މޭރީ ގްރޭސްގެ މަރު: އިތުރު 3 ހެއްކެއްގެ ހެކިބަސް ނަގައިފި
ލަމްހާގެ ފަރާތުން އޭނާގެ ވަކީލު ވަނީ ލަމްހާގެ ފައިގައި ޓެގް އެޅުވުމަށްފަހު، އޭނާގެ ބަންދަށް ޝަރުތުތަކާއެކު ލުއި ދިނުމަށް އެދިލައްވާފައި
މޭރީ ގްރޭސްގެ މަރުގެ މައްސަލައިގައި ދައުވާ އުފުލާފައިވާ އޭނާގެ ފިރިމީހާ މާވިން އަދި މާވިންގެ ލޯބިވެރިޔާ ލަމްހާ
އައިޖީއެމްއެޗްގައި މަސައްކަތް ކުރަމުން ދިޔަ ފިލިޕީންސްގެ އަންހެން ނަރުހެއް ކަމަށްވާ މޭރީ ގްރޭސް އޮނޮޑް ޕިނެޑާގެ މަރުގެ މައްސަލައިގައި ދައުވާ އުފުލާފައިވާ އޭނާގެ ފިރިމީހާ މާވިން އެސްވައި ވާރގަސް އާއި އޭނާގެ ލޯބިވެރިޔާ ހަލީމަތު ލަމްހާގެ މައްޗަށް ހިންގާ ޝަރީއަތުގެ އަޑުއެހުމެއް އަންގާރަ ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.
މި އަޑުއެހުމުގައި އޮތީ ދައުލަތުގެ ހެކިންގެ ހެކިބަސް ނެގުމެވެ.
ފުރަތަމަ ހާޒިރުކުރި ހެކިވެރިޔާއަކީ މާވިންއާއި ލަމްހާއާއެކުގައި މަސައްކަތް ކުރި ފަރާތެކެވެ.
ހެކިވެރިޔާ ވަނީ މޭރީ ގްރޭސް މަރުވި ދުވަހު ހޮސްޕިޓަލުގައި ހިނގާދިޔަ ބައެއް ކަންކަން ކިޔާދީފައެވެ. އެގޮތުން މޭރީ ހޮސްޕިޓަލަށް ގެނެވުނު ދުވަހު މާވިންއާއި ބައްދަލުވި ކަމަށާއި، ހާދިސާ ހިނގާ ދިޔަ ގޮތާއި ގުޅޭގޮތުން އެ ދުވަހު މާވިންއާ ވާހަކަ ދެކެވުނުކަމަށް ހެކިވެރިޔާ ބުންޏެވެ.
ހެކިވެރިޔާ ބުނީ، މޭރީ އަމިއްލައަށް ދަން ޖެހުނީކަމަށް މާވިން ބުނި ކަމަށެވެ. އަދި އެކަމާ ގުޅޭގޮތުން އިތުރަށް ސުވާލު ކުރުމުން އެކަށީގެންވާ ޖަވާބުތަކެއް ލިބިފައިނުވާކަމަށްވެސް ބުންޏެވެ.
ހެކިވެރިޔާ ގާތުގައި މާވިން ބުނެފައިވަނީ މޭރީ ރުޅިއައިސްގެން އުޅުމުން، ހަމަޖެހިލުމަށް ވަގުތު ދިނުމަށް ތިރިއަށް ދިޔަކަމަށާއި، ފަހުން މައްޗަށް އެރިއިރު މޭރީ ހުރީ ދަންޖެހިފައިކަމަށެވެ.
ހެކިވެރިޔާ ބުނީ، މާވިންގެ ހަށިގަނޑުގައި މަށައިގެން ގޮސްފައިވާ ތަންތަން ހުރުމުން މާވިންއާ ސުވާލު ކުރި ކަމަށާއި، އެއީ މޭރީ ވަކި އަޅާފައިވާ ތަންތަންކަމަށް އޭރު މާވިން ބުނިކަމަށެވެ.
