާލި ކަމަށް ބުނާ މައްސަލައާއި ގުޅިގެންނެވެ.

ރޮނާލްޑޯއަށް އެންމެ އަވަހަށް ވެސް މެޗެއް ކުޅެވޭނީ އަންނަމަހުގެ 20 ވަނަ ދުވަހު ރެއާލް ބެޓިސްއާ ދެކޮޅަށް ކުޅޭ މެޗުގައެވެ.

ރޮނާލްޑޯއަކީ މިހާތަނަށް އެންމެ ގިނަ ގޯލު ޖަހައިދިން ކުޅުންތެރިޔާއެވެ. އޭނާވަނީ ދުނިޔޭގެ އެންމެ މޮޅު ފުޓުބޯޅަ ކުޅުންތެރިޔާގެ މަގާމު ހަތަރު ފަހަރު ހޯދާފައެވެ.