ސުޕަރ ކަޕް ސެމީފައިނަލުގައި ވެލެންސިޔާ އަތުން ރެއާލް މޮޅުވީ ޕެނަލްޓީން

ސްޕެނިޝް ސުޕަރ ކަޕް ސެމީފައިނަލްގައި ޕެނަލްޓީ ޖަހައިގެން ވެލެންސިޔާ އަތުން ރެއާލް މެޑްރިޑް މޮޅުވެއްޖެއެވެ.

ސައޫދީ އަރަބިޔާގެ ރިޔާދުގައި ކުޅުނު ސެމީފައިނަލް މެޗު ރެއާލް މެޑްރިޑުން ކާމިޔާބުކުރީ މެޗުގެ ފުރިހަމަ ވަގުތު 1-1 ން އެއްވަރުވެ, ނަތީޖާ ނެރުމަަށް ޖެހި ޕެނަލްޓީގައި 4-3 ން ކުރި ހޯދައިގެންނެވެ. ކިންގް ފަހުދު ސްޓޭޑިއަމްގައި ކުޅުނު މެޗުގައި ރެއާލްއިން ފުރަތަމަ ކުރި ހޯދީވެސް ޕެނަލްޓީއަކުންނެވެ. ޕެނަލްޓީ ކާމިޔާބުކުރީ ބެންޒިމާއެވެ. އެކަމަކު ފުރަތަމަ ހާފް ނިމުމުގެ ކުރިން ސެމުއެލް ލިނޯ ލަނޑުޖަހާ ނަތީޖާ ހަމަހަމަކޮށްދިނެވެ. ޕެނަލްޓީގައި ރެއާލްއިން ހުރިހާ ޕެނަލްޓީއެއްވެސް ކާމިޔާބުކުރިއެވެ. އަދި ރެއާލްގެ ކީޕަރު ކޯޓުއާ ވަނީ ޖޯސް ގާޔާ ޖެހި ޕެނަލްޓީ މަތަކޮށްފައެވެ.

ސެމީފައިނަލް ދެވަނަ މެޗުގައި ބާސެލޯނާއާ ދެކޮޅަށް ނުކުންނާނީ ރެއާލް ބެޓިސްއެވެ.