ވަޒީރު އިހުސާނުގެ "ހަމަހިމޭންކަން" ބުނެދެނީ ކޮންވާހަކަ އެއް؟

ސަރުކާރުގެ އެންމެ އިސް ސަފުން އަދި ރައީސުލްޖުމްހޫރިއްޔާގެ އަރިސް ޓީމުން މީގެކުރިން ވަރަށް ހަރަކާތްތެރިކޮށް ފެނިގެންދިޔަ ސީނިއަރ ވަޒީރު އަލީ އިހުސާނުގެ ފަހަކަށް އައިސް ފެންނަ ހިމޭންކަމާ ގުޅޭގޮތުން ގިނަ ބައެއްގެ މެދުގައި ވަނީ ސުވާލު އުފެދިފަ އެވެ. ނަމަވެސް، މި ހަމަހިމޭންކަމުން ގިނަ ބަޔަކަށް ސިފަވަނީ އޭނާއަކީ ހަމައެކަނި ސިޔާސީ ބޭފުޅެއްގެ ބަދަލުގައި، އިޚްލާސްތެރި އަދި ހަގީގީ ޝަޚްސިއްޔަތެއްގެ ގޮތުގަ އެވެ. މިކަމަށް ބާރުދޭ އެތައް ސަބަބުތަކެއް ވެސް އެބަހުއްޓެވެ.

ވަޒީރު އިހުސާނަކީ އަސްކަރީ ޚިދުމަތުގެ ދާއިރާއިން ފުރިހަމަ ތަމްރީނު ލިބިވަޑައިގެން ހުންނެވި، ސިފަވަންތަ ދިވެހި ދަރިއެކެވެ. ސިފައިންގެ ހުވާގެ މަތިވެރި ޒިންމާ އެމަނިކުފާނުގެ ހިތްޕުޅުގައި އަދިވެސް ވަރުގަދައަށް ދެމިއޮތްކަން ޔަގީނެވެ. މިވަގުތު ސަރުކާރުގެ އެންމެ އިސް ސަފުގައި، އަސްކަރީ ޚިދުމަތުގެ ތަޖުރިބާ ލިބިވަޑައިގެންފައިވާ ބޭފުޅަކަށް ހުންނެވީވެސް ވަޒީރު އިހްސާނެވެ. އެހެންކަމުން، ޤައުމަށް މިހާރު ކުރިމަތިވެފައިވާ ނާޒުކު އަދި ނުތަނަވަސް ހާލަތާމެދު އެންމެ ފުޅާ ދާއިރާއެއްގައި ފުންކޮށް ވިސްނާވަޑައިގަންނަވާނެ އެއް ބޭފުޅަކީ އެމަނިކުފާނު ކަމާމެދަކު ޝައްކެއް ނެތެވެ. ކަންކަން ނިންމެވުމުގައްޔާއި ފިކުރުކުރެއްވުމުގައި އަބަދުވެސް ވަކި ހައްދެއް ހިފަހައްޓަވާނެ ބޭފުޅަކަށް ވަޒީރު އިހުސާން ވާނެ އެވެ. އެހެންކަމުން، ރައީސް ޑރ. މުއިއްޒު ފަހަނައަޅުއްވައި ވަޑައިގެންފައިވާ ކަމަށް ބެލެވޭ ރަތް ރޮނގާމެދު، އެންމެ ބޮޑު ކަންބޮޑުވުމަކާއި ނުތަނަވަސްކަމެއް އޮންނާނެ އެއް ބޭފުޅަކީ ވެސް ވަޒީރު އިހުސާން ކަމުގައި ވުމީ ވަރަށް ގާތް ކަމެކެވެ.

ދާޚިލީ ސަލާމަތާއި ރައްކާތެރިކަމާ ގުޅޭ އެންމެހައި ކަންކަން އެއް ފުރާޅެއްގެ ދަށަށް ގެނެސް، ޤާނޫނު ތަންފީޒުކުރުމުގެ ފުރިހަމަ މަސްއޫލިއްޔަތު ރައީސުލްޖުމްހޫރިއްޔާ ހަވާލުކުރެއްވީ ވަޒީރު އިހުސާން އާއެވެ. ނަމަވެސް، ޒިންމާތައް ހަވާލުކުރެއްވި ނަމަވެސް، ކޮންމެ މުއައްސަސާއަކަށް ސީދާ ރައީސުލްޖުމްހޫރިއްޔާގެ ބާރު ފޯރުވޭނެ ފަދަ އިންތިޒާމުތަކެއް ވަނީ ހަމަޖައްސަވާފަ އެވެ. ވަޒީރުގެ އިސްނެންގެވުމުގެ ދަށުން ހަގީގީ އަދި ހަރުދަނާ ޕްލޭނެއް އެކުލަވައިލެވުނު ނަމަވެސް، ގޭންގު ކުށްތަކުގެ މައްސަލައިގައި ވަޒީރުގެ ވާހަކަފުޅުތަކަށް ރައީސް މަލާމާތް ރައްދުކުރެއްވި މަންޒަރު އާންމުކޮށް ވަނީ ފެނިގެން ގޮސްފަ އެވެ.

