މާވިންގެ ބަންދަށް ލުޔެއް ނުދިން
23 ނޮވެމްބަރު 2023 | ބުރާސްފަތި 08:29މި މައްސަލައިގައި އުފުލާފައިވާ ދައުވާތައް ތަފާތުކަމަށް ގާޒީ ވިދާޅުވި
މޭރީގެ ފިރިމީހާ ފިލިޕީންސްގެ ރައްޔިތެއްކަމަށްވާ މާރވިން އެސް.ވައި ވާރގަސް
އައިޖީއެމްއެޗްގައި މަސައްކަތް ކުރަމުން ދިޔަ ފިލިޕީންސްގެ އަންހެން ނަރުހެއް ކަމަށްވާ މޭރީ ގްރޭސްގެ މަރުގެ މައްސަލައިގައި ދައުވާ އުފުލާފައިވާ އޭނާގެ ފިރިމީހާ މާވިން އެސްވައި ވާރގަސްގެ ބަންދަށް ލުޔެއް ދެވެން ނެތްކަމަށް ކްރިމިނަލް ކޯޓުން ނިންމައިފިއެވެ.
ބުރާސްފަތި ދުވަހު ކްރިމިނަލް ކޯޓުގައި ކުރިއަށް ދިޔަ އަޑުއެހުމުގައި ދައުލަތުގެ ވަކީލު ވިދާޅުވީ، މާވިން ބަންދުކޮށްފައި ހުރި ޙާލަތަށް ބަދަލެއް އައިސްފައިނުވާތީ، އޭނާ ޝަރީއަތް ނިމެންދެން ބަންދުކޮށްފައި ހުރި ހުރުމަށް ބަދަލެއް އަންނަންޖެހޭ ތަނެއް ނެތްކަމަށެވެ.
މި މައްސަލައިގައި ދައުވާލިބޭ ލަމްހާ ޝަރުތުތަކާއެކު ބަންދުންދޫކޮށްލާފައިވާއިރު،މާވިންގެ ވަކީލު ވަނީ ޤާނޫނުން ލިބިދޭ މަންފާތައް ހަމަހަމަކަމާއެކު ފޯރުކޮށްދީ، މާވިންގެ ބަންދަށްވެސް ލުއިތަކެއް ދިނުމަށް އެދިފައެވެ. އެގޮތުން ރާއްޖެއިން ބޭރަށް ފުރުން މަނާކޮށް، ޝަރުތުތަކެއް ކުރެވިދާނެކަމަށް ދިފާއީ ވަކީލު ވިދާޅުވިއެވެ.
އަދި މާވިންގެ މަންމައަކީ މިހާރުވެސް ރާއްޖޭގައި ހުރި ފަރާތަކަށްވާއިރު، މާވިންގެ މަންމަ ޖާމިނު ކުރުމަށްފަހު އޭނާގެ ބަންދަށް ލުޔެއް ދިނުމަށް ވަކީލު އެދިވަޑައިގެންނެވިއެވެ.
އެހެންނަމަވެސް ގާޒީ ނިންމެވީ މާވިންގެ ބަންދަށް ލުއިދެވެން ނެތްކަމަށެވެ. ސަބަބަކީ މި މައްސަލައިގައި އުފުލާފައިވާ ދައުވާތައް ތަފާތުވުމާއި، ހެކިބަސް ނެގުންވެސް ނިމިފައިނުވާތީކަން ގާޒީ ފާހަގަ ކުރެއްވިއެވެ.
