ކ. މާލެ
|
16 އޯގަސްޓް 2017 | ބުދަ 00:48
ރޮނާލްޑޯ އަށް ރެފްރީ ރަތްކާޑު ދައްކަނީ
ރޮނާލްޑޯ އަށް ރެފްރީ ރަތްކާޑު ދައްކަނީ
ގޯލް.ކޮމް
ކުޅިވަރު
ރޮނާލްޑޯގެ ސަސްޕެންޝަން މައްސަލަ އެޕީލްކުރަނީ..!
 
ރޮނާލްޑޯ ވަނީ 5 މެޗަށް ސަސްޕެންޑް ކޮށްފަ

 

ސްޕެނިޝް ސުޕަކަޕްގެ ފުރަތަމަ ލެގުގައި ބާސެލޯނާއާ ދެކޮޅަށް ރެއާލް މެޑްރިޑު ކުޅުނު މެޗުގައި ރެފްރީގެ  ބުރަކަށީގައި އަތް އަޅާ ކޮށްޕާލުމުގެ ކުށުގައި ކްރިސްޓިއާނޯ ރޮނާލްޑޯއަށް ސްޕެނިޝް ފުޓްބޯޅަ ފެޑެރޭޝަނުން ދީފައިވާ އަދަބު އެޕީލް ކުރާނެ ކަމަށް ރެއާލް މެޑްރިޑުގެ ކޯޗު ޒައިނުއްދީން ޒިދާން ބުނެފިއެވެ.

ޒިދާން މިހެން ބުނެފައި ވަނީ ސްޕެނިޝް ސުޕަކަޕްގެ ދެވަނަ ލެގުގެ މެޗުގެ ކުރިން ބޭއްވި ނޫސްވެރިންގެ ބައްދަލުވުމެއްގައި ނޫސްވެރިޔަކު ކުރި ސުވާލަކަށް ޖަވާބު ދެމުންނެވެ.

ޒިދާން ބުނީ ބާސެލޯނާއާ ދެކޮޅަށް ރެއާލް މެޑްރިޑު ކުޅުނު މެޗުގައި ރޮނާލްޑޯގެ އަމަލުތައް ހުރިގޮތުން ކަމަށް ބުނެ އޭނާއަށް ފުޓްބޯޅަ ފެޑެރޭޝަނުން ދީފައިވާ  އަދަބާމެދު ސުވާލު އުފެދޭކަންތައް ތަކެއް އެބަ ހުރިކަމަށާއި އެހެން ކަމުން އެ މައްސަލަ މިއަދުގެ ވަގުތެއްގައި އެޕީލްކުރަން ނިންމާފައިވާ ކަމަށެވެ.

އިއްޔެ ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަމުން ޒިދާން ބުނީ ރޮނާލްޑޯގެ މައްސަލާގައި ކޮމިޓީގެ ބައްދަލުވުމެއް މިއަދު ބާއްވަން ނިންމާފައިވާ  ކަމަށާއި އެ ބައްދަލުވުމަށް ފަހު ކުރިޔަށް ގެންދަންވީ ގޮތެއް އެނގިގެން ދާނޭކަމަށެވެ.

ޒިދާން ބުނީ އޭނާ ހުރީ ރޮނާލްޑޯއަށް ސްޕެނިޝް ފުޓްބޯޅަ ފެޑެރޭޝަނުން ދީފައިވާ އަދަބާއި މެދު ވަރަށް ބޮޑަށް  ކަންބޮޑުވެފައި ކަމަށާއި ރެއާލްގެ ހުރިހާ ކުޅުންތެރިން ވެސް ތިބީ އެކަމާ ކަންބޮޑުވެފައި ކަމަށެވެ. އަދި ރެފްރީގެ މައްސަލައާ ބެހޭގޮތުން އޭނާ ބަހެއް ބުނަން ބޭނުން ނުވި ނަމަވެސް މެޗުގެ ވީޑިއޯ ރިޕްލޭ ބަލާލީމާ އެންމެންނަށް ވެސް ކަންތައް ހިނގާ ދިޔަގޮތް ވަރަށް ސާފުކޮށް ފެންނަން އެބަހުރިކަމަށެވެ.

ޒިދާން ބުނީ ރޮނާލްޑޯއަށް ދިން އަދަބު ބޮޑު ކަމަށާއި ފަސް މެޗުގެ ސަސްޕެންޝަނަކީ ރޮނާލްޑޯ ފަދަ ކުޅުންތެރިއަކަށް އެކަށީގެންވާ އަދަބެއް ކަމަށް ގަބޫލް ނުކުރާ ކަމަށެވެ.. ޒިދާން ވަނީ ރޮނާލްޑޯ މައްސަލާގައި ސުވާލުތަކެއް އުފައްދާ ސްޕެނިޝް ފުޓްބޯޅަ އިދާރާގެ ވެރިންނަށް ވެސް ނުސީދާ ގޮތެއްގައި ފާޑުކިޔުން އަމާޒު ކޮށްފައެވެ. ޒިދާން ބުނީ  ޒާތީ ގޮތުން ކުޅުންތެރިއަކާ ޖައްސާލައިގެން ނޫނީ  މިފަދަ ނުހައްގު އަދަބެއް ކުޅުންތެރިއަކަށް ދީފާނެ ކަމަށް ގަބޫލް ނުކުރާ ކަމަށް ބުނެފައެވެ.

" އަހަރެންނަކަށް މިކަން ގަބޫލެއް ނުކުރެވޭ. މިއީ ޒާތީގޮތުން ކުޅުންތެރިއަކާ ޖައްސާލައިގެން ނޫނީ މިފަދަ ނުހައްގު އަދަބެއް ދީފާނެކަމަށް ގަބޫލެއް ނުކުރަން." ޒިދާން ބުންޏެވެ.

ޒިދާން އިތުރަށް ބުނީ މިއަދުގެ ބައްދަލުވުމުގައި މި މައްސަލައާ ބެހޭގޮތުން ވަރަށް ފުޅާކޮށް މަސްވަރާ ކުރާނެ ކަމަށާއި މި  ކޮމިޓީ ބައްދަލުވުމުގައި މި ހުރިހާ ކަމެއް ވެސް ރަނގަޅަށް ބަލާ ރޮނާލްޑޯއަށް އިންސާފު ލިބޭނެ ކަމަށް އުންމީދު ކުރާ ކަމަށެވެ.

" ރޮނާލްޑޯއަށް ދީފައިވާ އަދަބަކީ ބޮޑުވަރެއް. އެއީ ސުވާލު އުފެދޭކަމެއް. ވީގޮތް  އެހެރީ ސާފުކޮށް ފެންނަން. އަހަރެންނަށް އެކަން ގަބޫލްކުރަން އުނދަގޫ. މިއަދު ރޮނާލްޑޯގެ މައްސަލާގައި ކޮމިޓީ ބައްދަލުވުމެއް ބާއްވާނެ. އުންމީދަކީ އިންސާފު ލިބުން." ރެއާލްގެ ކޯޗު ޒިދާން ބުންޏެވެ.

އެންމެ ފަހުން އަޕްޑޭޓް ކުރީ: 3 ހަފްތާ ކުރިން
ރިވިއު ކުރީ: ހުޝާމް މުހަޢްމަދް
0%
50%
0%
50%
0%
0%
ކޮމެންޓް