ހުރިހާވެސް ވިސްނުމެއް ހުރީ ރަން މެޑަލް ހޯދުމަށް: ބަޓިސް

ތައްޔާރުވަމުން މިދަނީ ބޮޑު މުބާރާތަކަށް ކަމަށާއި މި މުބާރާތުގެ ރަން ތަށި ގައުމުގައި ބެހެއްޓުމަށް ހުރިހާ ރައްޔިތުންގެ އެއްބާރުލުން ވަރަށް ބޮޑަށް ބޭނުންވާ ކަމަށް ގައުމީ ފިރިހެން ވޮލީ ޓީމުގެ ކެޕްޓަން އިޝާން މުހައްމަދު (ބަޓިސް) ބުނެފި އެވެ.

މި މަހުގެ 22 ވަނަ ދުވަހު މާލޭގައި ފެށުމަށް ހަމަޖެހިފައިވާ އޭޝިއަން މެންސް ސެންޓްރަލް ޒޯން ވޮލީބޯލް ޗެމްޕިއަންޝިޕުގައި ވާދަކުރުމަށް ދިވެހި ވޮލީ ޓީމު ވަމުންދާ ތައްޔާރީތަކާ ބެހޭ ގޮތުން ރާއްޖެޓީވީގެ ކުޅިވަރު ފައިލް ޕްރޮގްރާމުގައި ވާހަކަ ދައްކަމުން ބަޓިސް ބުނީ މި މުބާރާތް އަމިއްލަ ގައުމުގައި ބޭއްވިގެންދާއިރު މުޅި ވޮލީ ޓީމުގެ ހުރިހާ ވެސް ވިސްނުމެއް ހުރީ މުބާރާތުގެ ރަން މެޑަލް ހޯދުމަށް ކަމަށެވެ.

ބަޓިސް ބުނީ މުބާރާތަށް ތައްޔާރުވުމުގެ ގޮތުން ތައިލެންޑުގައި ކުރިއަށްގެންދިޔަ ތަމްރީނުތަކުގައި ވެސް ކުޅުންތެރިންނާއި ކޯޗިން ސްޓާފުންގެ ފަރާތުން ވެސް ފެނިގެންދިޔައީ މުބާރާތުން ރަންވަނަ ހޯދުމަށް ބުރަކޮށް މަސައްކަތްކުރި މަންޒަރު ކަމަށާއި އެހެން ކަމުން މިފަހަރުގެ މުބާރާތުގައި އެހިސާބަށް ވާސިލްވުމަށް ކުރެވެން ހުރި ހުރިހާ މަސައްކަތެއް ކުރާނެ ކަމަށެވެ.

މިވަގުތު ޓީމުގެ ހުރިހާ ޑިޕާޓްމަންޓްތަކެއް ވެސް ވަރަށް ރަނގަޅަށް މަސައްކަތް ކުރާކަން ފާހަގަކުރަމުން ބަޓިސް ބުނީ އެކި ޑިޕާޓްމަންޓްތަކަށް ކުޅެމުން އަންނަ ކުޅުންތެރިން، އެ ކުޅުންތެރިންގެ އެންމެ ބެސްޓް ދެމުން އަންނަ ކަމަށެވެ. މީގެ އިތުރުން އޭނާ ބުނީ ޓީމު ޓީމެއްގެ ގޮތުގައި އޮތުމަށް އަބަދުވެސް މަސައްކަތްތަކެއް ކުރަންޖެހޭ ކަމަށާއި އެގޮތުން ކޮންމެ ފަރިތަކުރުމެއްގައި ވެސް ޑިފެންސް ކުރުމާއި ބްލޮކް އަދި ރިސީވްތައް ވަރުގަދަ ކުރުމަށް ގިނަ މަސައްކަތްތަކެއް ކުރެވެމުން އަންނަ ކަމަށެވެ.

ބަޓިސް ބުނީ ފާއިތުވި އަހަރުގެ މި މުބާރާތުގައި ޓީމުގައި ނުހިމެނުނު ކުޅުންތެރިން މިފަހަރުގެ މުބާރާތަށް ނެގި ޓީމުގައި ހިމެނިގެންދިޔުމަކީ ހުރިހާ ކުޅުންތެރިންނަށް ލިބިގެންދިޔަ ހިތްވަރެއް ކަމަށެވެ.

މި މޭރުމުން ވާހަކަ ދައްކަމުން ބަޓިސް ބުނީ މިފަހަރުގެ ސްކޮޑުގައި ނުހިމެނުނު ކުޅުންތެރިންނަކީ ވެސް ތަފާތު މޮޅު ކުޅުންތެރިންތަކެއް ކަމަށާއި އެހެން ނަމަވެސް މިވަގުތު އެންމެ ބޮޑަށް ފޯކަސް ކުރަންޖެހޭނީ ނެތް ކުޅުންތެރިންގެ ބަދަލުގައި ތިބި ކުޅުންތެރިންނާއި އެކު ޓާގެޓަށް ވާސިލުވުމަށް ކަމަށެވެ.

ގައުމީ ވޮލީ ޓީމުގައި މިފަހަރު ރަނގަޅު ސްކޮޑެއް އޮތް އިރު، ޓީމުގައި ހިމެނޭ ބައެއް ކުޅުންތެރިން މިފަހަރުގެ ސްކޮޑުގައި ހިމެނިފައި ނުވާކަން ވެސް ފާހަގަކޮށްލެވެ އެވެ. އެގޮތުން ޓީމުގެ އެޓޭކަރު ޝާއިން މުހައްމަދު (ޝާހިންޓޭ) އާއި އަލީ އާމިރު (ދިގު އައްޔަ) ހިމެނެ އެވެ. މީގެ އިތުރުން މިފަހަރުގެ ސްކޮޑުގައި ތަޖުރިބާކާރު ކުޅުންތެރިޔާ އަޝްފާގު އާދަމް (އައްކަޅޭ) ވަނީ ހިމަނާފަ އެވެ.

އަޝްފާގަކީ މިދިޔަ އަހަރުގެ ޑިސެމްބަރު މަހު ބަންގްލަދޭޝްގައި ކުރިއަށްދިޔަ މި މުބާރާތުގައި ޓީމުގެ ސްކޮޑުން ބާކީކުރި ކުޅުންތެރިއެކެވެ.

މިއަހަރުގެ މުބާރާތުގައި ރާއްޖޭގެ އިތުރުން ދެން ބައިވެރިވެފައި ވަނީ ތުރުކުމަނިސްތާނާއި ނޭޕާލްގެ އިތުރުން ކިރިގިސްތާނެވެ.

މި މުބާރާތުގައި ރާއްޖެ ކުޅޭ ފުރަތަމަ މެޗުގައި މި ހަފްތާގެ ބުދަ ދުވަހު ބައްދަލުކުރާނީ މި މުބާރާތުގެ އެންމެ ފަހުގެ ރަނަރަޕް ކިރިގިސްތާނާ އެވެ.