އިނގިރޭސި ޕްރިމިއާ ލީގުގައި ލީޑްސް ޔުނައިޓެޑާ ދެކޮޅަށް ކުޅުނު މެޗުން އެއްވަރުވެ، އެންމެ ފަހުގެ ޗެމްޕިއަން ލިވަޕޫލް އަށް އިތުރު ހާސް ކަމެއް ކުރިމަތި ވެއްޖެ އެވެ.

ލީޑްސް ޔުނައިޓެޑުގެ އަމިއްލަ ދަނޑުގައި ކުޅުނު މެޗު ނިމުނީ ދެ ޓީމު 3-3 އިން އެއްވަރު ވެގެންނެވެ. މެޗުގައި ލިވަޕޫލްް އިން ދެ ފަހަރެއްގެ މަތިން ލީޑު ނެގި ނަމަވެސް، ލީޑްސް ޔުނައިޓެޑުން ވަނީ ނަތީޖާ ހަމަހަމަ ކޮށްފަ އެވެ.

މެޗުގެ ދެ ވަނަ ހާފު ފަށައިގެން ތިން ވަނަ މިނެޓުގައި ލިވަޕޫލް އަށް ލީޑު ނަގައިދިނީ ހޫގޯ އެކިޓީކޭ އެވެ. އޭގެ ދެ މިނެޓު ފަހުން އެކިޓީކޭ ވަނީ އިތުރު ލަނޑެއް ޖަހައި ލިވަޕޫލްގެ ލީޑު ފުޅާ ކޮށްފަ އެވެ.

ނަމަވެސް ގާތް ގާތުގައި ދެ ލަނޑު ޖަހައިގެން ލީޑްސް ޔުނައިޓެޑުން މެޗުގެ ނަތީޖާ ހަމަހަމަ ކުރި އެވެ. އެގޮތުން މެޗުގެ 73 ވަނަ މިނެޓުގައި އެ ޓީމުގެ ފުރަތަމަ ލަނޑު ޑޮމިނިކް ކަލްވާޓް ލެވިން ޖެހީ އެ ޓީމަށް ލިބުނު ޕެނަލްޓީ ކާމިޔާބު ކޮށްގެންނެވެ. އޭގެ ދެ މިނެޓު ފަހުން އެންޓޮން ސްޓާކް ވަނީ ދެ ވަނަ ލަނޑެއް ޖަހައި އެ ޓީމަށް ނަތީޖާ ހަމަހަމަ ކޮށްދީފަ އެވެ.

ދެ ވަނަ ފަހަރަށް މެޗުގައި ލިވަޕޫލް އިން ލީޑު ނެގީ މެޗުގެ ފުރިހަމަ ވަގުތު ހަމަވާން ދިހަ މިނެޓަށް ވެފައި ވަނިކޮށެވެ. އެ ލަނޑު ލިވަޕޫލް އަށް ޖަހައިދިނީ ޑޮމިނިކް ސޮބޮސްލާއީ އެވެ. ނަމަވެސް، މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި އާއޯ ޓަނަކާ ވަނީ ލަނޑު ޖަހައި ލީޑްސް އަށް ނަތީޖާ ހަމަހަމަ ކޮށްދީފަ އެވެ.

ލީޑްސް އަތުން ލިވަޕޫލް އެއްވަރު ވެފައިވާއިރު، އެންމެ ފަހުން އެ ޓީމު ކުޅުނު 10 މެޗުގެ ތެރެއިން މޮޅުވީ އެންމެ ދެ މެޗުންނެވެ. ހަ މެޗުން ލިވަޕޫލް ބަލިވެފައިވާއިރު، ދެ މެޗުން ވަނީ އެއްވަރުވެފަ އެވެ. ލިވަޕޫލްގެ ނަތީޖާތައް ވަރަށް ބޮޑަށް ދަށްވެފައިވާއިރު، އެ ޓީމުގެ ކޯޗު އާން ސްލޮޓް އަށް އަންނަނީ ފާޑު ކިޔުން ވެސް އަމާޒު ވަމުންނެވެ.

ލީޑްސްއާ އެއްވަރުވެ ލިވަޕޫލް އޮތީ ލީގު ތާވަލްގެ އަށް ވަނަ މަގާމުގަ އެވެ. އެއީ މިހާތަނަށް ލީގުގައި ކުޅެފައިވާ 15 މެޗުން 23 ޕޮއިންޓާ އެކު އެވެ. މެޗަށް ފަހު ވާހަކަ ދައްކަމުން ސްލޮޓް ބުނެފައި ވަނީ، މިއީ މި ސީޒަންގައި އެތައް ފަހަރަކު ލިވަޕޫލް އަށް ކުރިމަތިވެފައިވާ ޙާލަތެއް ކަމަށާއި، އެ މެޗުން ޕޮޒިޓިވް ކަންތައް ތަކެއް ނަގަން ޖެހޭ ކަމަށެވެ.