މޭރީ ގްރޭސްގެ މަރުގެ މައްސަލާގައި، އޭނާގެ ފިރިމީހާ މާވިން އެސް.ވައި ވާރގަސްއާއި އޭނާގެ ލޯބިވެރިޔާ ހަލީމަތު ލަމްހާގެ މައްޗަށް ހިންގާ ޝަރީއަތުގެ، ހެކިބަސް ނެގުމުގެ އިތުރު އަޑުއެހުމެއް ބުދަ ދުވަހުވެސް ކްރިމިނަލް ކޯޓުގައި ކުރިއަށްގެންގޮސްފިއެވެ.

މި މައްސަލާގައި ބުދަ ދުވަހު ކުރިއަށް ދިޔަ އަޑުއެހުމުގައި 3 ހެތްކެއްގެ ހެކިބަސް ނަގާފައިވެއެވެ.

ފުރަތަމަ ހާޒިރުކުރީ މޭރީ އައިޖީއެމްއެޗަށް ގެންދިއުމުން ފުރަތަމަ ހަށިގަނޑަށް އެޓެންޑުވި ޑޮކްޓަރުންގެ ތެރެއިން ޑޮކްޓަރެކެވެ. ހެކިވެރިޔާ ބުނީ، މޭރީ ގްރޭސްގެ ހަށިގަނޑު ގެނައިއިރުވެސް އެއްވެސް ހަރަކާތެއް ނެތްކަމަށާއި، މޫނު މައްޗަށް ހުރީ ދަނބުކުލަ އަރާފައި ކަމަށެވެ.

މޭރީގެ ހަށިގަނޑުން ދަންޖެހިފައި ވާކަމުގެ ނިޝާނެއް އޭރު ފެންނަން ނެތްކަމަށް ހެކިވެރިޔާ ބުންޏެވެ.

ހެކިވެރިޔާ ބުނީ، އޭރު މޭރީއަށް ދިން ފަރުވާތައް ނޯޓުކުރިކަމަށާއި، އެ ތަފްސީލުތައް ފެންނަން ހުންނާނެކަމަށެވެ.

އޭގެ އިތުރުން، އީއާރްގައި ހުންނަ ބޭސްތަކުގެ ސްޓޮކް ބަލަހައްޓާނީ އެކަމާ ހަވާލުވެ ހުންނަ އިންޗާރޖް ނަރުހެއް ކަމަށާއި، ކޮންމެ ނަރުހަކަށްވެސް އައިސް ބޭސް ނަގައިގެން ދެވޭކަހަލަ ގޮތަކަށް އޮތްނަމަވެސް، ހުއްދަ ނުނަގައި ބޭސް ގެންދިއުމަކީ މަނާ ކަމެއްކަމަށް އެ ހެކިވެރިޔާ ހެކިބަސް ދެމުން ބުނެފައިވެއެވެ.

ދެވަނައަށްވެސް ހާޒިރުކުރީ މޭރީގެ ހަށިގަނޑަށް އެޓެންޑުވި ޑޮކްޓަރެކެވެ. އޭނާ ވަނީ މޭރީ ނޭވާލެއްވުމަށް ހޮޅި ލެއްވިކަމާއި، އިތުރަށް ދެވިފައިވާ ފަރުވާތައް ކިޔައިދީފައެވެ. އެގޮތުން މޭރީއަށް "ޝޮކް" ދެވިފައިވާކަމަށާއި، އެހެންނަމަވެސް "ސަކްސިނައިލްކޮލިން" ފަދަ އިންޖެކްޝަނެއް ޖަހާފައި ނުވާނެކަމަށް ހެކިވެރިޔާ ބުނެފައިވެއެވެ.

އޭގެ އިތުރުން، އީއާރްގައި ހުންނަ ބޭސްތަކުގެ ސްޓޮކް ބަލަހައްޓާ އިންޗާރޖް އަތުގައި ތަޅުދަނޑި އޮންނަކަމަށާއި، ހުއްދަ ނެތި ބޭސް ނެގުމަކީ މަނާކަމެއް ކަމަށްވެސް އެ ހެކިވެރިޔާ ހެކިބަސް ދެމުން ބުނެފައިވެއެވެ.

ލަމްހާގެ ގެ ބަލައިފާސްކުރިއިރު ފެނިފައިވާ 3 އިންޖެކްޝަންގެ ތެރޭގައި ސަކްސިނައިލްކޮލިން ހިމެނޭ އިންޖެކްޝަނެއް ހިމެނޭއިރު، އެ އިންޖެކްޝަންތަކަކީ މީހުން ހޭނައްތަން ބޭނުންކުރާ، އަދި މީހަކު މަރައިލެވިދާނެފަދަ އިންޖެކްޝަނެއްކަން ދައުލަތުން މީގެ ކުރިން ބުނެފައިވެއެވެ. އެގޮތުން މޭރީގެ ހަށިގަނޑުންވެސް އިންޖެކްޝަން ޖަހާފައިވާކަމުގެ ނިޝާން ފެންނަން ހުރިކަމަށް ދައުލަތުގެ ވަކީލު މީގެ ކުރިން ވިދާޅުވިއެވެ.

ދައުލަތުން ވަނީ "ސަކްސިނައިލްކޮލިން" އާއި ދެން ފެނިފައިވާ "ޕްރޮޕޮފޯލް" އެއްކޮށް ދިރިހުރި މީހެއްގެ ގަޔަށް ޖަހައިފިނަމަ ވާނެ ގޮތަކާ ގުޅޭގޮތުން ސުވާލުކޮށްފައެވެ. އެ ސުވާލުގެ ޖަވާބު ދެމުން ހެކިވެރިޔާ ބުނީ، އެ ދެ އިންޖެކްޝަން އެއްކޮށް ޖަހައިފިނަމަ މީހާ ހޭނެތި، ކުޑަ ވަގުތުކޮޅަކަށް ނޭވާލުން ހުއްޓޭނެކަމަށެވެ.

ތިންވަނައަށް ހާޒިރުކުރީ މި މައްސަލައިގެ ތަހުގީގު އޮފިސަރެކެވެ. އޭނާ ވަނީ މޭރީގެ މަރާ ގުޅޭގޮތުން މާވިން ކިޔާދީފައިވާ ވާހަކަތައް ޝަރީއަތުގައި ހިއްސާކޮށްފައެވެ. އެގޮތުން މޭރީ މަރުވީ އަމިއްލައަށް ދަން ޖެހިގެންކަމަށް މާވިންގެ ފަރާތުން މީގެ ކުރިންވެސް ބުނެފައިވާ ވާހަކަތައް ހެކިވެރިޔާ ވަނީ ކިޔައިދީފައެވެ.

ހެކިވެރިޔާ ބުނީ، މޭރީ މަރުވެފައި އޮތް ތަނުގައި ސިރިންޖެއް ކަނޑާލާފައި އޮތް ޕެކޭޖެއް އޮތްކަމަށާއި، އެއީ އެމްބިއުލާންސުން އައި ޕެރަމެޑިކުން ގެނައި އެއްޗެއްކަމަށް މާވިން ބުނެފައިވާ މކަމަށެވެ.

މި މައްސަލާގައި އަދިވެސް އިތުރު ހެކިންގެ ހެކިބަސް ނެގުމަށް ހަމަޖެހިފައިވާއިރު، ޖޫން މަހުވެސް އަޑުއެހުންތައް ކުރިއަށް ގެންދަވާނެކަމަށް ގާޒީ ހުސައިން ފާއިޒު ރަޝާދު ވިދާޅުވިއެވެ.