ޓީއެމްއޭގެ ސީޕްލޭނެއް ފުރަން އުޅުމުގެ ތެރޭގައި ނުރައްކާތެރި ހާދިސާއެއް ހިނގައި ކެބިން ކުރޫއަކަށް ވަރަށް ބޮޑަށް އަނިޔާވެއްޖެ
11 ނޮވެމްބަރު 2026 | ބުދަ 10:44ޓީއެމްއޭގެ ސީޕްލޭނެއް ފުރަން އުޅުމުގެ ތެރޭގައި ހިނގި ނުރައްކާތެރި އެކްސިޑެންޓެއްގައި ދިވެހި ކެބިން ކުރޫއަކަށް ބޮޑެތި އަނިޔާތަކެއް ވެގެން ހޮސްޕިޓަލުގައި ފަރުވާދޭން ފަށައިފި. ބުދަ ދުވަހު ހިނގި މި ހާދިސާގައި ބޯޓުގެ ބުރަފަތި އެހެން ބޯޓެއްގައި ޖެހި ގެއްލުންތަކެއް ވެފައިވާއިރު، މި ހާދިސާ މެދުވެރިވީ ބޯޓުގެ ރިވަރސް ފަންކްޝަނަށް ދިމާވި މައްސަލައަކުން ކަމަށް ބެލެވޭ
ޓީއެމްއޭގެ ސީޕްލޭނެއް ފުރަން އުޅުމުގެ ތެރޭގައި ނުރައްކާތެރި ހާދިސާއެއް ހިނގާ ކެބިން ކުރޫއަށް ވަރަށް ބޮޑަށް އަނިޔާވެއްޖެ | ރާއްޖެ އެމްވީ
ޓްރާންސް މޯލްޑިވިއަން އެއާވޭސް (ޓީއެމްއޭ)ގެ ސީޕްލޭނެއް ފުރަން އުޅުމުގެ ތެރޭގައި ނުރައްކާތެރި ހާދިސާއެއް ހިނގައި ކެބިން ކުރޫއަކަށް ވަރަށް ބޮޑަށް އަނިޔާވެއްޖެ އެވެ.
ޓީއެމްއޭގެ ސީޕްލޭނެއް ފުރަން އުޅުމުގެ ތެރޭގައި ދިޔަވެ، އަޑިއަށްދާ ވީޑިއޯތަކެއް ވަނީ ސޯޝަލް މީޑިއާގައި އާންމުވެފަ އެވެ. އެގޮތުން އިތުބާރުހުރި މަސްދަރަކުން ރާއްޖެއެމްވީއަށް މައުލޫމާތު ލިބިފައިވާ ގޮތުގައި މި ހާދިސާ ހިނގާފައި ވަނީ ބުދަ ދުވަހު މެންދުރު 2:35 ހާއިރު އެވެ.
މި ސީޕްލޭންއަކީ ނޮކޯ މޯލްޑިވްސް އަދި ކުރެދިވަރަށް 12 ފަތުރުވެރިންނާއި 3 ކުރޫއިންނާއެކު ދަތުރުކުރަމުން ދިޔަ ސީޕްލޭނެއް ކަމަށް މައުލޫމާތު ލިބިފައިވެ އެވެ.
ރާއްޖެއެމްވީއަށް މައުލޫމާތު ލިބިފައިވާ ގޮތުގައި މި ހާދިސާގައި ސީޕްލޭންގެ ކެބިން ކުރޫއެއް ވަނީ ފްލޯޓާއި ބޯޓާއި ދޭތެރޭ ފިތި ބޮޑެތި އަނިޔާތަކެއްވެފަ އެވެ. އަދި މިހާރު އޭނާ ހޮސްޕިޓަލަށް ގެންގޮސްފައިވާ ކަމަށް ވެސް މައުލޫމާތު ލިބިފައިވެ އެވެ.
ހަމައެއާއެކު، މި ހާދިސާ ހިނގާފައި ވަނީ ބޯޓު ފުރަން އުޅުނު ގަޑީގައި ބުރަފަތި ގޮސް ކުރި މަތީ އޮތް ބޯޓުގައި ޖެހިގެންނެވެ. އަދި އެ ބޯޓަށް ވެސް ގެއްލުންތަކެއް ވެފައިވާ ކަމަށް މައުލޫމާތު ލިބިފައިވެ އެވެ.
މި ހާދިސާ ހިނގަން މެދުވެރިވި ސަބަބަކީ ރިވަރސް ފަންކްޝަނެއް ފެއިލްވެގެން ކަމަށް ލަފާކުރެވޭ ކަމަށް ރާއްޖެއެމްވީއަށް މައުލޫމާތު ލިބިފައިވެ އެވެ.
މީގެ އިތުރުން، އަނިޔާވި ކެބިން ކުރޫ ފުދޭވަރަކަށް ގިނަ ވަގުތު ތާށިވެފައި އޮތް ކަމަށާއި ހޮސްޕިޓަލަށް ގެންދިޔުމުގެ ކުރިން ސީޕީއާރު ދީފައިވާ ކަމަށް ވެސް މައުލޫމާތު ލިބިފައިވެ އެވެ. މި ހާދިސާގައި އަނިޔާވެފައި ވަނީ ދިވެހި ކެބިން ކުރޫއަކަށެވެ.
