ވިކްޓްރީ އޮތީ އުނދަގޫ ހާލަތެއްގައި، މާޒިޔާ އަތުން މޮޅުވާން އެބަޖެހޭ: ސުޒެއިން

ވިކްޓްރީ ސްޕޯޓްސް ކްލަބް އޮތީ އުނދަގޫ ހާލަތެއްގައި ކަމަށާއި، މާޒިޔާ ސްޕޯޓްސް އެންޑް ރިކްރިއޭޝަން އަތުން މޮޅުވާންޖެހޭ ކަމަށް ވިކްޓްރީގެ ކޯޗު އަލީ ސުޒެއިން ބުނެފިއެވެ.

މެޗުގެ ކުރިން އެފްއޭއެމް ހައުސްގައި ބޭއްވި ނޫސްވެރިންގެ ބައްދަލުވުމުގައި ވާހަކަދައްކަމުން ސުޒެއިން ބުނީ ވިކްޓްރީ އޮތީ ހުރިހާ އިރަކުވެސް އެފަރޓްލާންޖެހޭ ހާލަތަށް ވެއްޓިފަކަމަށެވެ. އެގޮތުން މާޒިޔާ ކަހަލަ ވަރުގަދަ ޓީމަކާ ދެކޮޅަށް ނިކުންނައިރު، ވިސްނަންޖެހޭ ބައިވަރު ކަންތައްތައް އެބަހުރިކަމަށްވެސް ސުޒެއިން ވަނީ ބުނެފައެވެ.

އޭނާ ބުނީ މާޒިޔާ އިން އޭއެފްސީ ކަޕްގައި އިންޑިއާގެ ވަރުގަދަ ކްލަބެއް ކަމަށްވާ މޯހަން ބާގަން ބަލިކޮށް، އަދި ލީގުގައި އެންމެ ފަހުން ކުޅުނު މެޗުން ނިއުރޭޑިއަންޓް ސްޕޯޓްސް ކްލަބްވެސް ބަލިކޮށްފައިވާ ކަމަށާއި، އެޓީމު މިހާރު އޮންނާނީ ވަރަށް މޯޓިވޭޝަންއާއެކުގައި ކަމަށެވެ.

މީގެއިތުރުން ސުޒެއިން ބުނީ މާޒިޔާ ޓީމުގައި ހިމެނޭ މުހައްމަދު އުމެއިރު އަދި އަސަދުﷲ އަބްދުﷲ އަކީ ފާހަގަކޮށްލަންޖެހޭ ހުނަރުވެރި މޮޅު ދެ ކުޅުންތެރިން ކަމަށާއި، އެ ދެ ކުޅުންތެރިންނަށް ވިކްޓްރީން މެޗުގައި ވިސްނަންޖެހޭ ކަމަށެވެ.

ވިކްޓްރީގެ ކީޕަރު މަހުމޫދު އަލީ ޔޫސުފްއާ ބެހޭގޮތުން ސުޒެއިން ބުނީ މާޒިޔާ މެޗުން އޭނާ ފެނިގެންދާނެ ކަމަށެވެ. އެންމެ ފަހުން ޓީސީ ސްޕޯޓްސް ކްލަބާ ދެކޮޅަށް ވިކްޓްރީ ކުޅުނު މެޗުގައި ކީޕަރު މަހުމޫދު ލަސްކުރުމުގެ އަމަލުތައް ގެންގުޅުމުން ސުޒެއިން ވަނީ އެކަމާ މާޔޫސްވިކަމަށް ބުނެ މީޑިއާގައި ހިތާމަ ފާޅުކޮށްފައެވެ.

ސުޒެއިން ބުނީ މެޗެއްގައި ދުވަހަކުވެސް އޮށޯވެގެން އޮވެ ލަސްކޮށް މެޗު ހަލާކުކުރަން ބޭނުން ނުވާ ކަމަށާއި، މަހުމޫދު އެދުވަހު ދަނޑުމަތީގައި ދެއްކި ހުތުރު އަމަލު ރަނގަޅުކުރަން އެދިފައިވާނެ ކަމަށެވެ.

މާލޭ ލީގުގައި ވިކްޓްރީ ހަތަރު މެޗު ކުޅެފައިވާއިރު، އެޓީމު ވަނީ އޭގެ ތެރެއިން ދެ މެޗުން ބަލިވެ އަނެއް ދެ މެޗުން އެއްވަރުވެފައެވެ. އެޓީމު އޮތީ ލިބުނު ދެ ޕޮއިންޓާއެކު ޕޮއިންޓް ތާވަލުގެ ހަ ވަނައިގައެވެ.