އިންޑިއާގައި މިހާރު ކުރިއަށްދާ ސާފް ޗެމްޕިއަންޝިޕްގައި ދިވެހިރާއްޖެ އިން ކުޅޭ ފުރަތަަމަ މެޗުގައި ބޫޓާނާ ދެކޮޅަށް ނުކުންނަ މެޗުގެ ކުރިން ޔޫތު މިނިސްޓަރު އަޙުމަދު މަޚްލޫފް ޤައުމީ ޓީމަށް ހިތްވަރު ދެއްވައިފި އެވެ.
މުބާރާތުގައި ރާއްޖެ އިން ބޫޓާނާ ދެކޮޅަށް ނުކުންނާނީ ބުރާސްފަތި ދުވަހުގެ ރޭ ރާއްޖެ ގަޑިން 19:00 ގައެވެ. އެ މެޗުގެ ކުރިން ބުރާސްފަތި ދުވަހު މިނިސްޓަރު މަޚްލޫފް ވަނީ ޤައުމީ ޓީމަށް ފޯނުން ގުޅުއްވައި ހިތްވަރު ދެއްވައި، ކާމިޔާބަށް އެދި ވަޑައިގެންފަ އެވެ. މިނިސްޓަރު ވިދާޅުވީ ސާފް ޗެމްޕިއަންޝިޕްގެ ކުރިން ޖަޕާނުގައި ޤައުމީ ޓީމުން ކުރިއަށް ގެންދިޔަ ތަމްރީނު ކޭމްޕަށްފަހު، ޓީމު އޮތީ ރާއްޖެ އަށް ރީތި ނަމެއް ހޯދައި ދިނުމުގެ ޢަޒުމުގައި ކަމަށެވެ.
ބޫޓާން މެޗަށްފަހު މުބާރާތުގައި ރާއްޖޭގެ ދެ ވަނަ މެޗުގައި އަންނަ އާދީއްތަ ދުވަހު ނުކުންނާނީ ބަންގްލަދޭޝްއާ ދެކޮޅަށެވެ. އެއަށްފަހު ގްރޫޕް ސްޓޭޖުގެ ފަހު މެޗުގައި ނުކުންނާނީ ލެބަނަންނާ ދެކޮޅަަށް، އަންނަ ބުދަ ދުވަހު އެވެ. ޤައުމީ ޓީމުގެ މިހާރުގެ ކޯޗު ފްރެންޗެސްކޯ މޮރިއޭރޯ އަށް ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އިން ހަވާލުކޮށްފައިވާ ހަމައެކަނި ޓާސްކަކީ މިއަހަރުގެ ސާފް ޗެމްޕިއަންޝިޕް ކާމިޔާބު ކުރުމެވެ.
ރާއްޖެ އިން ވަނީ މިހާތަނަށް ދެ ފަހަރެއްގެ މަތިން މުބާރާތް ކާމިޔާބުކޮށްފަ އެވެ. އެއީ 2008 ވަނަ އަހަރާއި، 2018 ވަނަ އަހަރު އެވެ. އޭގެ ފަހުން 2021 ވަނަ އަހަރު ރާއްޖޭގައި ވަނީ ސާފް ޗެމްޕިއަންޝިޕް ހޯސްޓު ކޮށްފަ އެވެ. އެފަހަރުގެ މުބާރާތުން ރާއްޖެ ކެޓީ ސެމީ ފައިނަލްގައި އިންޑިއާ އަތުން ބަލިވެގެންނެވެ.
