އިނގިރޭސިވިލާތުގެ ގާނޫނުހަދާ މަޖިލީހަށް ސައިބަރ ހަމަލާއެއް ދީފައިވާ ކަމަށް ވެސްޓްމިންސްޓަަރގެ އޮފިޝަލުން ވިދާޅުވެއްޖެއެވެ.

ދިގުދެމިގެންދިޔަ މި ހަމަލާ ދީފައި ވަނީ ހުކުރުދުވަހުގެ ރެއެވެ. މި ހަމަލާގައި މަސައްކަތްކޮށްފައި ވަނީ މަޖިލީހުގެ މެމްްބަރުންނަށް ދުރުގައި ތިއްބަވައިގެން އީމެއިލްއަށް ނުވަދެވޭނެހެން ހެދުމަށެވެ. އަދި މެއިލްތައް ބެލުމަށް މަަސައްކަތްކޮށްފައި ވެއެވެ.

ގާނޫނުހަދާ މަޖިލީހުގެ އިދާރާއިން ބުނީ ހެކަރުން  މަސައްކަތްކޮށްފައި ވަނީ ވަރުގަދަ އަޒުމެއްގައި ހުރިހާ ޔޫސަރ އެކައުންޓްތަކަށް ވަދެ ބަލިކަށި ޕާސްވޯޑްތައް ދެނެގަތުމަށް ކަމަށެވެ.

ސަރުކާރުގެ އިދާރަތަކުން ބުނީ ހަމަލާ ހުއްޓުވިފައިވާ ކަމަށާއި  ނަަމަވެސް އަދިވެސް އެ ހަމަލާއަށް ފާރަވެރިވަމުންދާ ކަމަށެވެ.

ގާނޫނު ހަދާ މަޖިލީހުގެ ތަރުޖަމާނު ވިދާޅުވީ ނޭޝަނަލް ސައިބަރ ސެކިއުރިޓީ ސެންޓަރާ ގުޅިގެން އެ ހަމަލާ ތަހުގީގު ކުރަމުން ދާކަމަށެވެ.

"އަޅުުގަނޑުމެންނަށް ފާހަަގަކުރެވުނީ ހުއްދަ ނެތް ފަރާތްތަކަކުން ގާނޫނުހަދާ މަޖިލީހުގެ ނެޓްވޯކް ޔޫސަރ އަށް ވަންނަން މަސައްކަތް ކުރި ކަން،" އެކަމަނާ ވިދާޅުވިއެވެ.

"މަޖިލީހުގައި ހުންނާނެ އަޅުގަނޑުމެންގެ ހުރިހާ އެކައުންޓްތަކާއި ސިސްޓަމްތައް އޭގެ ޒާތުގައި ރައްކާތެރިކޮށްދޭނެ ފިޔަވަޅުތަކެއް އެޅިފައި. އަދި އަޅުގަނޑުމެން މި ގެންދަނީ ކޮންމެހެން އަޅަން ޖެހޭ ފިޔަވަޅުތައް އަޅަމުން."

ރައްކާތެރިކަމުގެ ފިޔަވަޅެއްގެ ގޮތުން މިހާރުވަނީ ގާނޫނު ހަދާ މަޖިލީހުގެ ނެޓްވޯކަށް ދުރުގައި ތިބެ ނުވަދެވޭ  ގޮތަށް ވަގުތީ ގޮތުން އެކްސެސް ކަނޑާލާފައެވެ.

ގާނޫނު ހަދާ މަޖިލީހަށް ސައިބަރ ހަމަލާއެއް ދީފައި މިވަނީ އިނގިރޭސީވިލާތަށް ދިން ސައިބަރ ހަމަލާއެއްގައި އެގައުމުގެ ހޮސްޕިޓަލުތަކުގެ ޚިދުމަތްތަކަށް ބުރޫ އަރުވާލިތާ މަހެއް ވީތަނުންނެވެ.