ލީޑްސް ޔުނައިޓެޑުގެ ކޯޗުކަމުން ޖެސީ މާޝް ވަކިކޮށްފި އެވެ.

ލީޑްސް އިން ވަނީ ހޯމަ ދުވަހުގެ ރޭ އާންމު ކުރި ސްޓޭޓްމަންޓެއްގައި އެކަން ކަށަވަރުކޮށްދީފަ އެވެ. ލީޑްސްގެ ކޯޗުކަމާ ޖެސީ ހަވާލުވީ މިދިޔަ އަހަރުގެ ފެބްރުވަރީ މަހު އެވެ. އެއީ އޭރު އެ ޓީމުގެ ކޯޗުކަމުގައި ހުރި އާޖެންޓީނާ މާސެލޯ ބިއެލްސާ ވަކިކުރުމަށްފަހު އެވެ. ބިއެލްސާ ވަކިކޮށްފައި ވަނީ ލީޑްސްގެ ނަތީޖާ ދަށްވުމުގެ ސަބަބުންނެވެ. 11 މަސް ދުވަސް ފަހުން ލީޑްސްގެ ކޯޗުކަމުން ޖެސީ ވަކިކުރީ ވެސް ޓީމުގެ ނަތީޖާ ދަށްވުމުގެ ސަބަބުންނެވެ. ލީޑްސް އިން ވަނީ ކޯޗުކަމާ ހަވާލުވެ ޖެސީ ޓީމަށް ކޮށްދީފައިވާ ޚިދުމަތްތަކަށް ޝުކުރު އަދާކޮށްފަ އެވެ. މީގެ އިތުރުން ޖެސީއާއެކު މަސައްކަތް ކުރި އެހެން މުވައްޒަފުންނަށް ވެސް ކުލަބުން ވަނީ ޝުކުރު އަދާކޮށްފަ އެވެ. ޖެސީއާއެކު މަސައްކަތް ކުރި ބައެއް އެހެން ފަރާތްތައް ވެސް ވަނީ ކުލަބް ދޫކޮށްލައިފަ އެވެ. މީގެ އިތުރުން ލީޑްސް އިން ބުނީ އެ ޓީމުން މިހާރު އައު ކޯޗެއް ހަމަޖެއްސުމުގެ މަސައްކަތް ކުރަމުން އަންނަ ކަމަށާއި، ކުރިއަށް އޮތް ދުވަސްތަކުގައި އެކަން ހަމަޖެހިގެން ދާނެ ކަމަށެވެ.

މި ސީޒަންގެ ޕްރިމިއާ ލީގުގައި މިހާތަނަށް ކުޅުނު 20 މެޗުން 18 ޕޮއިންޓާއެކު ލީޑްސް އޮތީ 17 ވަނައިގަ އެވެ. އެ ޓީމަށް ރެލިގޭޝަން ޒޯންގެ ބިރު އެބަ އޮތެވެ. މި ސީޒަންގައި ކުޅުނު 20 މެޗުން ލީޑްސް މޮޅުވެފައި ވަނީ އެންމެ ހަތަރު މެޗުންނެވެ. ހަ މެޗު އެއްވަރުވެފައިވާއިރު، 10 މެޗުން ވަނީ ބަލިވެފަ އެވެ.