ރާއްޖޭގެ ފުޓުބޯޅަ އޮތް ޙާލަތާމެދު ކަންބޮޑުވޭ: މިނިސްޓަރު މަޚްލޫފް

ރާއްޖޭގެ ފުޓުބޯޅަ އޮތް ޙާލަތާމެދު ކަންބޮޑުވެވަޑައިގަންނަވާ ކަމަށް ޔޫތު މިނިސްޓަރު އަޙުމަދު މަޚްލޫފް ވިދާޅުވެއްޖެއެވެ.

މިނިސްޓަރު މަޚްލޫފް މިހެން ވިދާޅުވީ އަންގާރަ ދުވަހު އޮތް ރައްޔިތުންގެ މަޖިލީހުގެ ޖަލްސާގައި ހުޅުދޫ ދާއިރާގެ މެމްބަރު އިލްޔާސް ލަބީބު ކުރެއްވި ސުވާލަކަށް ޖަވާބު ދެއްވަމުންނެވެ. މެމްބަރު އިލްޔާސް ކުރެއްވި ސުވާލަކީ، ރާއްޖޭގެ ފުޓުބޯޅައިގަ ވަރަށް ބައިވަރު މައްސަލަ ހުރިކަމަށް ވާހަކަ ދެކެވޭ ކަމަށެވެ. އެގޮތުން ކުލަބުތަކުގެ ކުޅުންތެރިންނަށް މުސާރަ ނުދެވޭ ވާހަކައާއި ކުޅުންތެރިންނަށް މުސާރަ ނުދީގެން އެ މީހުން ބަނޑުހައި ހޫނުކަމުގެ ހަޅުތާލު ކުރާ ކަމަށެވެ. މީގެ އިތުރުން ވެސް ކޯޗުންނަށް މުސާރަ ނުދެވުމުގެ ސަބަބުން އެ އަދާ ކުރުމަށް ދައުލަތުގެ މައްޗަށް ޙުކުމްތައް އަންނަ ކަމަށެވެ. އެހެންކަމުން މި ކަންކަން ހައްލުކުރުމަށް މިނިސްޓަރު ކުރައްވާ ކަމަކީ ކޮބައިތޯއެވެ.

ޖަވާބުގައި މިނިސްޓަރު މަޚްލޫފް ވިދާޅުވީ ރާއްޖޭގެ ފުޓުބޯޅައިގެ ކަންކަން އޮތް ޙާލަތާމެދު ކަންބޮޑުވެވަޑައިގަންނަވާ ކަމަށެވެ. މަޚްލޫފް ވިދާޅުވީ ތެދަން ވިދާޅުވާނަމަ، ދެން ކަންތައް ވާ ގޮތް ބަލަން ހުންނެވި ކަމަށެވެ. އޭނާ ފާހަގަކުރެއްވި ގޮތުގައި އެފްއޭއެމްގެ ކަންކަން ރަނގަޅު ކުރުމަށް ނުކުންނެވި ނަމަވެސް، ކުލަބުތަކުން ވޯޓު ނުދޭ ކަމުގައި ވަނީ ނަމަ، ކުރެވޭނެ ކަމެއް ނެތް ކަމަށެވެ. މިނިސްޓަރު ވިދާޅުވީ އެފްއޭއެމްގެ ރައީސް ހޮވެނީ ކުލަބުތަކުގެ ވޯޓުން ކަމަށާއި، ކުލަބުތަކުން ބޭނުންވެއްޖެ ނަމަ ބަދަލުވެސް ކުރެވޭނެ ކަމަށެވެ.

މީގެ އިތުރުން މަޚްލޫފް ވިދާޅުވީ އިރާދަކުރެއްވިއްޔާ އަންނަ ހަފްތާގެ ތެރޭގައި އެފްއޭއެމާ ވަކިން، ވަރަށް ސީރިއަސްކޮށް މިކަމުގައި ވާހަކަ ދައްކަވާނެ ކަމަށެވެ. މަޚްލޫފް ވިދާޅުވީ ފުޓުބޯޅައިގަ އިންތިހާއަށް ކަންބޮޑުވާ ކަންކަން އެބަ ހުރި ކަމަށެވެ. އޭނާ ވިދާޅުވީ ފުޓުބޯޅަ ކުރިއެރުވުމަށް ބައިވަރު ވަސީލަތްތަކެއް ޤާއިމުކުރަމުން ދާއިރު ވެސް، އޭގެން ރަނގަޅު ނަތީޖާއެއް ނުނެރެވި، ބައިވަރު މައްސަލަ ނުކުންނަ މަންޒަރު ފެނިވަޑައިގަންނަވާ ކަމަށާއި، އެއީ ކަމުދާ ގޮތެއް ނޫން ކަމަށެވެ.

މީގެއިތުރުން މަޚްލޫފް ވިދާޅުވީ ރާއްޖެއިން ބޭރަށް ޤައުމީ ޓީމުތަކުން ދާން ޖެހޭނީ ރަނގަޅަށް ތައްޔާރުވެގެން ކަމަށެވެ. އެގޮތަށް ދާ މުބާރާތްތަކުން ރަނގަޅު ނަތީޖާއެއް ނުނެރެވޭ ނަމަ، އެ ދާ ޓީމަކަށް ޚަރަދު ކުރުމަށްވުރެ އެ ފައިސާ ކޮންމެވެސް ރަށަކަށް ޚަރަދުކުރުން ވެސް މާ ރަނގަޅުކަމަށް އޭނާ ވިދާޅުވިއެވެ. މަޚްލޫފް ވިދާޅުވީ އެފްއޭއެމަށް ސަރުކާރުގެ ފަރާތުން ވެސް އެއްބާރުލުން ދޭނީ، އެފްއޭއެމުން ވެސް ބުނާ ގޮތް ހަދާ ނަމަ ކަމަށެވެ.