ފޮރެސްޓަށް ނަވާސް ކުޅެދިން ފުރަތަމަ މެޗުގައި ވެސް މުހިންމު ސޭވްތަކެއްކޮށް ޓީމު މޮޅުވުމަށް އެހީވެދީފި

އިނގިރޭސި ޕްރިމިއާ ލީގުގެ ނޮޓިންހަމް ފޮރެސްޓަށް ބަދަލުވެ އެ ޓީމަށް ކުޅެދިން ފުރަތަމަ މެޗުގައި ވެސް ކޭލޯ ނަވާސް މޮޅު ކުޅުމެއް ދައްކައިފި އެވެ.

ޕެރިސް ސެއިންޓް ޖާމަން (ޕީއެސްޖީ) ގައި ހުރުމަށްފަހު ނަވާސް ފޮރެސްޓަށް ބަދަލުވީ ލޯނު އެއްބަސްވުމެއްގެ ދަށުންނެވެ. ފޮރެސްޓަށް އޭނާ ބަދަލުވީ މިހާރު ކުރިއަށްދާ ސީޒަންގެ ނިޔަލަށެވެ. މި ސީޒަނަށްފަހު ނަވާސް އަލުން އެނބުރި ޕީއެސްޖީ އަށް ދާނެ އެވެ. ފޮރެސްޓަށް ނަވާސް ކުޅެދިން ފުރަތަމަ މެޗަކީ ޕްރިމިއާ ލީގުގައި ލީޑްސް ޔުނައިޓެޑާ ދެކޮޅަށް ފޮރެސްޓުން ކުޅުނު މެޗެވެ. އެ މެޗުގައި ފޮރެސްޓުގެ ގޯލު ބަލަހައްޓާފައި ވަނީ ނަވާސް އެވެ. އަމިއްލަ ދަނޑުގައި ކުޅުނު މެޗުން ފޮރެސްޓު މޮޅުވީ 1-0 އިންނެވެ. މެޗުގައި ފޮރެސްޓުގެ ލަނޑު ޖަހައިދިނީ ބްރެންނަން ޖޯންސަން އެވެ. މެޗުގައި ލީޑްސް ޔުނައިޓެޑުން ލަނޑު ޖެހުމަށް މަސައްކަތް ކުރި ނަމަވެސް، ނަވާސް ވަނީ ލީޑްސްގެ ހަމަލާތައް ހުއްޓުވައިފަ އެވެ. މެޗުގައި ނަވާސް ވަނީ ލީޑްސްގެ މުހިންމު ހަަތަރު ހަމަލާއެއް ވެސް ހުއްޓުވައިފަ އެވެ.

މެޗަށްފަހު ވާހަކަ ދައްކަމުން ފޮރެސްޓުގެ ކޯޗު ސްޓީވް ކޫޕާ ބުނީ މެޗުން ފޮރެސްޓަށް ތިން ޕޮއިންޓު ލިބުމުގައި ނަވާސްގެ ދައުރު ވަރަށް ބޮޑު ކަމަށެވެ. އޭނާ ބުނީ މެޗުގައި ނަވާސް ދެއްކި ކުޅުމާއި، އޭނާގެ އިތުބާރާ މެދު ވަރަށް އުފާވާ ކަމަށާއި، އެކަމުގެ ފައިދާ ޓީމަށް ވެސް ކުރާނެ ކަމަށެވެ. މީގެ އިތުރުން ކޫޕާ ބުނީ ނަވާސްގެ ރޭވުންތެރިކަމާއި، ނިންމުންތައް ނިންމުމުގައި އޭނާ ގެންގުޅެނީ ވެސް ޓީމަށް ފައިދާވާ ގޮތް ކަމަށެވެ.

މެޗުން މޮޅުވެ ފޮރެސްޓު ވަނީ ލީގު ތާވަލްގެ 13 ވަނަ މަގާމަށް ޖެހިލައިފަ އެވެ. ކުޅުނު 21 މެޗުން ފޮރެސްޓަށް ލިބެނީ 24 ޕޮއިންޓެވެ. ރެލިގޭޝަން ޒޯނުގައި އޮތް އެވަޓަން އާއި ފޮރެސްޓާ ދެމެދު އޮތީ ހަ ޕޮއިންޓުގެ ތަފާތެކެވެ.