ލީޑްސް އަށް ލީގުގައި އޮތުމުގެ އަމިއްލަ ބާރު ގެއްލިއްޖެ

އިނގިރޭސި ޕްރިމިއަރ ލީގުގައި ކުޅެމުން އަންނަ ލީޑްސް ޔުނައިޓެޑަށް ލީގުގައި ދެމިއޮތުމުގެ އަމިއްލަ ބާރު ގެއްލިއްޖެއެވެ.

ލީޑްސް އަށް އަމިއްލަ ބާރު ގެއްލުނީ އާދިއްތަ ދުވަހު ވެސްޓް ހޭމް ކައިރިން ބަލިވުމުންނެވެ. މި މެޗުގައި ފުރަތަމަ ކުރިހޯދީ ވެސް ލީޑްސް އިންނެވެ. މެޗުގެ 17 ވަނަ މިނެޓުގައި ލީޑްސްގެ ރޮޑްރީގޯ މޮރޭނޯ ކާމިޔާބުކޮށްދިން ލަނޑާއެކު އެ ޓީމަށް ހިތްވަރެއް ލިބުނެވެ. ނަމަވެސް، ގިނަ ވަގުތު ބޯޅަ ހިފަހައްޓައިގެން ކުޅުނު ވެސްޓް ހޭމް އިން ވަނީ ހާފު ނިމުމުގެ ކުރިން އެއްވަރުކޮށްފައެވެ. މެޗުގެ 32 ވަނަ މިނެޓުގައި އެ ލަނޑު ކާމިޔާބުކޮށްދިނީ ޑެކްލަން ރައިސް އެވެ.

ދެވަނަ ހާފު ފެށިގެން ކުޅުން އިތުރަށް ރަނގަޅުކޮށް، ވެސްޓް ހޭމް އިން ވަނީ މެޗުގެ ފުރަތަމަ ފަހަރަށް ލީޑު ނަގާފައެވެ. ވެސްޓް ހޭމް އަށް އެ ލަނޑު ކާމިޔާބުކޮށްދިނީ ޖެރޮޑް ބޮވެންއެވެ. ދެވަނަ ހާފުގެ އިތުރު ވަގުތުގައި މެނުއެލް ލަންޒިނީ ވަނީ ވެސްޓް ހޭމް އަށް އިތުރު ލަނޑެއް ޖަހާ، ލީޑު ފުޅާކޮށްދީފައެވެ. މި މެޗު ނިމުނީ 3-1 ނަތީޖާއަކުންނެވެ.

ލީޑްސް އަށް ކިރިޔާވެސް ފުރުސަތެއް އޮތީ ލީގުގެ ފަހު މެޗުގައި ޓޮޓެންހަމް ބަލިކޮށް، އެވަޓަން ނުވަތަ ލެސްޓާގެ މެޗުގެ ނަތީޖާ ވާގޮތެއް ބަލައިގެނެވެ. 17 ވަނައިގައި އޮތް އެވަޓަންއަށް 33 ޕޮއިންޓު ލިބިފައިވާއިރު، ލީޑްސް އޮތީ 31 ޕޮއިންޓާއެކު 18 ވަނައިގައެވެ. ދެ ޓީމަށްވެސް ބާކީ އޮތީ އެންމެ މެޗެކެވެ. 19 ވަނައިގައި ލެސްޓާ އޮތީ 30 ޕޮއިންޓާއެކުއެވެ. ލެސްޓާއަށް ބާކީ ދެ މެޗު އެބަ އޮތެވެ.

އިނގިރޭސި ޕްރިމިއަރ ލީގުގެ ފަހު ބުރުގެ މެޗުތައް ކުޅެން ހަމަޖެހިފައިވަނީ 28 މެއި ގައެވެ. ހުރިހާ މެޗެއްވެސް ކުޅޭނީ ރާއްޖެ ގަޑިން 20:30 ގައެވެ.