މީގެއިތުރުން، މަސްތުވާތަކެތީގެ ބޮޑެތި ނެޓްވޯކުތަކާއި ފުލުހުންގެ އިންޓެލިޖެންސާއި އަދި ކަސްޓަމްސްގެ ބައެއް އޮފިސަރުންނާ ދެމެދު ގުޅުން އޮންނަކަމުގެ ތުހުމަތުތައް ފެންމަތިވެ، ކަސްޓަމްސްގެ މައްސަލަތައް ބަލައި ފިޔަވަޅު އެޅުމަށް އެންގެވި އެންގެވުންތަކަށް ވީގޮތް ވަޒީރު އިހުސާނަށް ވަރަށް ރަނގަޅަށް އެނގިވަޑައިގަންނަވާނެ އެވެ. އަދި އެންމެ ފަހުން، މާލޭގެ ޓްރެފިކް ބެލެހެއްޓުމަށްޓަކައި ވަކި އޮފީހެއް އުފައްދަވައި، އެ ތަން މާނިއުއާ ހަވާލުކުރައްވައި، ސީދާ މިނިސްޓަރ ސައީދަށް ރިޕޯޓްކުރާ އިދާރާއެއްގެ ގޮތުގައިވެސް ވަނީ ހަމަޖައްސަވާފަ އެވެ.

ނަތީޖާ ނެރުމުގެ ޤާބިލުކަން ހުރި ވަޒީރަކަށް މިފަދަ އެކި ގޮތްގޮތުން ކުރިމަތިކުރެވުނު ހުރަސްތަކާއި ޕްރެޝަރުގެ ސަބަބުން، މިއަދު އެމަނިކުފާނަށް ވަނީ ހަމަހިމޭންކަން އިޚްތިޔާރުކުރައްވަން މަޖުބޫރުވެފަ އެވެ. މިފަދަ އެތައް ކަމެއް ވަނީ ތަރުތީބުން ހިނގާދިޔަ ތަން ފެނިފަ އެވެ.

ސަރުކާރުގެ އަގުވެއްޓިދާނެ ކޮންމެ ދަނޑިވަޅެއްގައި، ކުރިމަތިވި ކޮންމެ ގޮންޖެހުމަކާ އެންމެ އިސްވެ ކެރިގެން ކުރިމަތިލެއްވީ ވަޒީރު އިހުސާނެވެ. ޚުދު ރައީސުލްޖުމްހޫރިއްޔާގެ އަބުރުފުޅަށް އެންމެ ބޮޑު ހުތުރެއް އެރި ދަނޑިވަޅުގައި ވެސް، އެކަން ދިފާއުކުރައްވަން ނުކުމެވަޑައިގެންނެވީ އިހުސާނެވެ. އެއީ ޢަބްދުއްރަހީމެއް، ފަލާހެއް ނުވަތަ މުއްތަލިބެއް ވެސް ނޫނެވެ.

ރަސްމާލެ މަޝްރޫއާ ގުޅޭގޮތުން ހިނގަމުންދާ ކަންކަމާމެދު، ޝައްކެއްވެސްނެތް ގޮތުގައި ވަޒީރު އިހުސާންގެ ކަންބޮޑުވުންތަކެއް ހުންނާނެ އެވެ. ދިވެހި ޤައުމުގެ މިނިވަންކަމާއި ސިޔާދަތަށް ބުރޫއަރާފާނެ ފަދަ އެއްވެސް ނިންމުމަކަށް ވަޒީރު އިހުސާން ތާއީދުނުކުރައްވާނެކަން ޔަޤީނެވެ. ވީމާ، ޤައުމަށް ގެއްލުމާއި ދެރަ ލިބިގެންދާނެ އެއްވެސް ކަމަކަށް ޖާގަ ނުދެއްވުމަށް ވަޒީރުގެ ކިބައިން އިޚްލާސްތެރިކަމާއެކު އެދެމެވެ. ވެރިކަމުގެ ދައުރު ނިމިގެން ދިޔަކަމުގައި ވިޔަސް ގައުމު ދެމިއޮންނާނެ އެވެ. އަދި ސިފައިންގެ ޚިދުމަތާ ގުޅިވަޑައިގެންނެވި ދުވަހު ޤައުމަށްޓަކައި ކުރެއްވި މަތިވެރި ހުވާގެ މަތީގައި ވަޒީރު ސާބިތުވެ ދެމިހުންނަވާނެ ކަމާމެދު އެއްވެސް ޝައްކެއް ނެތެވެ.