ސިލްވާއާއެކު ޗެލްސީން ކުރަމުން އަންނަ މަޝްވަރާތައް ކާމިޔާބު

ޗެލްސީ އަށް ކުޅެމުން އަންނަ ބްރެޒިލްގެ ޑިފެންޑަރު ތިއާގޯ ސިލްވާއާއެކު އެ ކުލަބުން ކުރަމުން އަންނަ މަޝްވަރާތައް ކާމިޔާބު ކަމަށް މީޑިއާ ރިޕޯޓުތައް ބުނެފި އެވެ.

ޗެލްސީއާއެކު ސިލްވާ އެންމެ ފަހުން ހެދި އެއްބަސްވުމުގެ މުއްދަތު ހަމަވާނީ މި ސީޒަންގެ ނިޔަލަށެވެ. އެހެންކަމުން ޗެލްސީން ބޭނުންވަނީ އުމުރުން 38 އަހަރުގެ ކުޅުންތެރިޔާ އިތުރު އެއް އަހަރު އެ ކުލަބުގައި މަޑުކުރަން ކަމަށް ރިޕޯޓުތައް ބުނެ އެވެ. އެކަމުގެ މަޝްވަރާތައް ޗެލްސީން ސިލްވާއާއެކު ކުރަމުން އަންނައިރު އެ މަޝްވަރާތައް ކާމިޔާބު ކަމަށް ވެސް ރިޕޯޓުތައް ބުނެ އެވެ. ޗެލްސީގެ ކޯޗު ގްރަހަމް ޕޮޓާ ވަނީ މީގެ ކުރިން އޭނާ ބޭނުންވަނީ ސިލްވާ ޗެލްސީގައި މަޑުކުރަން ކަމަށް ބުނެފަ އެވެ. ރިޕޯޓުތަކުގައިވާ ގޮތުން ސިލްވާއާއެކު ޗެލްސީން ކުރަމުން އަންނަ މަޝްވަރާތަކުގެ ތެރެއިން މިހާރު އެ ކުލަބުން މަޑުކުރަނީ ސިލްވާގެ ނިންމުމަކަށެވެ. މީގެ އިތުރުން ޗެލްސީގެ ހުށަހެޅުން ޤަބޫލުކޮށް ސިލްވާ ކުލަބުގައި އިތުރު އެއް އަހަރު މަޑުކުރުމަކީ ގާތް ކަމެއް ކަމަށް ވެސް ރިޕޯޓުތައް ބުނެ އެވެ.

ޕީއެސްޖީ ދޫކޮށް ޗެލްސީ އަށް ބަދަލުވި ސިލްވާ ވަނީ މިހާތަނަށް އެ ކުލަބަށް ކުޅެދިން 106 މެޗުގައި ފަސް ލަނޑު ޖަހައިފަ އެވެ. އޭނާ ވަނީ ޗެލްސީއާއެކު ތިން ތައްޓެއް ކާމިޔާބުކޮށްފަ އެވެ. އޭގެ ތެރޭގައި ޔުއެފާ ޗެމްޕިއަންސް ލީގައި، ޔުއެފާ ސުޕަ ކަޕް އަދި ފީފާ ކުލަބް ވޯލްޑް ކަޕް ހިމެނެ އެވެ. މީގެ އިތުރުން ސިލްވާ ވަނީ ޗެލްސީއާއެކު އެފްއޭ ކަޕްގެ ފައިނަލްގައި ދެ ފަހަރު އަދި ކަރަބޯ ކަޕްގެ ފައިނަލްގައި ކުޅެފަ އެވެ.

ބްރެޒިލްގެ ޤައުމީ ޓީމަށް ވެސް ކުޅެމުން އަންނަ ސިލްވާ ވަނީ މިހާތަނަށް ޤައުމީ ޓީމަށް ކުޅެދިން 113 މެޗުގައި ހަތް ލަނޑު ޖަހައިފަ އެވެ. ބްރެޒިލާއެކު ސިލްވާ ވަނީ 2013 ވަނަ އަހަރުގެ ކޮންފަޑެރޭޝަން ކަޕާއި، 2019 ވަނަ އަހަރުގެ ކޮޕާ އެމެރިކާ މުބާރާތް ކާމިޔާބުކޮށްފަ އެވެ.