އަދި ދަން ޖެހުނުތާ ގިނަ ވަގުތުތަކެއް ހޭދަނުވެ މޭރީ ހޮސްޕިޓަލަށް ގެނެވިފައިވާކަމަށް މާވިން ބުނެފައިވާ ކަމަށާއި، އެ ވަގުތުގައި ގެނެވިފައިވާނަމަ މޭރީގެ ފުރާނަ ސަލާމަތް ކުރުމަށް މަސައްކަތް ކުރެވުނީސްކަމަށް ޤަބޫލު ކުރެވޭ ކަމަށްވެސް ހެކިވެރިޔާ ބުންޏެވެ.
ދެވަނައަށް ހާޒިރުކުރި ހެކިވެރިޔާއަކީ ދިވެހި ފުލުހުންގެ ޚިދުމަތުގެ ސީން އޮފް ކްރައިމް އޮފިސަރސް ރިޕޯޓަކާއި ގުޅިގެން ދައުލަތުން ހާޒިރުކުރި ހެއްކެކެވެ. އޭނާއަކީ ލަމްހާގެ ގެއިން ގެންދެވުނު ބޭސްތަކުގެ ތަފްސީލީ ފޮޓޯ ނަގައި، އެއާގުޅޭ ރިޕޯޓު ތައްޔާރު ކުރެއްވި އޮފިސަރެވެ.
ތިންވަނައަށް ހާޒިރުކުރި ހެކިވެރިއަކީވެސް ދިވެހި ފުލުހުންގެ ޚިދުމަތުގެ ސީން އޮފް ކްރައިމް އޮފިސަރސް ރިޕޯޓަކާއި ގުޅިގެން ދައުލަތުން ހާޒިރުކުރި ހެއްކެކެވެ. އޭނާއަކީ މި މައްސަލައިގައި ހެކީގެ ގޮތުގައި ނަގާފައިވާ ފޯނެއްގައި ހުރި ވައިބަރ މެސެޖުތަކެއްގެ ފޮޓޯތަކެއް ނަގާފައިވާ މީހެކެވެ. އެއީ "އީއާރް މޯލްޑިވްސް" ނަމުގައި ހަދާފައިވާ ވައިބަރ ގްރޫޕެއްގެ ފޮޓޯތަކެކެވެ.
ބަންދު މުރާޖައާ:
މި އަޑުއެހުމުގައި ދައުލަތުން ވަނީ ލަމްހާއާއި މާވިން ބަންދުން ދޫކޮށްލަން ޖެހޭ ސަބަބެއް އޮތްކަމަށް ދައުލަތަށް ނުފެންނަކަމަށް ބަޔާން ކުރައްވާފައެވެ. އެގޮތުން އެމީހުން ޝަރީއަތް ނިމެންދެން ބަންދުކުރަން ނިންމި ޙާލަތަށް ބަދަލެއް އައިސްފައިނުވާކަން ދައުލަތުން ފާހަގަކޮށްފައިވެއެވެ.
މި އަޑުއެހުމުގައި މާވިންގެ ވަކީލު ވިދާޅުވީ، މާވިންގެ ސިއްޙީ ހާލަތަށް ބަލައި، އޭނާ މާފުށީގައި ހުރެގެން އޮންލައިންކޮށް ޝަރީއަތުގައި ބައިވެރިވުމުގެ ފުރުސަތު ދެއްވުމަށް އެދިލައްވާކަމަށެވެ.
އަދި ލަމްހާގެ ފަރާތުން އޭނާގެ ވަކީލު ވަނީ ލަމްހާގެ ފައިގައި ޓެގް އެޅުވުމަށްފަހު، އޭނާގެ ބަންދަށް ޝަރުތުތަކާއެކު ލުއި ދިނުމަށް އެދިލައްވާފައެވެ.
ބަންދު މުރާޖައާއާއިގުޅޭގޮތުން ދެފަރާތުން ދެއްކެވި ވާހަކަތަކަށް ރިއާޔަތް ކުރައްވައި މައްސަލަ ބައްލަވާ ގާޒީ ހުސައިން ފާއިޒް ރަޝާދު ވިދާޅުވީ، މިމަހުގެ 23 ވަނަ ދުވަހު އޮންނަ އަޑުއެހުމުގައި ބަންދު މުރާޖައާއާއި ގުޅޭގޮތުން ނިންމަވާ ނިންމެވުން ހާމަ ކުރައްވާނެކަމަށެވެ.
