މޭރީގެ މަރު: ދައުލަތުގެ ހެކިވެރިޔާ ބުނީ ލަމްހާއަކީ އޭނާ ލައިކްވާ މީހެއް ނޫންކަމަށް
ހެކިވެރިޔާ ކިޔާދިން ގޮތުގައި ޙާދިސާގެ މައުލޫމާތު ފުރަތަމަ އެނގުނީ ވައިބަރ މެދުވެރިކޮށް
މޭރީ ގްރޭސްގެ މަރުގެ މައްސަލާގައި ދައުވާ އުފުލާފައިވާ ހަލީމަތު ލަމްހާ
އައިޖީއެމްއެޗްގައި މަސައްކަތް ކުރަމުން ދިޔަ ފިލިޕީންސްގެ އަންހެން ނަރުހެއް ކަމަށްވާ މޭރީ ގްރޭސްގެ މަރުގެ މައްސަލައިގެ އަޑުއެހުމެއް ބުދަ ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.
މި އަޑުއެހުމުގައި ދައުލަތުގެ ހެއްކެއްގެ ގޮތުގައި ހާޒިރުވެ ހެކިބަސް ދީފައިވަނީ ޙާދިސާ ހިނގިއިރު އައިޖީއެމްއެޗްގެ އީއާރްގައި މަސައްކަތްކުރި މުވައްޒަފެކެވެ.
ހެކިވެރިޔާ ކިޔާދިން ގޮތުގައި ޙާދިސާގެ މައުލޫމާތު ފުރަތަމަ އެނގުނީ ވައިބަރ މެދުވެރިކޮށެވެ. އެގޮތުން އަމިއްލަ ނަފްސަށް ގެއްލުންދޭން މަސައްކަތް ކޮށްގެން މާވިންގެ އަންހެނުން ހޮސްޕިޓަލަށް ގެނައި ވާހަކަ ގްރޫޕުގައި ލިޔެފައި އޮތްކަން އޭނާ ފާހަގަކުރިއެވެ.
އޭނާ ބުނީ، އެ ޚަބަރު ލިބުނުއިރު އޭނާ ހުރީ ގޭގައި ކަމަށާއި، ޚަބަރު ލިބުމުން ހޮސްޕިޓަލަށް ދިޔައިރު އެތަނުގައި ގިނަ ބަޔަކު ތިބި ކަމަށެވެ.
އެ ގަޑީގައި މާވިންއާ ވާހަކަ ދެކެވުނު ކަމަށާއި، އޭރު މާވިން ރުއިކަމަށް ހެކިވެރިޔާ ބުންޏެވެ. ނަމަވެސް މާވިންއާ އެވަގުތު ދެކެވުނު ވާހަކަ މިހާރު ހަނދާނުގައި ނެތްކަން ހެކިވެރިޔާ ފާހަގަކުރިއެވެ.
މޭރީގެ ހަށިގަނޑުން ފާހަގަވި ކަންކަމާ ގުޅޭގޮތުން ސުވާލު ކުރުމުން ހެކިވެރިޔާ ބުނީ، މޭރީގެ މޫނުމަތި ނޫވެފައިވާ ކަމަށާއި، ފައިގައި ވަކި އަޅާފައިވާ ކަމުގެ ނިޝާން ފެންނަން ހުރިކަމަށެވެ.
އަދި، ދަން ޖެހިފައިވާ މީހެއްގެ ގައިން ފެންނާނެ ފަދަ އެއްވެސް ނިޝާނެއް މޭރީގެ ކަރުން ފެންނަން ނެތްކަމަށް ހެކިވެރިޔާ ބުންޏެވެ.
ހެކިވެރިޔާ ކިޔާދިން ގޮތުގައި މޭރީގެ މަރާ ގުޅޭގޮތުން މާވިންގެ ވާހަކަ ދެފަހަރު ހުރީ ދެގޮތަށެވެ. އެގޮތުން މާވިން ފުރަތަމަ ކިޔާދިން އިރު ބުނެފައިވަނީ މޭރީ ދަން ޖެހުނީ ފަންކާ ބޭނުންކޮށްގެން ކަމަށެވެ. ނަމަވެސް ފަހުން ކިޔާދިން އިރު މާވިން ބުނެފައިވަނީ މޭރީ ދަން ޖެހުނީ ކުޑަދޮރު ބޭނުންކޮށްގެންނެވެ.
ހެކިވެރިޔާ މާވިން ގާތުގައި އެކަން ފާހަގަކުރި ކަމަށާއި، އެކަމާ ސުވާލު ކުރުމުން އޭނާ އެކަނި ދޫކޮށްލުމަށް މާވިން އެދުނުކަމަށްވެސް ހެކިވެރިޔާ ބުންޏެވެ.
ދެން ކުރިއަށް ދިޔައީ ދިފާއުން ސުވާލު ކުރުމެވެ. އެގޮތުން މާވިންގެ ދިފާއީ ވަކީލު ވަނީ ދަން ޖެހިފައި ހުންނަ މީހެއްގެ ގައިން ފެންނާނެ ސިފަތަކާ ގުޅޭގޮތުން ސުވާލު ކުރައްވާފައެވެ. އޭގެ ޖަވާބުގައި ހެކިވެރިޔާ ވަނީ މޭރީގެ މޫނު ނޫކުލަ އަރާފައި ހުރިކަން ފާހަގަކޮށް، އެއީ ދަން ޖެހިފައި ހުންނަ މީހެއްގެ ގައިން ފެނިދާނެ ނިޝާނެއްކަމަށް ބުނެފައެވެ.
އެހެންނަަމަވެސް މޭރީގެ ކަރުން އެފަދަ އެއްވެސް ނިޝާނެއް ފެންނަން ނެތްކަމަށް ހެކިވެރިޔާ ބުނެއެވެ.
މޭރީގެ މަރާ ގުޅިގެން ލަމްހާ ގިނަ ސުވާލުތަކެއް ހެކިވެރިޔާއާވެސް ކުރި ކަަމަށާއި، މާވިން ސަލާމަތް ކޮށްދޭނީ ތިމަންނާކަމަށް ލަމްހާ އަމިއްލައަށް ބުނެފައިވާކަމަށްވެސް އެ ހެކިވެރިޔާ ބުންޏެވެ.
މި އަޑުއެހުމުގައި ހެކިވެރިޔާ ވަނީ ލަމްހާއަކީ އޭނާ އެއްވެސް އިރަކު "ލައިކްވާ މީހެއް ނޫން" ކަމަށް ބުނެ، އޭނާ ލަމްހާއާ ދޭތެރޭގައި ހިތް ނުރުހޭކަމަށް ދޭހަވާ މޭރުމުން ވާހަކަ ދައްކާފައެވެ. ލަމްހާގެ ދިފާއީ ވަކީލު ހެކިވެރިޔާއާ އެއްވެސް ސުވާލެއްވެސް ކޮށްފައެއް ނުވެއެވެ.
މި އަޑުއެހުމުގައި އަދިވެސް އިތުރު ހެކިންގެ ހެކިބަސް ނެގުމަށް ތާވަލު ކުރެވިފައި އޮތެވެ.
