ސީރިޔާ ހަނގުރާމަ: ގެދޮރު ދޫކޮށްދާން ޖެހިފައިވާ މީހުންގެ ތެރެއިން 500،000 މީހުން މިއަހަރު އެބައިމީހުންގެ ގެދޮރަށް އައިސްފި

ސީރިޔާގެ ދާހިލީ ހަނގުރާމައިގެ ސަބަބުން ގެދޮރު ދޫކޮށްދާން ޖެހިފައިވާ މީހުންގެ ތެރެއިން 500،000 މީހުން، މިއަހަރު މިހާތަނަށް އެބައިމީހުންގެ ގެދޮރަށް އައިސްފައިވާ ކަމަށް އދ އިން ބުނެފިއެވެ.

އދ. ގެ ރެފިއުޖީންނާއި ބެހޭ އެޖެންސީ ކަމަށްވާ ޔޫއެންއެޗްސީއާރް އިން ބުނީ ސީރިޔާގެ ތެރޭގައި، ގެދޮރު ދޫކޮށް އެގައުމުގެ އެހެން ތަނަކަށް ބަދަލުވާން ޖެހުނު 440،000 މީހަކާއި އަދި ސީރިޔާ ދޫކޮށް ގައުމުން ބޭރަށް ދާން ޖެހުނު 31،000 އެއްހާ މީހުން އެނބުރި ގެދޮރަށް އައިސްފައިވާ ކަމަށެެވެ.

ޔޫއެންއެޗްސީއާރް އިން ބުނީ ގެދޮރު ދޫކޮށް ދިޔަ މީހުންގެ ތެރެއިން ގިނަ މީހުން އައީ އަލެއްޕޯ، ހަމަ، ހޮމްސް އަދި ޑަމަސްކަސް ސިޓީ އަށް ކަމަށާއި، އެނބުރި އައި މީހުން އައީ އެމީހުންގެ ގެދޮރުގެ ހާލަތު ބެލުމަށާއި އަދި އާއިލާގެ މީހުންގެ ހާލު ބެލުމަށް ކަމަށެވެ. އެހެން ނަމަވެސް އެނބުރި އައި މީހުންނަށް ރައްކާތެރި ހާލަތެއް ގާއިމުވެފައި ނުވާ ކަމަށް ޔޫއެންއެޗްސީއާރް އިން ބުނެއެވެ.

ޔޫއެންއެޗްސީއާރްގެ ތަރުޖަމާނު އެންޑްރެޖް މަހެސިކް ހުކުރު ދުވަހު ވިދާޅުވީ 2015 އިން ފެށިގެން މިހާތަނަށް 260،000 ސީރިޔާ ރެފިއުޖީން އެނބުރި ގައުމަށް އައިސްފައިވާ ކަމަަށެވެ. އޭގެތެރެއިން ގިނަ މީހުން އައީ ތުރުކީން ކަމަށް އޭނާ ވިދާޅުވިއެވެ.

ދާދިފަހުން ޔޫންއެޗްސީއާރް އިން ބުނެފައި ވަނީ 2016 ވަނަ އަހަރު 200،000 މީހުން ސީރިޔާ ދޫކޮށް ގޮސްފައިވާ ކަމަށެވެ. އަދި 2011 ވަނަ އަހަރު ސީރިޔާ ހަނގުރާމަ ފެށުނު ފަހުން 5.5 މިލިޔަން މީހުން ގެދޮރު ދޫކޮށް ގޮސްފައިވާ ކަމަށެވެ. އަދި ސީރިޔާ ތެރޭގައި އެމީހުންގެ ގެދޮރު ދޫކޮށް އެގައުމުގެ އެހެންތަންތަނަށް 6.3 މިލިޔަން މީހުން ބަދަލުވާން ޖެހިފައިވާ ކަމަށެވެ.