އެންމެ ދެކެން ބޭނުންވަނީ ވޯލްޑްކަޕް ތަށި ރާއްޖޭ ފަސްގަނޑުގައި ބެހެއްޓޭ ދުވަސް: ނިޒާމްބެ

އެންމެ ދެކެން ބޭނުންވަނީ ދިވެހި ގައުމީ ފުޓުބޯޅަ ޓީމު ވޯލްޑްކަޕްގައި ކުޅޭ ދުވަސް ކަމަށް ޓީސީގެ ކޯޗު މުހައްމަދު ނިޒާމް (ނިޒާމްބެ) ބުނެފި އެވެ.

ޝައިހް ކަމާލް އިންޓަނޭޝަނަލް ކްލަބް ކަޕްގައި ޓީސީ ހޯދި ކާމިޔާބީ ފާހަގަކުރުމަށް އެފްއޭއެމް ކުރިމަތީގައި ބޭއްވި ހަފްލާގައި ވާހަކަ ދައްކަމުން ނިޒާމްބެ ބުނީ އޭނާ އެންމެ ދެކެން ބޭނުންވާ ދުވަހަކީ ވޯލްޑްކަޕް ތަށި މި ދިވެހި ފަސްގަނޑުގައި ބެހެއްޓޭނެ ދުވަހަކަށް ކަމަށެވެ.

އެގޮތުން ނިޒާމްބެ ބުނީ މިއީ އެތައް ބަޔަކު ހައިރާންކޮށް ކޮސްވެދާނެ ފަދަ ވާހަކައަކަށް ވެދާނެ ކަމަށާއި، އެހެންނަވެސް ފީފާ އިން އިތުރުކުރި އަދަދާ އެކު ދިވެހި ރާއްޖެ ވޯލްޑްކަޕްގައި ކުޅޭ ދުވަހަކީ ވެސް އެންމެ ދެކެން ބޭނުންވާ އެއް ދުވަސް ކަމަށް ވެސް އޭނާ ވަނީ ބުނެފައެވެ.

ނިޒާމްބެ ބުނީ އެ ދުވަސް ގެނެވޭނެ ކަމަށާއި، އެކަން ކުރުމަށް ހިތްވަރު ބޭނުންވަނީ އެފްއޭއެމްގެ އިސްވެރިންގެ ފަރާތުން ކަމަށެވެ. އެގޮތުން އޭނާ ބުނީ އެފްއޭއެމްގެ ރައީސް ބައްސާމް އަދީލް ޖަލީލް އާއި އެބޭފުޅާގެ ޓީމަށް އެކަންތައް ފުރިހަމަކޮށްދެވޭނެކަމުގެ އުންމީދު އެބައޮތް ކަމަށެވެ.

އެފްއޭއެމްގެ އެކްސްކޯ އަށް ތައުރީފްކުރަމުން ނިޒާމްބެ ބުނީ ފުޓުބޯޅަ އިތުރު ހަރުފަތަކަށް ގެންދިޔުމަށް އެތަނުން ފެށި މަސައްކަތުގެ ފުރަތަމަ ފިޔަވަޅަކީ ރާއްޖޭގެ ތާރީހުގައި ފުރަތަމަ ފަހަރަށް ކްލަބް މުބާރާތަކުން ރަން މެޑަލް ގެނައުން ކަމަށާއި، އެހެންނަމަވެސް ނިޒާމްބެ ބުނީ އެ މެޑަލް ނުވަތަ ތަށި ހޯދުމަށްވުރެ ދިފާއުކުރުމަކީ އެންމެ އުނދަގޫ ކަން ކަމަށެވެ.

އެގޮތުން އޭނާ ބުނީ ސަރަހައްދީ ލެވެލްގައި ބޮޑު ތަށްޓެއް ދިވެހި ގައުމީ ޓީމުން ވެސް ހޯދި ކަމަށާއި، އެހެންނަމަވެސް އެ ތަށި ދިފާއުކުރުމުގެ ފޯމިއުލާއެއް ނެތް ކަމީ ހިތާމަކުރާ ކަމެއް ކަމަށެވެ. މީގެ އިތުރުން ނިޒާމްބެ ބުނީ އޭނާގެ އުންމީދަކީ ކްލަބް ލެވެލްގައި މިހޯދި ކާމިޔާބީ ގައުމީ ޓީމުން ވެސް ބައިނަލްއަގުވާމީ ލެވެލްގައި ވެސް ތަކުރާރުކުރުން ކަމަށެވެ.