އަތޮޅުތެރޭގެ ބައެއް ރަށްތަކަށް ބޭނުންވާ ބިލިއާޑު ބޯޑު ހަވާލުކޮށްފިއެވެ.

އަންގާރަ ދުވަހު މޯލްޑިވްސް ޕޫލް ބިލިއާޑު އެސޯސިއޭޝްނުގައި އޮތް ރަސްމިއްޔާތެއްގައި ރަށްތަކަށް ބޯޑު ހަވާލުކޮށްދެއްވީ މިނިސްޓަރު އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަމަންޓް އަޙުމަދު މަޚްލޫފްއެވެ. ރަށްތަކުގެ ފަރާތުން ބިލިއާޑް ބޯޑާ ހަވާލުވީ ދާއިރާ މަޖިލިސް މެމްބަރުންނެވެ. މި ރަސްމިއްޔާތުގައި ވަނީ 28 ރަށަކަށް ބޭނުންވާ ބިލިއާޑު ބޯޑެވެ. މީގެ އިތުރުން ވަނީ ހުޅުމާލެ އަށް ބޭނުންވާ ބިލިއާޑު ބޯޑެއް ވެސް ހަވާލުކޮށްފައެވެ.

ބިލިއާޑު ބޯޑު ހަވާލުކުރި ރަށްތަކަކީ، ހއ.ކެލާ، މޮޅަދޫ، ފިއްލަދޫ، ދިއްދޫ، ތަކަންދޫ، ށ.ކޮމަންޑޫ (ދެ ބޯޑު)، ފޯކައިދޫ، މާއުނގޫދޫ، ނ.ކެނދިކުޅުދޫ، ރ.އުނގޫފާރު، ކ.މާފުށި، ހިންމަފުށި، އދ.ފެންފުށި، ދިއްދޫ، މ.މުލައް، ދިއްގަރު، ފ.މަގޫދޫ، ތ.ތިމަރަފުށި، މަޑިފުށި، ގަން، މާބައިދޫ، ގއ.ވިލިނގިލި، ކޮލަމާފުށި، ދާންދޫ، ގދ.ހޯނޑެއްދޫ، ތިނަދޫ، މަޑަވެލި އަދި ސ.ހިތަދޫއެވެ.

މި އިވެންޓަށްފަހު ރާއްޖެ އެމްވީ އަށް ދެއްވި އިންޓަވިޔުއެއްގައި މިނިސްޓަރު މަޚްލޫފް ވިދާޅުވީ، މިއީ ރާއްޖޭގެ ރަށްރަށުގައި މުނިފޫހި ފިލުވުމާއި، ކުޅިވަރު ކުޅުމަށްޓަކައި ފަހިކޮށްދެމުންދާ ފުރުސަތުގެ ތެރެއިން ކުރެވޭ ކަމެއް ކަމަށެވެ. މަޚްލޫފް ވިދާޅުވީ ރަށްތަކުގެ ލިސްޓު އެކުލަވާލީ ޒުވާނުންގެ މަރުކަޒު ހުރި ރަށްތަކާއި، ބިލިއާޑް ބޯޑަށް ރިކުއެސްޓު ލިބިފައިވާ ރަށްތަކަށް ބަލައިގެން ކަމަށެވެ. މީގެ އިތުރުން މަޚްލޫފް ވިދާޅުވީ އެހެނިހެން ރަށްރަށުގައި ވެސް ކުޅޭނެ ޖާގަ އޮތް ނަމަ، އެ ފުރުސަތުތައް ފަހިކޮށްދެމުން ގެންދަވާނެ ކަމަށެވެ.

މީގެ އިތުރުން މިނިސްޓަރު ވިދާޅުވީ މިކަމުގެ އިތުރުން ވެސް ބައެއް ރަށްރަށުގައި ޓޭބަލް ޓެނިސް (ޓީޓީ) ސެންޓަރުތަކާއި، ބެޑްމިންޓަން ކޯޓުތައް އެޅުން ކަހަލަ ކަންކަން ވެސް ކުރިއަށް ގެންދާ ކަމަށެވެ.

ޔޫތު މިނިސްޓްރީން އަންނަނީ ރަށްރަށަށް ބޭނުންވާ ކުޑަކުދިންގެ ޕާކު ސާމާނާއި، އައުޑް ޑޯ ޖިމްގެ ސާމާނު ވެސް ފޯރުކޮށްދެމުންނެވެ.