އައިޖީއެމްއެޗްގައި މަސައްކަތް ކުރަމުން ދިޔަ ފިލިޕީންސްގެ އަންހެން ނަރުހެއް ކަމަށްވާ މޭރީ ގްރޭސްގެ މަރުގެ މައްސަލައިގެ އަޑުއެހުމެއް ބުރާސްފަތި ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.

މި މައްސަލައިގައި މޭރީ ގްރޭސްގެ ފިރިމީހާ މާވިން އެސްވައި ވާރގަސް އާއި އޭނާގެ ލޯބިވެރިޔާ ހަލީމަތު ލަމްހާގެ މައްޗަށް ދައުވާ އުފުލާފައިވާއިރު، ބުރާސްފަތި ދުވަހު ކުރިއަށްދިޔައީ ލަމްހާގެ މައްޗަށް ކުރާ ދައުވާގެ އަޑުއެހުމެކެވެ. ސަބަބަކީ މާވިންގެ ވަކީލު އެހެން މައްސަލައެއްގައި ހުންނެވުމުން ބައިވެރިނުވެވޭތީއެވެ.

މި އަޑުއެހުމުގައި ދައުލަތުގެ ވަކީލު ވަނީ ދައުލަތުގެ ބައެއް ހެކިން ހާޒިރުކުރުމަށް އަދި އިތުރު ވަގުތު ބޭނުންވާކަމަށް ވިދާޅުވެފައެވެ. އެގޮތުން 15 ދުވަހުގެ މުއްދަތެއް ދެއްވުމަށް ދައުލަތުން އެދުނެވެ.

އެމީހުން ހާޒިރުކުރެވެން އޮތީ ޚާރިޖީ ވުޒާރައާ ގުޅިގެން، އިންޑިއާގެ އެމްބަސީއަށް ހާޒިރުކޮށްގެން ކަމަށާއި، ވެރިކަން ބަދަލުވުމާއެކު އިދާރީ ގޮތުން ކުރަންޖެހޭ ކަންކަން ޚާރިޖީ ވުޒާރާގައިވެސް ހުރުމާއި، ބައެއް މަޤާމުތައް ބަދަލުވަމުން ދިއުމާއެކު، އެކަމަށް ދުވަސްތަކެއް ނަގަނީކަމަށް ދައުލަތުގެ ވަކީލު ވިދާޅުވިއެވެ.

އެކަމާ ގުޅޭގޮތުން ލަމްހާގެ ވަކީލު ވަނީ، ދައުލަތަށް ހެކިން ހާޒިރު ނުކުރެވޭނަމަ، ލަމްހާ ބަންދުން ދޫކޮށްދިނުމަށް އެދިފައެވެ. އެގޮތުން ސަރުކާރެއް ބަދަލުވެފައިވާތީ ކަންކަން ލަސްވަނީކަމަށް ވިދާޅުވުމަކީ ތާކުންތާކުޖެހޭ ސަބަބެއް ނޫންކަމަށް ދިފާއީ ވަކީލު ވިދާޅުވިއެވެ.

އެއަށްފަހު ލަމްހާގެ ބަންދު މުރާޖައާއާއި ގުޅޭގޮތުން ވާހަކަ ދައްކާފައިވާއިރު، ލަމްހާގެ ބަންދު މުރާޖައާއާއި ގުޅޭގޮތުން ދެފަރާތުން ދެއްކެވި ވާހަކަތަކަށް ރިއާޔަތް ކުރައްވައި މައްސަލަ ބައްލަވާ ގާޒީ ވަނީ ޝަރުތުތަކާއެކު ލަމްހާ ބަންދުން ދޫކޮށްލެއްވުމަށް ނިންމަވާފައެވެ. އެއީ 180 ދުވަހުގެ މުއްދަތަކަށެވެ.

އޭގެ ތެރޭގައި މާލެއިން ބޭރަށް ދާކަމުގައިވާނަމަ ކޯޓަށް އެންގުމާއި، ކޯޓުން އަންގާ ވަގުތުތަކުގައި ހާޒިރުވުމާއި، ރޭގަނޑު 10:00ން ހެނދުނު 06:00ށް ބޭރުގައި އުޅުން މަނާ ކުރުން ހިމެނެއެވެ.

ލަމްހާގެ މައްޗަށް އެނގިހުރެ މީހަކު މެރުމުގައި ބައިވެރިވުމުގެ ކުށުގެ ދައުވާ އުފުލާފައިވާއިރު، އޭނާގެ މައްޗަށް ވަނީ, އެހެން މީހެއްގެ މުދަލެއްގެ މައްޗަށް ހުއްދަ ނޫން ގޮތެއްގައި ބާރު ހިންގުމުގެ ކުށުގެ ދަައުވާވެސް އުފުލާފައެވެ. އަދި ހުއްދަ ނަގައިގެން ކުރަންޖެހޭ ކަމެއް ހުއްދަ ނުނަގައި ކުރުމުގެ ދަައުވާވެސް އުފުލާފައިވާއިރު، ލަމްހާ ދިރިއުޅޭ ގެ ކްރިމިނަލް ކޯޓުގެ އަމުރެއްގެ ދަށުން ބަލައި ފާސްކުރިއިރު، ލަމްހާ ދިރިއުޅޭ ކޮޓަރި ތެރެއިން، ހޮސްޕިޓަލްތަކާއި ފަރުވާ ދޭ މަރުކަޒުތަކުގެ ބޭނުމަށް އެކަނި, ދޫކުރެވޭ ބާވަތުގެ ބޭސްތަކެއް ފެނިފައިވެއެވެ.