ލީޑްސް ޔުނައިޓެޑުން ޗެލްސީ ބަލިކޮށްފި
މެޗުން މޮޅުވެ ލީގު ތާވަލްގެ ތިން ވަނަ މަގާމަަށް ޖެހިލުމުގެ ފުރުސަތު ޗެލްސީ އިން ނަގާލާފައިވާއިރު، އެ ޓީމު އޮތީ ހަތަރު ވަަނައިގަ އެވެ. އެއީ މިހާތަނަށް ލީގުގައި ކުޅެފައިވާ 14 މެޗުން 24 ޕޮއިންޓާ އެކު އެވެ. ޗެލްސީ އަތުން މޮޅުވި ލީޑްސް ޔުނައިޓެޑު އޮތީ 14 ޕޮއިންޓާ އެކު 17 ވަނައިގަ އެވެ.
ލީޑްސް ޔުނައިޓެޑާއި ޗެލްސީ ބައްދަލު ކުރި މެޗުގެ ތެރެއިން
އިނގިރޭސި ޕްރިމިއާ ލީގުގައި ލީޑްސް ޔުނައިޓެޑާ ދެކޮޅަށް ކުޅުނު މެޗުން ޗެލްސީ ބަލިވެއްޖެ އެވެ.
ލީޑްސް ޔުނައިޓެޑުގެ އަމިއްލަ ދަނޑުގައި ބުދަ ދުވަހުގެ ރޭ ދަންވަރު ކުޅުނު މެޗުގައި އެ ޓީމުން ވަނީ 3-1 އިން ޗެލްސީގެ މައްޗަށް ކުރި ހޯދައިފަ އެވެ. މެޗުގެ ފުރަތަމަ ހާފުގައި ލީޑްސް ޔުނައިޓެޑުން ދެ ލަނޑު ޖަހާފައި ވަނިކޮށް، ދެ ވަނަ ހާފުގައި ޗެލްސީ އިން ލަނޑު ޖަހައި ފަރަގު ކުޑަ ކުރި އެވެ. ނަމަވެސް، ދެ ވަނަ ހާފުގައި ލީޑްސް ޔުނައިޓެޑުން ވަނީ ތިން ވަނަ ލަނޑެއް ޖަހައިފަ އެވެ.
މެޗު ފަށައިގެން ހަ ވަނަ މިނެޓުގައި ލީޑްސް ޔުނައިޓެޑުން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު އެ ޓީމަށް ޖަހައިދިނީ ޖަކާ ބިޖޯލް އެވެ. އޭގެ ފަހުން ފުރަތަމަ ހާފުގެ ފުރިހަމަ ވަގުތު ހަމަވާން ދެ މިނެޓަށް ވެފައި ވަނިކޮށް، އާއޮ ޓަނަކާ ވަނީ ލީޑްސް ޔުނައިޓެޑުގެ ދެ ވަނަ ލަނޑު ޖަހައި ލީޑު ފުޅާ ކޮށްފަ އެވެ.
މެޗުގެ ދެ ވަނަ ހާފު ފަަށައިގެން ފަސް ވަނަ މިނެޓުގައި ޗެލްސީ އިން ވަނީ ލަނޑު ޖަހައި ފަރަގު ކުޑަ ކޮށްފަ އެވެ. އެ ލަނޑު އެ ޓީމަށް ޖަހައިދިނީ ޕެޑްރޯ ނެޓޯ އެވެ. އެ ލަނޑު ޖަހަން އޭނާ އަށް ފުރުސަތު ތަނަވަސްކޮށްދިނީ ޖެމީ ގިޓެންސް އެވެ. އޭގެ ފަހުން މެޗުގެ 72 ވަނަ މިނެޓުގައި ޑޮމިނިކް ކަލްވާޓް ލެވިން ވަނީ ލީޑްސް ޔުނައިޓެޑުގެ ތިން ވަނަ ލަނޑު ޖަހައިފަ އެވެ.
މެޗުން މޮޅުވެ ލީގު ތާވަލްގެ ތިން ވަނަ މަގާމަަށް ޖެހިލުމުގެ ފުރުސަތު ޗެލްސީ އިން ނަގާލާފައިވާއިރު، އެ ޓީމު އޮތީ ހަތަރު ވަަނައިގަ އެވެ. އެއީ މިހާތަނަށް ލީގުގައި ކުޅެފައިވާ 14 މެޗުން 24 ޕޮއިންޓާ އެކު އެވެ. ޗެލްސީ އަތުން މޮޅުވި ލީޑްސް ޔުނައިޓެޑު އޮތީ 14 ޕޮއިންޓާ އެކު 17 ވަނައިގަ އެވެ.
