ޒިދާން ފްރާންސްގެ ގައުމީ ޓީމުގެ ހެޑް ކޯޗަކަށް

ފްރާންސްގެ ގައުމީ ފުޓްބޯޅަ ޓީމުގެ ހެޑް ކޯޗުގެ މަގާމުން ޑިޑިއޭ ޑެޝޯމްޕް ވަކިވުމާ ގުޅިގެން، އެ މަގާމަށް ޒައިނުއްދީން ޒިދާން އައްޔަންކޮށްފި ކަމަށް ފްރެންޗް ފުޓްބޯލް ފެޑެރޭޝަން (އެފްއެފްއެފް) އިން އަންގާރަ ދުވަހު އިއުލާންކޮށްފި އެވެ. މިއީ ގިނަ ބަޔަކު ކުރިންވެސް އުންމީދުކޮށްގެން ތިބި ނިންމުމެކެވެ.

އުމުރުން 54 އަހަރުގެ ޒިދާން އަކީ މި މަގާމަށް އެންމެ އެކަށީގެންވާ ކެންޑިޑޭޓްގެ ގޮތުގައި ގިނަ ދުވަސްތަކެއް ވަންދެން ބެލެވިފައިވާ ފަރާތެކެވެ. އަދި އޭނާ އަކީ ގައުމީ ޓީމާ ހަވާލުވުމުގެ ފުރުސަތަކަށް ފާއިތުވި ބައެއް އަހަރުތަކުގައި އިންތިޒާރު ކުރަމުން އައި ކޯޗެކެވެ.

ޒިދާން މި މަގާމާ ހަވާލުވަނީ 2012 ވަނަ އަހަރުން ފެށިގެން ފްރާންސްގެ ކޯޗުކަން ކުރަމުން އައި ޑެޝޯމްޕްގެ ބަދަލުގަ އެވެ. ޑެޝޯމްޕްގެ ދައުރު ނިމުމަކަށް އައީ މި މަހުގެ ކުރީކޮޅު ނިމިގެންދިޔަ ވޯލްޑް ކަޕްގެ ހަތަރުވަނަ މަގާމު ފްރާންސަށް ލިބުމާ ގުޅިގެންނެވެ.

ޑެޝޯމްޕްގެ އިރުޝާދުގެ ދަށުން ފްރާންސުން ވަނީ 2018 ވަނަ އަހަރުގެ ވޯލްޑް ކަޕް ކާމިޔާބުކޮށް، އޭގެ ހަތަރު އަހަރު ފަހުން ބޭއްވި ވޯލްޑް ކަޕްގެ ފައިނަލަށް ދަތުރުކޮށްފަ އެވެ.

ރެއާލް މެޑްރިޑްގެ ކުރީގެ ތަރި ޒިދާން އަކީ 1998 ވަނަ އަހަރު ފްރާންސުން ވޯލްޑް ކަޕް ކާމިޔާބު ކުރިއިރު ޑެޝޯމްޕްއާ އެކު އެއް ޓީމަކަށް ކުޅުނު ކުޅުންތެރިއެކެވެ. އޭނާ މި މަގާމަށް ތައްޔާރުވަމުން އަންނަނީ 2021 ވަނަ އަހަރު ރެއާލް މެޑްރިޑްގެ ކޯޗުކަމުން ވަކިވި ހިސާބުންނެވެ.

ޕެރިހުގައި ހުންނަ ފްރެންޗް ފުޓްބޯލް ފެޑެރޭޝަންގެ މައި މަރުކަޒުގައި އޮތް ރަސްމިއްޔާތެއްގައި ވާހަކަދައްކަމުން ޒިދާން ބުނީ، އޭނާ ބޭނުންވި ހަމައެކަނި ވަޒީފާއަކީ ފްރާންސްގެ ގައުމީ ޓީމުގެ ކޯޗުކަން ކަމަށެވެ.

"ވޭތުވެދިޔަ ހަތަރު ފަސް އަހަރުގެ ތެރޭގައި ކްލަބްތަކާ ހަވާލުވުމަށް އަހަންނަށް ގިނަ ހުށަހެޅުންތަކެއް ލިބުނު. ނަމަވެސް ފްރާންސްގެ ގައުމީ ޓީމަށްޓަކައި އެ ހުރިހާ ހުށަހެޅުމަކަށް އަހަންނަށް ނޫނެކޭ ބުނެވުނީ،" ޒިދާން އިތުރަށް ބުންޏެވެ.

ޒިދާން މި މަގާމާ ހަވާލުވުމުން އޭނާ ވެގެންދާނީ، އޭނާއާ އެކު ކުރިން ގައުމީ ޓީމަށް ކުޅުނު ލޯރެން ބްލޮންކް (2010 އިން 2012 އަށް) އަދި ޑެޝޯމްޕް ފަދައިން ގައުމީ ޓީމުގެ ކޯޗުކަން ކުރާ ކުރީގެ ކުޅުންތެރިއަކަށެވެ.

ކުޅުންތެރިއެއްގެ ގޮތުގައި 1998 ގެ ވޯލްޑް ކަޕާއި 2000 ވަނަ އަހަރުގެ ޔޫރޯ ކާމިޔާބުކުރި ފްރާންސްގެ ކުރީގެ ޕްލޭމޭކަރު، މީގެ ކުރިން ކޯޗުކޮށްދީފައިވަނީ ހަމައެކަނި ރެއާލް މެޑްރިޑަށެވެ.

ސްޕެއިންގެ ގަދަބާރު ރެއާލް މެޑްރިޑްގައި ހޭދަކުރި ދުވަސްވަރު، ޒިދާން ވަނީ 2016، 2017 އަދި 2018 ވަނަ އަހަރު ޖެހިޖެހިގެން ތިން ފަހަރު އެ ޓީމަށް ޗެމްޕިއަންސް ލީގު ކާމިޔާބުކޮށްދީފަ އެވެ. މިއީ މި މުބާރާތުގެ ޒަމާނީ ތާރީޚުގައި މިހާތަނަށް އެހެން އެއްވެސް ކޯޗަކަށް ހާސިލްކުރެވިފައި ނުވާ ފަދަ ބޮޑު ކާމިޔާބީއެކެވެ.