ރޮނާލްޑޯގެ ހިތްގައިމު ގޯލުން ރެއާލް މޮޅުވެއްޖެ

ކްރިސްޓިއާނޯ ރޮނާލްޑޯ ޖަހައިދިން ހިތްގައިމު ގޯލާ އެކު 1-2 ގެ ނަތީޖާއިން އިޓަލީގެ ފިއޮރެންޓީނާ ބަލިކޮށް ރެއާލް މެޑްރިޑުން ޓްރޮފެއޯ ސެންޓިއާގޯ ބެރްނެބުއޭ ކާމިޔާބުކޮށްފި އެވެ.

މިއީ ކޮންމެ އަހަރަކުވެ އޮކްޓޫބަރ މަހުގެ 23 ވަނަ ދުވަހު ރެއާލް މެޑްރިޑުގެ ކުރީގެ ރައީސް އަދި ކްލަބުގެ ސްޓޭޑިއަމުގެ ނަން ނިސްބަތްވާ ސެންޓިއާގޯ ބެރްނެބުއޭގެ ޝަރަފުގައި ރެއާލް މެޑްރިޑުން ކުޅޭ އެކުވެރިކަމުގެ މެޗެކެވެ.

ގިނަ އަދަދަކަށް ރިޒާވް ކުޅުންތެރިން ހިމނައިގެން ރޭ ކުޅުނު މި މެޗުގައި ރޮނާލްޑޯގެ ފަރާތުން މޮޅު ކުޅުމެއް ފެނިގެން ގޮސްފައިވާއިރު އޭނާ މިވަގުތު ހުރީ ސްޕެނިޝް ފުޓްބޯޅަ ފެޑެރޭޝަނުގެ ސަސްޕެންޝަނެއްގައެވެ. އެގޮތުން އަންނަ މަހުގެ 20 ގެ ކުރިން ސްޕެނިޝް ލީގުގެ މެޗެއް ރޮނާލްޑޯ އަކަށް ނުކުޅެވޭނެއެވެ.

ޔުއެފާ ސުޕަ ކަޕުގެ ފުރަތަމަ ލެގުން ބާސެލޯނާ އަތުން 3-1 އިން މެޑްރިޑް މޮޅުވި މެޗުގައި ރަތްކާޑު ދެއްކުމުން ހިތްހަމަނުޖެހިގެން ރެފްރީ ކޮއްޕާލާފައި ވާތީ ރޮނާލްޑޯ ހުރީ ފަސް މެޗުގެ ސަސްޕެންޝަނެއްގަ އެވެ.

މި މެޗުގެ ކުޅުން ފެށިގެން ވަރަށް ކުރީކޮޅު ފިއޮރެންޓީނާއިން ގޯލެއް ޖަހާ ލީޑު ނެގިއިރު، މެޗުގެ ހަތަރު ވަނަ މިނެޓުގައި މި ގޯލް އެޓީމަށް ކާމިޔާބު ކޮށްދިނީ ޖޯޑަން ވެރެޓޫއެވެ. އެހެން ނަމަވެސް ފިއޮރެންޓީނާއިން ގޯލް ޖަހާ މެޗުގެ ލީޑުނެގިތާ ދެމިނެޓު ފަހުން މެޗުގެ ހަތް ވަނަ މިނެޓުގައި ރޮނާލްޑޯގެ ރީތި ޕާހަކުން ބޯޔާ މަޔޮރަލް ވަނީ ގޯލެއް ޖަހާ މެޗުގެ ނަތީޖާ އެއްވަރުކޮށްފައެވެ.

މެޗުން ރެއާލް މޮޅުވި ގޯލް 33 ވަނަ މިނެޓުގައި ކާމިޔ\ަބުކޮށްދިނީ ރެއާލްގެ ފޯވާޑް ކްރިސްޓިއާނޯ ރޮނާލްޑޯ އެވެ. ރޮނާލްޑޯ މި ގޯލް ޖަހާފައިވަނީ ސްޕެނިޝް ސުޕަކަޕްގައި ބާސާކޮޅަށް ޖެހި ގޯލާ ދާދި އެއްކަހަލަ ގޮތަކަށެވެ. އެގޮތުން އަރިމަތިން ލިބުނު ބޯޅަ ކޮންޓްރޯލް ކުރުމަށް ފަހު އޭރިއާ ތެރެއަށް ވަދެ ކުޅުންތެރިއެއްގެ ކައިރިން ނައްޓާލުމަށްފަހު އޭނާ ވަނީ އެ ބޯޅަ ގޯލުގެ މަތީ ކަނަށް ވައްދާލާފައެވެ.

މި މެޗަށް ފަހު ވާހަކަދައްކަމުން ރެއާލްގެ ކޯޗު ޒިދާން ވަނީ ރޮނާލްޑޯއަށް ތައުރީފްކޮށް ވާހަކަ ދައްކާފައެވެ. ޒިދާން ބުނީ ރޮނާލްޑޯގެ މުހިންމުކަން ކިތަންމެހާ ވެސް ބޮޑުކަމަށާއި އެކަން މިރޭގެ މެޗުން ވެސް ފެނިގެން ހިންގައްޖެ ކަމަށެވެ.

" މިރޭގެ މެޗުން ވެސް ރޮނާލްޑޯގެ މޮޅުކަމާއި މުހިންމުކަން ފެނިގެން ހިނގައްޖެ. އޭނާ މި ޓީމުގައި ހުރުމަކީ ބޮޑު އުފަލެއް،" ޒިދާން ބުންޏެވެ.