އިނގިރޭސި ވިލާތުގެ ޕާލިމެންޓް އިމާރާތުގެ ކައިރީގައި ބުދަދުވަހު ދިން ހަމަލާގައި ފަސް މީހުން މަރުވެފައިވާ ކަމަށް އިނގިރޭސި ފުލުހުން ބުނެފިއެވެ.

މަރުވި މީހުންގެތެރޭގައި ހަމަލާ ދިން މީހާގެ އިތުރަށް ފުލުހަކުވެސް ހިމެނޭ އިރު މަދުވެގެން 40 މީހުން ޒަޚަމް ވެފައިވާ ކަމަށް "ލަންޑަން މެޓްރޮޕޮލިޓަން ޕޮލިސް" ގެ އިސްވެރިޔާ ވަނީ މީޑިއާތަކަށް ވިދާޅުވެފައެވެ.

މިހަމަލާ ދިން މީހާ ޕާލިމަންޓް އިމާރާތާ ދިމާލަށް އައީ އެގޮތް މިގޮތައް ދުއްވަމުން އައި އެއްގަމު އުޅަނދެއްގައެވެ. އައި މަގުމަތީގައި ވެހިކަލުން ޖެއްސުމުގެ ސަބަބުން އެތައް ބަޔަކަށް ވަނީ އެކި ވަރުގެ އަނިޔާ ލިބިފައެވެ. ވެހިކަލް އައިސް ހުއްޓުނީ ޕާލިމެންޓުގެ ބޭރު ފާރުގެ މަގައް އުޅަނދު އެރުމުންނެވެ. އެހިސާބުން އޭނާ ވެހިކަލުން ފައިބާ ފުލުހަކަށް ވަނީ ވަޅިން ހަމަލާ ދީފައެވެ. ވަޅިން ހަމަލާ ދީ މަރާލާފައިވާ ފުލުސް މީހާ އަކީ އުމުރުން 48 އަށް އަހަރުގެ ޕީސީ ކީތް ޕާމާ އެވެ.

މިހާދިސާ އާއި ގުޅިގެން އިނގިރޭސި ބޮޑުވަޒީރު ތެރީސާ މޭ ވިދާޅުވީ "މިއީ ވަރަށް ރަހުމްކުޑަ ލާއިންސާނީ ހަމަލާއެއް" ކަމަށެވެ. އަދި މިއީ ޑިމޮކްރަސީ އާއި އަދި ހިޔާލުފާޅުކުރުމުގެ އަސާސްތަކަށްވެސް ދެވުނު ހަމަލާއެއް ކަމަަށެވެ.

ހަމަލާ ދިން މީހާއަކީ ކާކުކަމެއް އަދި ރަސްމީ ކޮށް ފުލުހުން ހާމަ ނުކުރެއެވެ.

ހަމަލާގެ ހާދިސާ ހިނގި ވަގުތު އިނގިރޭސި ބޮޑު ވަޒީރު ތެރީސާ މޭ ހުންނެވީ ޕާލިމަންޓުގައެވެ. ނަމަވެސް ކުޑައިރުކޮޅެއްގެ ތެރޭގައި އެކަމަނާގެ ސެކިއުރިޓީން ވަނީ އެ އެކަމަނާ ރައްކާތެރި ހިސާބަކަށް ގެންގޮސްފައެވެ.

އިނގިރޭސި ވިލާތުގެ މެޓްރޮޕޮލިޓަން ފުލުހުން ހަމަލާ ދިން މީހާއާ ބެހޭގޮތުން ބުނެފައިވަނީ، އެމީހުން ނަށް އެއީ ކާކުކަން އެނގޭ ކަމަށާއި، އަދި އޭނާ ހަމަލާ ދިނުމަށް ހިތްވަރު ލިބުނީ ޓެރަރިސްޓް ޖަމާއަތްތަކުގެ ސަބަބުން ކަމަށެވެ.