ވަކިން ހާއްސަކޮށް މޯހަން ބާގަން މެޗަށް ތައްޔާރެއް ނުވަން، ޓީމަށް އިތުބާރު އެބައޮތް: މާޒިޔާ ކޯޗު

ވަކިން ހާއްސަކޮށް މޯހަން ބާގަން މެޗަށް ތައްޔާރުނުވާ ކަމަށާއި، ޓީމަށް އިތުބާރު ކުރާ ކަމަށް މާޒިޔާ ސްޕޯޓްސް އެންޑް ރެކްރިއޭޝަންގެ ކޯޗު ސެކުލޮވްސްކީ ބުނެފި އެވެ.

އޭއެފްސީ ކަޕްގައި ބުދަ ދުވަހު މޯހަން ބާގަންއާ ދެކޮޅަށް ކުޅޭ މެޗުގެ ކުރިން ނޫސްވެރިންނަށް މައުލޫމާތު ދެމުން ސެކުލޮވްސްކީ ބުނީ މެޗު ކުޅުމަށް ކަލްކަތާ އަށް ޓީމަށް އާދެވުނީ އާދީއްތަ ދުވަހުގެ ރޭ ކަމަށާއި، ފަރިތަކުރުންތަކެއް ކުރިޔަށް ގެންގޮސްފައިވާ ކަމަށެވެ. އެހެންނަމަވެސް އޭނާ ބުނީ މެޗަށް އަމާޒުކޮށް ވަކިން ހާއްސަކޮށް ތައްޔާރުނުވާ ކަމަށެވެ.

މޯހަން ބާގަން އަކީ ވަރުގަދަ ޓީމެއްކަން ފާހަގަކުރަމުން ސެކުލޮވްސްކީ ބުނި އެޓީމުގައި ހިމެނޭ 20 ކުޅުންތެރިންނަކީވެސް ކޮލެޓީ ރަނގަޅު ކުޅުންތެރިން ކަމަށެވެ. މީގެއިތުރުން އޭނާ ބުނީ މޯހަން ބާގަން އިން ކުޅުންތެރިންނަށް ރެސްޓްދިނަސް އެއީ މާޒިޔާ ބަލާނެ ކަމެއް ނޫން ކަމަށާއި، މާޒިޔާ އިން މަސައްކަތްކުރާނީ މެޗު ކާމިޔާބުކުރަން ކަމަށެވެ.

ސެކުލޮވްސްކީ ބުނީ ދެޓީމަށްވެސް ވަރަށް ރަނގަޅަށް އިދިކޮޅު ޓީމު އެނގޭ ކަމަށާއި، އެއީ ދެޓީމަށްވެސް ލިބޭނެ ފައިދާއެއް ކަމަށެވެ. އެހެންނަމަވެސް މާޒިޔާ އިން ފޯކަސް ކުރާނީ މާޒިޔާގެ ކުޅުމަށް ކަމަށާއި، އަމިއްލަ ސްޓައިލްގައި ކުޅެވޭތޯ ކަމަށެވެ.

ނޫސްވެރިންނަށް މައުލޫމާތު ދެމުން މާޒިޔާގެ ކޯޗު އަސަދުﷲ އަބުﷲ (އަސައްކޮ) ބުނީ މިދިޔަ އަހަރު މޯހަން ބާގަން މާޒިޔާ އަށްވުރެ ވަރުގަދަ ކަމަށެވެ. އެހެންނަމަވެސް އޭނާ ބުނީ މި އަހަރު މާޒިޔާ މާބޮޑަށްވެސް ވަރުގަދަ ވާނެ ކަމަށާއި، މެޗު ކާމިޔާބުކޮށް ދެވަނަ ބުރުން ފުރުސަތު ތަނަވަސްކުރަން މަސައްކަތްކުރުމަކީ ވަރަށް މުހިންމު ކަމެއް ކަމަށެވެ.

އޭއެފްސީ ކަޕްގައި މާޒިޔާ ވަނީ އެޓީމު ކުޅުނު ދެ މެޗުގެ ތެރެއިން އެއް މެޗު ކާމިޔާބުކޮށްފައެވެ. އެހެންނަމަވެސް އަނެއް މެޗުން އެޓީމު ވަނީ ބަލިވެފައެވެ.

މާޒިޔާ ހިމެނޭ ގްރޫޕަށް ބަލާއިރު، ކުޅުނު ދެ މެޗުވެސް ކާމިޔާބުކޮށް ގްރޫޕްގެ އެއްވަނައިގައި އޮތީ ބެންގަލޫރު އެފްސީ އެވެ. ދެވަނައިގައި ތިން ޕޮއިންޓާއެކު މޯހަން ބާގަން އޮތް އިރު، ތިންވަނައިގައި ހަމަ އެ އަދަދަށް ޕޮއިންޓް ހޯދައިގެން އޮތީ މާޒިޔާއެވެ. ގްރޫޕްގެ ފުލުގައި ޕޮއިންޓެއް ނުލިބި އޮތީ ބަނގްލަދޭޝްގެ އަބާނީ ލިމިޓެޑް އެވެ.

ދެވަނަ ބުރަށް ކޮލިފައިވުމުގެ ފުރުސަތު އަދިވެސް މާޒިޔާ އަށް އޮތް އިރު، އެޓީމު ވަނީ ލީގުގައި އެންމެ ފަހުން ކުޅުނު މެޗު ނިއުރޭޑިއަންޓް ސްޕޯޓްސް ކްލަބާ ވާދަކޮށް މޮޅުވެފައެވެ. އެގޮތުން މިއީ މި މެޗާ ކުރިމަތިލާއިރު އެޓީމަށް ލިބޭނެ އިތުރު ހިތްވަރަކަށް ވާނެ ކަމަށް މާޒިޔާގެ ކޯޗު ވަނީ ބުނެފައެވެ.

މާޒިޔާއާ ދެކޮޅަށް ނިކުންނަ މޯހަން ބަގާން ވަނީ ޕްލޭއޮފްގައި ރާއްޖޭގެ ވެލެންސިއާއާ ދެކޮޅަށް ކުޅެފައެވެ. ފުރަތަމަ ލެގު ރާއްޖޭގައި ކުޅެ އެއްވަރުވިއިރު، ދެވަނަ ލެގުގައި ބޮޑު ތަފާތަކުން މޯހަން ބަގާން ވަނީ މޮޅުވެފައެވެ.