ފީފާ ވޯލްޑް ކަޕް ގްރޫޕް ސްޓޭޖުގެ ދެ ވަނަ މެޗުގައި މުބާރާތް ބާއްވާ ޤައުމު ޤަތަރަށް ދެކޮޅަށް ނުކުންނައިރު، ސެނެގާލްގެ އެއް ނަންބަރު ގޯލް ކީޕަރު އެޑޮއާޑް މެންޑީ އަށް ފުރިހަމަ އަށް އިތުބާރު އެބަ އޮތް ކަމަށް އެ ޓީމުގެ ކޯޗު އަލިއޫ ސީސޭ ބުނެފިއެވެ.

ޤަތަރު މެޗުގެ ކުރިން އޮތް ޕްރެސް ކޮންފަރެންސްގައި ވާހަކަ ދައްކަމުން ސީސޭ ބުނީ މެންޑީ ހުރީ ފިޓުކޮށް ކަމަށާއި، އޭނާ މެޗަށް ތައްޔާރު ކަމަށެވެ. ސީސޭ ބުނީ މެންޑީގެ ކޮލެޓީއާ މެދު ސުވާލު އުފައްދާނެ ޖާގައެއް އެއްވެސް މީހަކަށް ނޯންނާނެ ކަމަށެވެ. އަދި މެންޑީ އަންނަނީ އުނދަގޫ ހާލަތަކުން އަރައިގަންނަމުން ކަމަށެވެ. އެކަމަކު ވެސް އޭނާއާ މެދު ސުވާލެއް ނެތްކަން ފާހަގަކުރަމުން ސީސޭ ބުނީ، މެންޑީ އަށް އޭނާ އާއި މުޅި ޓީމުގެ ކުޅުންތެރިންގެ އިތުބާރު އޮތް ކަމަށެވެ. ސީސޭ ބުނީ ޤަތަރާ ދެކޮޅަށް ދަނޑު މަތިން ވެސް މެންޑީ އެކަން ދައްކައިދޭނެ ކަމަށެވެ.

ސީސޭގެ އިތުރުން އެ ޕްރެސްގައި ވާހަކަ ދައްކަމުން ސެނެގާލްގެ ޑިފެންޑަރު ކަލީދޫ ކުލިބާލޭ ބުނީ އޭނާ އާއި މެންޑީއާ ވަރަށް ވާހަކަ ދައްކާ ކަމަށެވެ. އަދި މެންޑީއާ ދެމީހުން ހަމައެކަނި އެއް ކުލަބަކަށް ކުޅެނީ ނޫން ކަމަށާއި، އެމީހުންނަނީ ދެ ބެއިން ފަދަ ބައެއް ކަމަށެވެ. އޭނާ ބުނީ މެންޑީ އަކީ ސެނެގާލަށް ވަރަށް މުހިންމު ކުޅުންތެރިޔެއް ކަމަށާއި، އުނދަގޫ ކަންކަން ހުރަސްކުރުމަކީ އާދައިގެ ކަމެއް ކަމަށެވެ.

މީގެ އިތުރުން ކުލިބާލޭ ބުނީ ސެނެގާލުން މުބާރާތް ފަށަން ޖެހުނީ ބައްޔަކާ އެކު ކަމަށާއި، ކުރިއަށް އޮތް ތަނުގައި އަސްލު ސެނެގާލް ފެންނާނެ ކަމަށެވެ. އޭނާ ބުނީ ކޮންމެ ގޮތަކަށް ކަންތައް ވީ ނަމަވެސް އަދިވެސް އުއްމީދު ކުރަމުން އަންނަ ކަމަށެވެ. އަދި ޓީމުގެ ކުޅުންތެރިންނަށް އެންމެ މުހިންމީ ޤައުމުގެ ރައްޔިތުން މާޔޫސްވިޔަ ނުދިނުން ކަމަށެވެ. އޭނާ ބުނީ ދަނޑު މަތީގައި އެމީހުންގެ އެންމެ މޮޅު ކުޅުން ދައްކާނެ ކަމަށެވެ.

ސެނެގާލުން ޤަތަރާ ދެކޮޅަށް ނުކުންނާނީ ހުކުރު ދުވަހު ރާއްޖެ ގަޑިން 18:00 ގައެވެ.