ޓީމު އޮތީ ތައްޔާރަށް، ހުރިހާ ވިސްނުމެއް ހުރީ ރާއްޖެއާ ދެކޮޅަށް ކުޅޭ މެޗަށް: ކިލިޗް

ކިރިގިސްތާން ވޮލީ ޓީމު އޮތީ މުބާރާތަށް ވާންޖެހޭ އެންމެ ފުރިހަމައަށް ތައްޔާރުވެފައި ކަމަށާއި ހުރިހާ ވިސްނުމެއް މިވަގުތު ހުރީ ރާއްޖެއާ ދެކޮޅަށް ކުޅޭ މުބާރާތުގެ ފުރަތަމަ މެޗަށް ކަމަށް އެޓީމުގެ ކެޕްޓަން ކިލިޗް ސަރްބަގިޝިއެވް ބުނެފި އެވެ.

ބުދަ ދުވަހު މާލޭގައި ފެށުމަށް ހަމަޖެހިފައިވާ އޭޝިއަން މެންސް ސެންޓްރަލް ޒޯން ވޮލީބޯލް ޗެމްޕިއަންޝިޕްގައި ވާދަކުރުމަށް ކިރިގިސްތާން ޓީމު ރާއްޖެ އައިސްފައި ވަނީ ހޯމަ ދުވަހުގެ ރެ އެވެ.

މުބާރާތުގެ ފުރަތަމަ މެޗުގައި ބުދަ ދުވަހު ހަވީރު ރާއްޖެއާ ދެކޮޅަށް ނުކުތުމުގެ ކުރިން އެޓީމުން ވަނީ އަންގާރަ ދުވަހު ފަރިތަކުރުންތައް ވެސް ކުރިއަށްގެންގޮސްފަ އެވެ.

ރާއްޖެއެމްވީ އަށް މައުލޫމާތު ދެމުން ކިރިގިސްތާން ވޮލީ ފެޑެރޭޝަންގެ ޖެނެރަލް ސެކްރެޓަރީގެ މަގާމު އަދާކުރަމުންދާ ކިލިޗް ބުނީ ދިގު ދަތުރެއް ކުރުމަށް ފަހު މިހާ ދުރަށް ޓީމެއް އަންނާނީ އެ މުބާރާތެއްގެ އެންމެ މައްޗަށް ދިއުމަށް ކަމަށާއި އެހެންކަމުން މުބާރާތުގެ ފުރަތަމަ މެޗުގައި އެޓީމުގެ ފަރާތުން ބަލާހިތްވާ ފަދަ ކުޅުމެއް ފެނިގެންދާނެ ކަމަށެވެ.

ކެލިޗް ބުނީ ރާއްޖޭގައި މެޗުތައް ކުޅޭ އިރު އެއީ ރާއްޖޭގެ ޓީމަށް ލިބިގެންދާނެ ވަރަށް ބޮޑު އެޑްވާންޓޭޖަކަށް ވާނެ ކަމަށާއި އެގޮތުން އަމިއްލަ ސަޕޯޓަރުންގެ ކުރިމަތީގައި ކުޅޭއިރު ކުޅުންތެރިންނަށް އެކަމުން ވަރަށް ބޮޑު ހިތްވަރެއް ލިބިގެންދާނެ ކަމަށެވެ.

ރާއްޖޭގެ ގައުމީ ޓީމަށް އަލިއަޅުވާލަމުން ކެލިޗް ބުނީ ރާއްޖެއަކީ އަބަދުވެސް މި މުބާރާތުގައި ފާހަގަކޮށްލެވޭ ފަދަ ހިސާބެއްގައި އަބަދުވެސް އޮންނަ ޓީމެއް ކަމަށާއި އެހެންކަމުން އެއީ ރާއްޖޭގެ ވޮލީބޯޅަ ކުރިއަރަމުން އަންނަ އަލިގަދަ ހެއްކެއް ކަމަށެވެ.

ރާއްޖޭގެ ޓީމުން ތައިލެންޑްގައި ކޭމްޕް ކޮށްފައިވާއިރު އެކަމާ ބެހޭ ގޮތުން ކެލިޗް ބުނީ މިފަދަ މުބާރާތަކަށް ތައްޔާރުވުމަށް ތައިލެންޑް ފަދަ ގައުމެއްގައި ތަމްރީނު ކުރުމަކީ ވަރަށް ބޮޑު ކުރިއެރުމެއް ލިބިގެންދާނެ ކަމެއް ކަމަށެވެ.

ރާއްޖެއަކީ ހޫނު ގަދަ ގައުމެއްކަން ފާހަގަކުރަމުން ކެލިޗް ބުނީ ކިރިގިސްތާނަކީ އަބަދުވެސް ފިނިކޮށް އޮންނަ ގައުމެއް ކަމަށާއި އެހެންކަމުން ރާއްޖެ ފަދަ ގައުމެއްގައި މި މުބާރާތް ކުޅޭއިރު ކޮންމެވެސް ވަރަކަށް ހޫނުގެ އަސަރު ކުޅުންތެރިންނަށް ކުރާނެ ކަމަށެވެ.

ކިރިގިސްތާނު ވޮލީ ޓީމަކީ ފާއިތުވި އަހަރު ބަންގްލަދޭޝްގައި ކުރިއަށްދިޔަ އޭވީސީ މުބާރާތުގެ ދެވަނަ މަގާމު ހޯދި ޓީމެވެ. އެ މުބާރާތަށް އެޓީމު ބަންގްލަދޭޝަށް އައީ 8 ކުޅުންތެރިންގެ ސްކޮޑަކާއެކު އެވެ. އެހެން ނަމަވެސް މިފަހަރު މި ޓީމު ރާއްޖެ އައީ 12 ކުޅުންތެރިންގެ ސްކޮޑަކާއެކު އެވެ.

ކިލިޗް ބުނީ ކުރިން މުބާރާތާ ހިލާފަށް މި މުބާރާތަށް ފުރިހަމަ ސްކޮޑަކާއެކު އާދެވުމުން އެކަމާ ވަރަށް ހިތްހަމަޖެހޭ ކަމަށާއި އެހެން ކަމުން މުބާރާތުގައި އެ ކުޅުންތެރިންގެ ފަރާތުން ތަފާތު ފެނިގެންދާނެ ކަމަށެވެ.