މޭރީގެ މަރު: ހެކިބަސް ނެގުން ސިއްރެއް ނޫން، އަޑުއެހުން 31 ގައި
16 އޮކްޓޯބަރު 2022 | އާދީއްތަ 13:53ގްރޭސް މަރާލީ އޮކްޓޯބަރު 19، 2021 ގައި
މޭރީގެ މަރުގެ މައްސަލައިގައި ދައުލަތުން ދައުވާކުރަނީ މޭރީގެ ފިރިމީހާ ފިލިޕީންސްގެ ރައްޔިތެއްކަމަށްވާ މާރވިން އެސް.ވައި ވާރގަސްއާއި ޅ.ހިންނަވަރު، މާފިނި، ހަލީމަތު ލަމްޙާ އަބްދުއްރަހްމާނުގެ މައްޗަށް
އައިޖީއެމްއެޗްގައި މަސައްކަތް ކުރަމުން ދިޔަ ފިލިޕީންސްގެ އަންހެން ނަރުހެއް ކަމަށްވާ މޭރީ ގްރޭސް މަރުގެ މައްސަލައިގައި، އޭނާގެ ފިރިމީހާ މާވިން އެސްވައި ވާރގަސް އާއި އޭނާގެ ލޯބިވެރިޔާ ހަލީމަތު ލަމްހާގެ މައްޗަށް ހިންގާ ޝަރީއަތުގެ ހެކިބަސް ނެގުމުގެ މަރުހަލާ ސިއްރުކޮށްދޭން ލަމްހާގެ ފަރާތުން އެދުނު ނަމަވެސް، އެ މައްސަލަ ސިއްރުނުކޮށް ކުރިއަށް ގެންދަން ނިންމައިފިއެވެ.
ހެކިބަސް ނެގުމުގެ މަރުހަލާ ސިއްރުކޮށްދޭން ލަމްހާގެ ފަރާތުން ވަނީ އާދިއްތަ ދުވަހު އެދިފައެވެ. އެގޮތުން ލަމްހާގެ ވަކީލު އަހުމަދު ޔާމީން ވަނީ ޖިނާއީ އިޖުރާއަތުގެ ގާނޫނުގެ ދަށުން ހެކިބަސް ދިނުމުގެ މަރުހަލާ ސިއްރުކުރުމަށް އެދިފައެވެ. އޭނާ ވިދާޅުވީ އެ އަޑުއެހުން ސިއްރު ނުކޮށް ކުރިއަށް ގެންގޮސްފިނަމަ އަދުލުވެރިކަމަށް އަސަރު ކޮށްފާނެ ކަަމަށެވެ. މީގެ އިތުރުން ލަމްހާގެ ވަކީލް އަބްދުﷲ ޝާއިރު ވަނީ އަޑު އެހުމަށް ނޫސްވެރިން ވަދެ ތިބުމުން އެ މައްސަލަ ވަކި ގޮތަކަށް ކުރިއަށްދާ ކަމަށް ދައްކަން ނުވަތަ ނޫސްވެރިންނަށް ވަކި މެސެޖެއް ދޭން ދައުލަތުން މަސައްކަތް ކުރައްވާ ކަމަށް ވިދާޅުވެފައެވެ.
ހެކި ބަސް ނެގުމުގެ މަރުހަލާ މި މަހުގެ 31 ވަނަ ދުވަހު ފެށުމަށް ނިންމާފައި ވާއިރު މީގެ ކުރިން މި މަހުގެ 17 އާއި 20، 25 ގައި ބޭއްވުމަށް ތާވަލްކޮށްފައި އޮތް އަޑު އެހުންތައް ވަނީ ކެންސަލްކޮށްފައެވެ. މި މައްސަލައިގެ ހެކި ބަސް ނެގުމަށް މިއަދު ތާވަލް ކުރިއެވެ. އެހެންނަމަވެސް ދިފާއީ ވަކީލުން ވަނީ އެއް ހާޒިރެއްގައި އެ މަރުހަލާ ކުރިއަށް ގެންގޮސްދިނުމަށް މައްސަލަ ބައްލަވާ ގާޒީގެ އަރިހުން އެދިފައެވެ. އެކަމާއި ގުޅިގެން ދައުލަތުން ވަނީ ހެކިން ހާޒިރުކުރުމަށް ފަހު ހެކި ބަސް ނުނެގުމަކީ ހެކިންނަށް ދަތިވާ ކަމެއް ކަމަށް ވެސް ފާހަގަކުރައްވާފައެވެ.
ހެކިބަސް ސިއްރު ނުކުރަން ގާޒީ ނިންމެވީ ދެ ފަރާތުގެ ވާހަކަތައް އަޑު އެއްސެވުމަށް ފަހުގައެވެ.
މޭރީ މަރާލިކަމުގެ ދައުވާ ސާބިތުކުރަން މާވިންއާއި ލަމްހާ ގެ މައްޗަށް ސާބިތު ކުރުމަށް ދައުލަތުން ވަނީ ގިނަ ހެކިތަކެއް ހުށަހަޅާފައެވެ. އެގޮތުން ހުށަހަޅާފައިވާ ހެކިތަކުގެ ތެރޭގައި 74 ޝަފައީ ހެކިންނާއި 36 ކިތާބީ ހެކި ހިމެނެއެވެ. މޭރީ މަރާލުމުގައި ބައިވެރިވި ކަމުގެ ދައުވާގެ އިތުރުން އައިޖީއެމްއެޗްއިން ހުއްދަ ނަގައިގެން ނޫނީ އެ ހޮސްޕިޓަލުން ނުގެންދެވޭ ނުރައްކާތެރި ބޭސްތަކެއް ގެންދިޔަ މައްސަލައިގައި ލަމްހާގެ މައްޗަށް ދައުވާ އުފުލާފައިވެއެވެ.
ގްރޭސް މަރާލާފައި ވަނީ އޮކްޓޯބަރު 19، 2021ގައެވެ. ގްރޭސްގެ މަރުވެފައިވާ، ހަށިގަނޑު ހޮސްޕިޓަލަށް ގެންދިޔަ އިރު މާވިން ބުނީ އޭނާއަށް ގްރޭސް ފެނުނީ ދަންޖެހި އަމިއްލައަށް މަރުވެފައި ހުއްޓާ ކަމަށެވެ. އޭނާ މަރާލިކަން އެނގުނީ ފުލުހުންގެ ތަހުގީގާއި ގުޅިގެންނެވެ.
