މޭރީގެ މަރު: އިތުރު ބައެއްގެ ހެކިބަސް ނަގައިފި

މޭރީ ގްރޭސްގެ މަރުގެ މައްސަލައިގައި، އޭނާގެ ފިރިމީހާ މާވިން އެސް.ވައި ވާރގަސްއާއި އޭނާގެ ލޯބިވެރިޔާ ހަލީމަތު ލަމްހާގެ މައްޗަށް ހިންގާ ޝަރީއަތުގައި އާދީއްތަ ދުވަހު އިތުރު ބައެއްގެ ހެކިބަސް ނަގައިފިއެވެ.

އާދީއްތަ ދުވަހު ކްރިމިނަލް ކޯޓުގައި ކުރިއަށްދިޔަ ޝަރީއަތުގައި އިތުރު 3 މީހެއްގެ ހެކިބަސް ވަނީ ނަގާފައެވެ. އެއީ ނަރުހަކާއި ދެ ފުލުހެއްގެ ހެކިބަހެވެ.

އައިޖީއެމްއެޗްގައި މަސައްކަތް ކުރަމުން ދިޔަ މެރީ ގްރޭސްގެ ފިިރިމީހާގެ މައްޗަށް އުފުލާފައިވާ އެނގިހުރެ މީހަކު މެރުމުގެ ކުށުގެ ދައުވާއާއި، މާވިން އާއި ލޯބީގެ ގޮތުން ގުޅިގެން އުޅުނު ދިވެހި ނަރުސް ހަލީމަތު ލަމްހާގެ މައްޗަށް އުފުލާފައިވާ އެހެން މީހެއް މުދަލެއްގެ މައްޗަށް ހުއްދަ ނޫން ގޮތެއްގައި ބާރު ހިންގުމާއި، ހުއްދަ ނަގައިގެން ކުރަންޖެހޭ ކަމެއް ހުއްދަ ނުނަގާ ކުރުމުގެ ކުށުގެ ދައުވާއެވެ.

މި މައްސަލާގައި އެންމެ ފަހުން މޭ 24 ވަނަ ދުވަހު ކުރިއަށް ދިޔަ އަޑުއެހުމުގައި 3 ހެތްކެއްގެ ހެކިބަސް ނަގާފައިވެއެވެ. ފުރަތަމަ ހާޒިރުކުރީ މޭރީ އައިޖީއެމްއެޗަށް ގެންދިއުމުން ފުރަތަމަ ހަށިގަނޑަށް އެޓެންޑުވި ޑޮކްޓަރުންގެ ތެރެއިން ޑޮކްޓަރެކެވެ. ހެކިވެރިޔާ ބުނީ، މޭރީ ގްރޭސްގެ ހަށިގަނޑު ގެނައިއިރުވެސް އެއްވެސް ހަރަކާތެއް ނެތްކަމަށާއި، މޫނު މައްޗަށް ހުރީ ދަނބުކުލަ އަރާފައި ކަމަށެވެ.

ދެވަނައަށްވެސް ހާޒިރުކުރީ މޭރީގެ ހަށިގަނޑަށް އެޓެންޑުވި ޑޮކްޓަރެކެވެ. އޭނާ ވަނީ މޭރީ ނޭވާލެއްވުމަށް ހޮޅި ލެއްވިކަމާއި، އިތުރަށް ދެވިފައިވާ ފަރުވާތައް ކިޔައިދީފައެވެ. އެގޮތުން މޭރީއަށް "ޝޮކް" ދެވިފައިވާކަމަށާއި، އެހެންނަމަވެސް "ސަކްސިނައިލްކޮލިން" ފަދަ އިންޖެކްޝަނެއް ޖަހާފައި ނުވާނެކަމަށް ހެކިވެރިޔާ ބުނެފައިވެއެވެ.

އޭގެ އިތުރުން، އީއާރްގައި ހުންނަ ބޭސްތަކުގެ ސްޓޮކް ބަލަހައްޓާ އިންޗާރޖް އަތުގައި ތަޅުދަނޑި އޮންނަކަމަށާއި، ހުއްދަ ނެތި ބޭސް ނެގުމަކީ މަނާކަމެއް ކަމަށްވެސް އެ ހެކިވެރިޔާ ހެކިބަސް ދެމުން ބުނެފައިވެއެވެ.

ލަމްހާގެ ގެ ބަލައިފާސްކުރިއިރު ފެނިފައިވާ 3 އިންޖެކްޝަންގެ ތެރޭގައި ސަކްސިނައިލްކޮލިން ހިމެނޭ އިންޖެކްޝަނެއް ހިމެނޭއިރު، އެ އިންޖެކްޝަންތަކަކީ މީހުން ހޭނައްތަން ބޭނުންކުރާ، އަދި މީހަކު މަރައިލެވިދާނެފަދަ އިންޖެކްޝަނެއްކަން ދައުލަތުން މީގެ ކުރިން ބުނެފައިވެއެވެ. އެގޮތުން މޭރީގެ ހަށިގަނޑުންވެސް އިންޖެކްޝަން ޖަހާފައިވާކަމުގެ ނިޝާން ފެންނަން ހުރިކަމަށް ދައުލަތުގެ ވަކީލު މީގެ ކުރިން ވިދާޅުވިއެވެ.

ތިންވަނައަށް ހާޒިރުކުރީ މި މައްސަލައިގެ ތަހުގީގު އޮފިސަރެކެވެ. އޭނާ ވަނީ މޭރީގެ މަރާ ގުޅޭގޮތުން މާވިން ކިޔާދީފައިވާ ވާހަކަތައް ޝަރީއަތުގައި ހިއްސާކޮށްފައެވެ. އެގޮތުން މޭރީ މަރުވީ އަމިއްލައަށް ދަން ޖެހިގެންކަމަށް މާވިންގެ ފަރާތުން މީގެ ކުރިންވެސް ބުނެފައިވާ ވާހަކަތައް ހެކިވެރިޔާ ވަނީ ކިޔައިދީފައެވެ.

ހެކިވެރިޔާ ބުނީ، މޭރީ މަރުވެފައި އޮތް ތަނުގައި ސިރިންޖެއް ކަނޑާލާފައި އޮތް ޕެކޭޖެއް އޮތްކަމަށާއި، އެއީ އެމްބިއުލާންސުން އައި ޕެރަމެޑިކުން ގެނައި އެއްޗެއްކަމަށް މާވިން ބުނެފައިވާ މިކަމަށެވެ.

މި މައްސަލާގައި އަދިވެސް އިތުރު ހެކިންގެ ހެކިބަސް ނެގުމަށް ހަމަޖެހިފައިވާއިރު، ޖޫން މަހުވެސް އަޑުއެހުންތައް ކުރިއަށް ގެންދަވާނެކަމަށް ގާޒީ ހުސައިން ފާއިޒު ރަޝާދު ވިދާޅުވިއެވެ.