ޕްރިމިއާ ލީގުގައި ސައުތުހެމްޓަނާ ދެކޮޅަށް ކުޅުނު މެޗުގައި އާލިން ހާލަންޑު ތިން ލަނޑު ނުޖެހުމުން އޭނާ ދެކެ ހިތްހަމަނުޖެހިފައި ހުރި ކަމަށް ބުނެ ޕެޕް ގާޑިއޯލާ "މަޒާޖީ" ގޮތަކަށް ވާހަކަ ދައްކައިފިއެވެ.

ސިޓީއަށް ބަދަލުވި ފަހުން ހާލަންޑު އަންނަނީ މޮޅު ކުޅުމެއް ދައްކަމުންނެވެ. ހާލަންޑުގެ މޮޅު ކަމުގެ ވާހަކަ މީގެ ކުރިން ވެސް ގާޑިއޯލާ އަންނަނީ ތަކުރާރުކޮށް ދައްކަމުންނެވެ.

ޕްރިމިއާ ލީގުގައި ސައުތުހެމްޓަން ބަލިކުރި ފުޓުބޯޅަ މެޗުގައި ވެސް ހާލަންޑު ވަނީ ލަނޑު ޖަހާފައެވެ. މެޗަށްފަހު ހާލަންޑާ ގުޅޭ ގޮތުން ހިނި އައިސްފައި ހުރެ ވާހަކަ ދައްކަމުން ގާޑިއޯލާ ބުނީ ހާލަންޑު ދެކެ ހިތްހަމަނުޖެހިފައި ހުރި ކަމަށެވެ. އެއީ އެ މެޗުގައ ވެސް އޭނާ ތިން ލަނޑު ނުޖެހުމުންނެވެ. ގާޑިއޯލާ މިފަދައިން ވާހަކަ ދައްކާފައިވަނީ ހާލަންޑު "ބޭން" ކުރުމަށް ގޮވާލައި ބަޔަކު ޕެޓިޝަނެއްގައި ސޮއިކުރަމުން ދާތީއެވެ. ގާޑިއޯލާ ބުނީ ހާލަންޑު ތިން ލަނޑު ނުޖެހުމުގެ ސަބަބުން، ޕްރިމިއާ ލީގުން އޭނާ ބޭރުކުރުމަށް ގޮވާލާ ޕެޓިޝަން ކުރިއަށް ނުދާނެ ކަމަށެވެ.

މީގެ އިތުރުން ގާޑިއޯލާ ބުނީ ހާލަންޑާ މެދު މީހުންގެ ހީކުރުންތައް ހުންނަނީ މާ މަތީގައި ކަމަށެވެ. އޭނާ ބުނީ މީހުންނަށް ހީވާ ގޮތުން ކޮންމެ މެޗެއްގައި ތިން ލަނޑު ނުވަތަ ހަތަރު ލަނޑު ޖަހާނެއެވެ. ނަމަވެސް އެ މެޗުގައި ހާލަންޑަށް ޖެހުނީ އެއް ލަނޑުކަން ފާހަގަކޮށް ގާޑިއޯލާ ބުނީ، މެޗުން ސިޓީ މޮޅުވުމަށް ހާލަންޑު ބޮޑު އެހީއެއްވެދިން ކަމަށެވެ. އޭނާ ބުނީ ހާލަންޑު އަންނަނީ މޮޅަށް ކުޅެމުން ކަމަށެވެ.

ގާޑިއޯލާގެ މިވާހަކަތައް ޓުވިޓާގައި ދައުރުވަމުން ދަނިކޮށް، ހާލަންޑު ވަނީ އެޔަށް "މަޒާޖީ" ކޮމެންޓެއް ވެސް ކޮށްފައެވެ.

މި ސީޒަންގައި ހާލަންޑު ވަނީ މިހާތަނަށް ސިޓީ އަށް ކުޅެދިން 13 މެޗުން 20 ލަނޑު ޖަހާފައެވެ. އޭގެ ތެރެއިން ޕްރިމިއާ ލީގުގައި ކުޅުނު ނުވަ މެޗުން އޭނާ ވަނީ 15 ލަނޑު ޖަހާފައެވެ. ޕްރިމިއާ ލީގުގެ ލަނޑު ލިސްޓުގެ ކުރީގައި އޮތީ ވެސް ހާލަންޑެވެ. ހާލަންޑު ވަނީ ޔުއެފާ ޗެމްޕިއަންސް ލީގުގައި ފަސް ލަނޑު ޖަހާފައެވެ. ޗެމްޕިއަންސް ލީގުގެ ލަނޑު ލިސްޓުގެ ކުރީގައި ވެސް އޮތީ އޭނާާއެވެ.

ސިޓީގައި ހާލަންޑު ދައްކަމުން އަންނަ ކުޅުމުގެ ސަބަބުން ގިނަ ބަޔަކު އަންނަނީ އޭނާ އަށް ތައުރީފު ވެސް ކުރަމުންނެވެ.