ތިންވަނާގައި އޮވެ ފުރަތަމަ ބުރު ނިންމާލެވޭނެ ކަމުގެ ކޮންފިޑެންސް އެބަ އޮތް: ނިޒާމްބެ

އެސްޓީއޯ މާލެ ލީގުގެ ފުރަތަމަ ބުރު ތާވަލުގެ ތިން ވަނާގައި އޮވެ ނިންމާލުން ވަރަށް މުހިންމު ކަމަށާއި، އެކަން ޙާސިލް ކުރެވޭނެ ކަމުގެ ވަރަށް ބޮޑު ޔަގީން ކަމެށް އެބަ އޮތް ކަމަށް ޓިސީ ސްޕޯޓްސް ކުލަބުގެ ކޯޗް އަހުމަދު ނިޒާމް (ނިޒާމްބެ) ބުނެފިއެވެ.

ފާއިތުވި ސީޒަނުގެ އެންމެ މޮޅު ކޯޗު ކަމިގެ މަގާމު ހޯދާފައިވާ ނިޒާމްބެ މިހެން ބުނެފައި ވަނީ، ހުކުރު ދުވަހު މާލެލީގު ތާވަލުގެ އެއްވަނާގައި އޮތް މާޒިޔާ އާއި ދެކޮޅަށް ކުޅޭ މެޗާއި ގުޅޭ ގޮތުން ވާހަކަ ދައްކަމުންނެވެ.

ލީގު ތާވަލުގެ ހަތަރު ވަނާގައި 10 ޕޮއިންޓާ އެކު އޮތް ޓީސީއަށް ތިން ވަނާގައި އޮވެ މި ބުރު ނިންމާލެވޭނެ ހަނައެކަނި ގޮތަކީ، ހުކުރު ދުވަހުގެ މެޗުން މާޒިޔާގެ މައްޗަށް ކުރިހޯދުމެވެ. ސަބަބަކީ މިއީ ލީގުގެ ފުރަތަމަ ބުރުގައި އެޓީމު ކުޅޭނެ ފަހު މެޗަށް ވާތީއެވެ.

މެޗާ ގުޅޭ ގޮތުން ވާހަކަ ދައްކަމުން ނިޒާމްބެ ބުނެފައިވަނީ، ޓީސީގެ ކުޅުންތެރިން ހިތްވަރާ އެކު މަސައްކަތް ކޮށްފިނަމަ މެޗް ކާމިޔާބުކުރުން މާ އުނދަގޫ ނުވާނެ ކަމަށެވެ. މާޒިޔާ ފަދަ ބޮޑެތި ކުލަބުތަކާ ދެކޮޅަށް ކުޅޭއިރު ވިސްނަން ޖެހޭ ބައިވަރު ކަންތައްތައް ހުންނާނެ ކަމަށާއި، ނަމަވެސް ޓީސީގެ ކުޅުންތެރިން މި މެޗުގައި އިތުރު ހިތްވަރަކާއެކު ތިން ޕޮއިންޓަށް މަސައްކަތް ކުރާނެ ކަމުގެ ފުރުހަމަ ޔަގީންކަން އެބްއޮތް ކަމަށް ވެސް ނިޒާމްބެ ބުންނެވެ.

ޓިސީއިން ލީގުގައި އެންމެ ފަހުން ކުޅުނު މެޗުން، ގްރީން ސްޓްރީޓް އަތުން ވަނީ ބަލުވެފައެވެ. އެހެންކަމުން އޭގެ ސަބަބުން މާޒިޔާ މެޗުގައި ޕްރެޝަރެއް ކުރިމަތި ވެދާނެތޯ ސވުވާލުކުރުމުން ނިޒާމްބެ ބުނީ، އެ މެޗުގައި ޓިސީގެ ކުޅުންތެރިންނަށް މެޗު ފަށައިގަނެވުނީ ވަރަށް އީސީކޮށް ކަމަށާއި، ނަމަވެސް ނަތީޖާ ބަދަލުވެގެން ދިޔަ ހިސާބުން، ކުޅުމަށް ބޮޑު ބަދަލެއް އައިސްފައި ވާކަމަށެވެ. އެހެންކަމުން އެ މެޗުގެ ނަތީޖާއަށް ބަލައިގެން މާޒިޔާ ކޮޅަށް ނިކުންނަން ބޭނުން ނުވާކަމަށް ނިޒާމްބެ ބުންޗެވެ.

މާޒިޔާ އާއި ޓިސީ ބައްދަލުކުރާ މެޗް ހުކުރު ދުވަހު ކުޅުމަށް ހަމަޖެހިފައި ވާއިރު، މާޒިޔާ މިވަގުތު އޮތީ 18 ޕޮއިންޓާއެކު ލީގު ތާވލުގެ އެއް ވަނާގައެވެ. ޓީސީ ހަތަރު ވަނާގައި އޮތްއިރު އެޓީމަށް ލިބިފައިވަނީ 10 ޕޮއިންޓެވެ.