ލަމްހާ ބަންދުން ދޫކޮށްލީ ރަނގަޅަކަށް ނޫން، އަލުން ޝަރީއަތް ނިމެންދެން ބަންދަށް
20 ޑިސެމްބަރު 2023 | ބުދަ 09:16ދަށު ކޯޓުގެ މައްސަލަ ބައްލަވާ ގާޒީ ވަނީ ޝަރުތުތަކާއެކު ލަމްހާ ބަންދުން ދޫކޮށްލެއްވުމަށް ނިންމަވާފައި
ހަލީމަތު ލަމްހާ އަބްދުއްރަހްމާނު
އައިޖީއެމްއެޗްގައި މަސައްކަތް ކުރަމުން ދިޔަ ފިލިޕީންސްގެ އަންހެން ނަރުހެއް ކަމަށްވާ މޭރީ ގްރޭސްގެ މަރުގެ މައްސަލާގައި ދައުވާ އުފުލާފައިވާ ހަލީމަތު ލަމްހާ ބަންދުން ދޫކޮށްލި މައްސަލަ ހައިކޯޓުގައި އިސްތިއުނާފުކޮށްފައި ވާއިރު، ބުދަ ދުވަހު އެ މައްސަލައިގެ ޙުކުމްކޮށްފިއެވެ.
ދައުލަތުން ހުށައަޅާފައިވާ އިސްތިއުނާފީ ނުކުތާއަކީ، ކްރިމިނަލް ކޯޓުން ލަމްހާ ޝަރުތުތަކާއެކު ބަންދުން ދޫކޮށްލުމަށް ނެރުނު އަމުރަކީ ދިވެހިރާއްޖޭގެ ޖުމްހޫރިއްޔާގެ ގާނޫނުއަސާސީގެ 49 ވަނަ މާއްދާއާއި، ޖިނާއީ އިޖުރާއަތުގެ ގާނޫނުގެ 60 ވަނަ މާއްދާގެ (ށ) އަދި އެ ގާނޫނުގެ 59 ވަނަ މާއްދާއާއި، ޝަރީއަތް ކުރުމާބެހޭ ޖިނާއީ އިޖުރާއަތުގެ ގަވާއިދުގެ 13 ވަނަ މާއްދާގެ (ނ)، އަދި ގާނޫނުއަސާސީގެ މާއްދާތަކަކާ ޚިލާފު އަމުރެއްކަމަށެވެ.
ދައުލަތުގެ ވަކީލު ވިދާޅުވީ، ލަމްހާގެ ބަންދު މުރާޖައާކުރަން އެދުނުއިރުވެސް، އޭނާ ބަންދުގައި ބެހެއްޓި ސަބަބަށް ބަދަލެއް އައިސްފައިނުވާކަން ދައުލަތުން ފާހަގަކޮށްފައި ވާނެކަމަށެވެ. އެގޮތުން ކުށް ކުރިކަމަށް އެކަށީގެންވާ ތުހުމަތެއް ކުރެވޭ މިންވަރަށް ހެކި ހުރިކަމަށް ކުރިން ނިންމާފައި އޮތް ހާލަތަށް ބަދަލެއް އައިސްފައި ނުވާކަމަށް ދައުލަތުގެ ވަކީލު ވިދާޅުވިއެވެ.
އަދި ތުހުމަތުކުރެވޭ ކުށުގެ އަމަލު ހިންގުމުގައި ލަމްހާ ބައިވެރިވިކަމަށް ބެލެވޭ ގޮތަށްވެސް ދަށު ކޯޓުގެ ނިންމުމުގައި އަލިއަޅުވާލާފައިވާއިރު، އެ އަމަލުގައި ލަމްހާގެ ބައިވެރިވުމެއް މަތީ ދަރަޖައެއްގެ ބޮޑު މިންވަރަކަށް އޮތްކަމަކަށް ނުބެލެވޭކަމަށް ދަށު ކޯޓުން ވަނީ ނިންމާފައެވެ.
ހައިކޯޓުގައި މި މައްސަލަ ބެއްލެވި ފަނޑިޔާރުން ވަނީ ލަމްހާ ބަންދުން ދޫކޮށްލަން ނިންމި ނިންމުން ރަނގަޅު ނޫންކަމަށް ބަޔާން ކުރައްވާފައެވެ. އެގޮތުން ލަމްޙާގެ ބަންދަށް ލުއި ދިނުމަށް ކްރިމިނަލް ކޯޓުގެ ފަނޑިޔާރު ނިންމުމުގައި، އޭނާގެ ފުށުން މުޖުމަޢަށް ނުރައްކާ އޮތް ކަމަށް ބެލުނު ސަބަބު ސީދާ އޭނާގެ ފުށުން ނެތިގޮސްފައިވޭތޯ ބަލައި ވަޒަންކޮށްފައި އޮތްކަން އެނގެން ނެތްކަމަށްވެސް ވަނީ ނިންމަވާފައެވެ.
އަދި ލަމްޙާއަށް މި މައްސަލާގައި ޙުކުމެއް ކުރެވެންދެން ނުވަތަ ޝަރީޢަތުން ވަކި ގޮތެއް ކަނޑައަޅަންދެން ބަންދުގައި ބެހެއްޓުމަށް ކޮށްފައިވާ އަމުރު ދެމިއޮތްކަމަށްވެސް ފަނޑިޔާރުންގެ އިއްތިފާޤުން ވަނީ ނިންމަވާފައެވެ.
ހައިކޯޓުގައި މި މައްސަލަ ނިންމެވީ އިސް ފަނޑިޔާރު ހުސައިން ޝަހީދު، ފަނޑިޔާރު ޙަސަން ޝަފީއު އަދި ފަނޑިޔާރު މުޙައްމަދު ޝަނީޒް އަބްދުﷲ އެވެ.
