އެމެރިކާގެ ރައީސް ޑޮަނަލްޑް ޓްރަމްޕްގެ އިމިގްރޭޝަން ގަރާރާ ދެކޮޅަށް އިގިރޭސިވިލާތުގައި މުޒާހަރާތައް ފަށައިފި އެވެ.
ލަންޑަން ފަދަ މައި ސިޓީތަކުގައި ކުރިއަށްދާ މުޒާހަރާތަކުގައި އެތަށް ހާސް ބަޔަކު ވަނީ ބައިވެރިވެ، ޓްރަމްޕާ ދެކޮޅަށް އަޑުއުފުލާފަ އެވެ. ލަންޑަންގައި ކުރި މުޒާހަރާ އޮތީ ބޮޑުވަޒީރުގެ ރަސްމީގެކޮޅު 10، ޑައުނިންގ ސްޓްރީޓްގަ އެވެ.
ބޮޑުވަޒީރު ތެރޭސާ މޭ ޓްރަމްޕާއެކު ގާތް ގުޅުމެއް ގާއިމްކުރެއްވުމަށް ކުރައްވާ މަސައްކަތްތަކަށް މުޒާހަރާގެ ބައިވެރިން ވަނީ ފާޑުކިޔާފަ އެވެ. އެގޮތުން، ޓްރަމްޕް ފަދަ ބޭފުޅަކާއެކު ގާތް ގުޅުންތަކެއް ބާއްވަން މަސައްކަތް ކުރުމަކީ ބޮޑުވަޒީރުގެ ހައިސިއްޔަތުން ކުރަން ހެޔޮވާވަރު ކަމެއް ނޫން ކަމަށާއި އެއީ ތަހުޒީބު ތަރައްގީވެފައިވާ ގައުމެއްގެ ވެރިއެއްގެ ކިބައިގައި ހުންނަން ޖެހޭ ސިފައެއް ނޫން ކަމަށް މުޒާހަރާގެ ބައިވެރިން ވަނީ ބުނެފަ އެވެ. އަދި، ޓްރަމްޕް އެގައުމަށް ކުރުމަށް ހަމަޖެހިފައިވާ ރަސްމީ ދަތުރުފުޅު ހުއްޓުވުމަށް ވެސް މުޒާހަރާގެ ބައިވެރިން ވަނީ ގޮވާލާފަ އެވެ.
