އެސްޓަން ވިލާ އިން ލީޑްސް ޔުނައިޓެޑު ބަލިކޮށްފި

އިނގިރޭސި ޕްރިމިއާ ލީގުގައި ލީޑްސް ޔުނައިޓެޑާ ދެކޮޅަށް ކުޅުނު މެޗުން އެސްޓަން ވިލާ މޮޅުވެއްޖެ އެވެ.

ހުކުރު ދުވަހުގެ ރޭ އެސްޓަން ވިލާގެ އަމިއްލަ ދަނޑުގައި ކުޅުނު މެޗު އެ ޓީމުން ކާމިޔާބުކުރީ 2-1 އިންނެވެ. މެޗު ފަށައިގެން ތިން ވަނަ މިނެޓުގައި އެސްޓަން ވިލާ އަށް ލީޑު ނަގައިދިނީ ލިއޯން ބައިލޭ އެވެ. އެއީ ލީޑްސް ޔުނައިޓެޑުގެ އޭރިޔާ ބޭރުން ބޯބަކާ ކަމަރާ ދިން ބޯޅާއެއް އޭރިޔާ ތެރޭ ހުރެ ގޯލުގެ ދުރު ކަނަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ. އޭގެ ފަހުން ލީޑްސް ޔުނައިޓެޑުގެ ރޮޑްރީގޯ ލަނޑެއް ޖެހި ނަމަވެސް، ރެފްރީ ވަނީ އޭނާ އޮފްސައިޑު ކަމަށް ނިންމާފަ އެވެ. ލީޑްސް އިން ނަތީޖާ ހަމަހަމަ ކުރުމަށް މަސައްކަތް ކުރަމުން ދަނިކޮށް، އެސްޓަން ވިލާގެ ދެ ވަނަ ލަނޑު ދެ ވަނަ ހާފުގެ 64 ވަނަ މިނެޓުގައި ޖެހީ އެމިލިއާނޯ ބުއެންޑިއާ އެވެ. އެއީ އެސްޓަން ވިލާގެ ބައިލޭ ފޮނުވާލި ބޯޅައެއް ލީޑްސްގެ ގޯލް ކީޕަރު އިލާން މެސްލިއާ މަތަކުރި ވަގުތު ރީ ބައުންސަށް ނިކުތް ބޯޅަ ގޯލަށް ފޮނުވާލައިގެން ބުއެންޑިއާ ޖެހި ލަނޑެކެވެ. މެޗުގައި ލީޑްސްގެ ހަމައެކަނި ލަނޑު 83 ވަނަ މިނެޓުގައި ޖެހީ ޕެޓްރިކް ބަމްފޯޑް އެވެ.

މެޗުން މޮޅުވެ އެސްޓަން ވިލާ އޮތީ ކުޅުނު 19 މެޗުން 25 ޕޮއިންޓާއެކު ލީގު ތާވަލްގެ 11 ވަނައިގަ އެވެ. މެޗުން ބަލިވި ލީޑްސް އޮތީ ކުޅުނު 18 މެޗުން 17 ޕޮއިންޓާއެކު 14 ވަނައިގަ އެވެ.