ބޮޑާކަމާއި ކިބުރުވެރިކަމަކީ އަޅުގަނޑުގެ ގައިގަ ހުންނަ ސިފައެއް ނޫން: މިނިސްޓަރު މަޚްލޫފް

ޔޫތު މިނިސްޓަރު އަޙުމަދު މަޚްލޫފަށް ނިސްބަތްކޮށް ބައެއް މީޑިއާތަކުގައި ފަތުރަމުންދާ ވާހަކަތައް އެމަނިކުފާނު ދޮގުކުރައްވައިފިއެވެ.

އޮންލައިން ނޫހެއްކަމަށްވާ ދިޔަރެސްއާއި ތިލަދުންގައި ބުނެފައިވަނީ، ކައްދޫ އެއާޕޯޓުން މިނިސްޓަރު މަޚްލޫފް ޗެކްކުރި ސެކިޔުރިޓީ އޮފިސަރު މުއްދަތެއް ނެތްގޮތަށް ސަސްޕެންޑްކޮށްފައިވާ ކަމަށެވެ. މީގެ އިތުރުން ޗެކްވެވަޑައިގަތުމަށް މިނިސްޓަރު މަޚްލޫފަށް ސެކިޔުރިޓީ އޮފިސަރު ދެންނެވުމުން ކޯފާއިސްކުރައްވައި މިނިސްޓަރު އެ އޮފިސަރާ މުޚާތަބުކުރެއްވިކަމަށެވެ.

މިކަމާގުޅިގެން މިނިސްޓަރު މަޚްލޫފް ކުރެއްވި ޓުވީޓެއްގައި ވިދާޅުވެފައިވަނީ، ވަރަށް ގިނައިން ރާއްޖޭގެ އެކި ކަންކޮޅުތަކަށް ދަތުރުފުޅުކުރައްވާކަމަށެވެ. އަދި ގަވައިދުގެ ތެރެއިން ކޮންމެ ފަހަރަކުވެސް ސެކިޔުރިޓީ ޗެކްކުރާކަމަށާއި، ހޯމަ ދުވަހުގެ ރޭ ކޫއްޑޫއިންވެސް ޗެކްކޮށްފައިވާކަމަށެވެ. ހަމަ އެއާއެކު ކޮންމެ ދަތުރެއްގައިވެސް ޗެކްކުރާކަން ސެކިޔުރިޓީ އޮފިސަރުންނަށް ރަނގަޅަށް އެނގޭނެކަމަށްވެސް މަޚްލޫފް ވިދާޅުވިއެވެ. އަދި ދުވަހަކުވެސް ސެކިޔުރިޓީ އޮފިސަރަކާ އިހުތިރާމްކުޑަކޮށް މުއާމަލާތުކުރައްވާފައި ނުވާނެކަމަށް ވިދާޅުވިއެވެ.

މަޚްލޫފް ވިދާޅުވީ ނޫސްތަކުގައި ފަތުރަމުންދަނީ ދޮގު ވާހަކަތަކެއްކަމަށެވެ. އަދި ބޮޑާކަމާއި ކިބުރުވެރިކަމަކީ އެމަނިކުފާނުގެ ހުންނަ ސިފައެއް ނޫން ކަމަށާއި، އެމަނިކުފާނު ދަންނަ ކޮންމެ މީހަކަށްވެސް އެކަން އެނގޭނެކަމަށެވެ.