ގެމްބިއާ ވަރަށް އަވަހަަށް އަލުން ކޮމަންވެލްތާ ގުޅޭނެ: އިނގިރޭސި ޚާރިޖީ ވަޒީރު

ގެމްބިއާ އަލުން ވަރަށް އަވަހަށް ކޮމަންވެލްތާ ގުޅޭނެ ކަމަށް އިނގިރޭސި ޚާރިޖީ ވަޒީރު ބޮރިސް ޖޯންސަން ވިދާޅުވެއްޖެއެވެ.

ބޮރިސް ޖޯންސަން މިހެން ވިދާޅުވީ މިހާރު ގެމްބިއާއަށް ކުރައްވަމުން ގެންދަވާ ދަތުރުފުޅުގައި ގެމްބިއާގެ ރައީސް އަޑަމާ ބަރޯއާ ބައްދަލު ކުރެއްވުމަށް ފަހުގައެވެ. ބޮރިން ޖޯންސަން ވަނީ އިނގިރޭސިވިލާތުން ގެމްބިއާއަށް އެކިކަންކަމުގައި ދޭން ޖެހޭ ފުރިހަމަ އެއްބާރުލުން ދެއްވާނެ ކަމަށް ވައުދުވެވަޑައިގެންފައެވެ. އިނގިރޭސީން ނުފޫޒުފޯރުވަމުންދާ ވިދާޅުވެ ގެމްބިއާގެ ކުރީގެ ރައީސް ޔަހްޔާ ޖަމްމޭހް ކޮމަންވެލްތުން ގެމްބިއާ ވަކިކުރެއްވީ 2013 ވަނަ އަހަރުއެވެ.

މިދިޔަ އަހަރު، ކުރީގެ ރައީސް ޔަހްޔާ ޖަމްމޭހް ވަނީ ގެމްބިއާ އިންޓަނޭޝަނަލް ކްރިމިނަލް ކޯޓް (އައިސީސީ) އިން ވަކިވާނެ ކަމަށް ވިދާޅުވެފައެވެ. އެހެން ނަަމަވެސް އެކަން އެގޮތަށް ނުކުރައްވާނެ ކަމަށް މިހާރުގެ ރައީސް އަޑަމާ ބަރޯ ވަނީ ވިދާޅުވެފައެވެ.

ބޮރިސް ޖޯންސަން ގެމްބިއާއަށް ކުރައްވަމުން ގެންދަވާ ދަތުރުފުޅަކީ 1965 ވަނަ އަހަރު އިނގިރޭސީންގެ ކިބައިން ގެމްބިއާއަށް މިނިވަންކަން ލިބުނު ފަހުން އިނގިރޭސި ޚާރިޖީ ވަޒީރަކު ގެމްބިއާއަށް ވަޑައިގަންނަވާ ފުރަތަމަ ފަހަރެވެ.