ރާއްޖޭގައި ކުރިން ކުޅުނު ކުޅުންތެރިން އެބަތިބި، މޮޅުވެވޭނެ: ތިމްޕޫގެ ކޯޗު

ރާއްޖޭގައި ކުރިން ކުޅުނު ކުޅުންތެރިން ތިމްޕޫ ސިޓީގައި އެބަތިބި ކަމަށާއި، މޮޅުވެވޭނެ ކަމުގެ އުންމީދު އެބަ އޮތް ކަމަށް ތިމްޕޫ ސިޓީގެ ކޯޗު ޕީ ޝެރިންގް ބުނެފިއެވެ.

އޭއެފްސީ ކަޕް ކޮލިފިކޭޝަން ޕްރިމިނަރީ ބުރުގައި ވެލެންސިއާއާ ދެކޮޅަށް އަންގާރަ ދުވަހު ކުޅޭ މެޗުގެ ކުރިން ނޫސްވެރިންނާ ބައްދަލުކޮށް ވާހަކަ ދައްކަމުން ޝެރިންގް ބުނީ ފުރަތަމަ ލެގުގައި ކޮންމެ ނަތީޖާއެއް ނިކުތް ނަމަވެސް ދެވަނަ ލެގަށް އެޓީމުން ނިކުންނަނީ މޮޅުވާން ކަމަށާއި، މީގެ ކުރިން ރާއްޖެއާ ދެކޮޅަށް އަދި ރާއްޖޭގައި ވެސް ކުޅެފައިވާ ކުޅުންތެރިން އެބަ ތިބި ކަމަށެވެ.

ތިމްޕޫ ޓީމަށް މޫސުމުގެ މައްސަލަ ދިމާވެދާނެކަން ފާހަގަކުރަމުން ޝެރިންގް ބުނީ އެއީ ވެލެންސިއާ އަށް ލިބިގެންދާނެ އެޑްވާންޓޭޖަކަށް ވެގެން ހިނގައިދާނެ ކަމަށާއި، އެހެންނަމަވެސް ބޫޓާން ކުޅުންތެރިން ކިތަންމެ ފިނީގައި ކުޅުނު ނަމަވެސް ބޫޓާނުގައި އެޓީމު ކުޅުނީ ވަރަށް އުހުގައި ކަމަށެވެ. އެގޮތުން ރާއްޖެ އައުމުން ތިރި ގައުމަކަށް ވެފައި ނޭވާން ލާން ފަސޭހަވުމުން އެ ތަފާތު ވެސް ފެނިގެންދާނެ ކަމަށް އޭނާ ވަނީ ބުނެފައެވެ.

ޝެރިންގް ބުނީ ބޫޓާނުން އަންނަނީ ފުޓުބޯޅާގައި ރަނގަޅު ކުރިއެރުންތައް ހޯދަމުން ކަމަށާއި، އެގޮތުން އެންމެ ފަހުން ވެސް ރާއްޖެއާ ދެކޮޅަށް ބޫޓާނު ކުޅުނު މެޗުގައި ބޫޓާނުން ރަނގަޅު ފައިޓެއް ދީފައިވާ ކަމަށެވެ. މީގެ އިތުރުން އޭނާ ބުނީ ބޫޓާނުން ކުރިޔަށް އޮތްތަނުގައި މިހާރަށް ވުރެ ވެސް ރަނގަޅު ކުރާނެ ކަމަށެވެ.

ތިމްޕޫ އަދި ވެލެންސިއާ ބައްދަލުކުރާ މެޗު ފަށާނީ އަންގާރަ ދުވަހު ހަވީރު ހަތަރެއް ޖަހާއިރެވެ.