އަޅުގަނޑަކީ ކެސިނޯ އަޅަން ތާއިދުކުރާ މީހެއް ނޫން، ވާހަކައިން އޮޅުން އަރާފައިވާތީ މަޢާފަށް އެދެން: މިނިސްޓަރު މަޚްލޫފް
މަޚްލޫފް ވިދާޅުވީ އަންގާރަ ދުވަހުގެ ޖަލްސާގައި ދެއްކެވި ވާހަކަފުޅުން އޮޅުން އަރާފައިވާތީ އެކަން ޔަގީންކޮށްދެއްވާ ކަމަށާއި، އަދި އެކަމަށް މަޢާފަށް ވެސް އެދިވަޑައިގަންނަވާ ކަމަށް
އަންގާރަ ދުވަހުގެ ރައްޔިތުންގެ މަޖިލީހުގެ ޖަލްސާގައި މިނިސްޓަރު މަޚްލޫފް
ކެސިނޯ އެޅުމަކީ އެއްވެސް އިރަކު ތާއިދު ކުރައްވާ ކަމެއް ނޫން ކަމަށާއި، އެކަމަށް ވާކާލާތު ނުކުރައްވާނެ ކަމަށް ޔޫތު މިނިސްޓަރު އަޙުމަދު މަޚްލޫފް ވިދާޅުވެއްޖެއެވެ.
މިނިސްޓަރު މިހެން ވިދާޅުވީ އަންގާރަ ދުވަހު އޮތް ރައްޔިތުންގެ މަޖިލީހުގެ ޖަލްސާގައި ކާށިދޫ ދާއިރާގެ މެމްބަރު ޢަބްދުﷲ ޖާބިރު ކުރެއްވި ސުވާލަކަށް ދެއްވި ޖަވާބު ބައެއް ފަރާތްތަކަށް އޮޅުން އަރާފައިވާތީކަމަށް ވިދާޅުވެއެވެ. އަންގާރަ ދުވަހުގެ ޖަލްސާގައި މެމްބަރު ޖާބިރު ކުރެއްވި ސުވާލަށް ޖަވާބު ދެއްވަމުން މިނިސްޓަރު ވިދާޅުވީ، އެއްވެސް ތަނެއްގައި ކެސިނޯއޭ ބުނެ އެ ވާހަކަ ފެށިޔަސް ގޯސްވާ ކަމަށެވެ. ނަމަވެސް ކުރީ ދުވަހުގެ ޖަލްސާއެއްގައި މެމްބަރު ޖާބިރު ވިދާޅުވި ފަދައިން ބަރާބަރަށް ރާ ވިއްކުމާއި އެހެނިހެން ކަންކަން ވެސް ކުރާ ކަމަށެވެ. ނަމަވެސް ކެސިނޯގެ ވާހަކަ ފަށާ ހިސާބުން ގޯސްވާ ކަމަށެވެ.
މަޚްލޫފް ވިދާޅުވީ އޭނާއަކީ ކެސިނޯގެ ޚިދުމަތަށް ހުއްދަ ދެއްވާ ފަރާތް ނޫން ކަމަށެވެ. މީގެ އިތުރުން މަޚްލޫފް ވިދާޅުވީ އޭނާ އަށް ޤަބޫލު ކުރެއްވޭ ގޮތުގައި މިގޮތަށް ހުރި ކަންކަމަކީ (ޔޯގާ އާއި ދެން ވެސް ހުރި ކަންކަން) މުޖުތަމައުގައި މަޝްވަރާކޮށްގެން ގޮތްތަކެއް ހޯދޭނެ ކަންކަން ކަމަށެވެ. އެވާހަކަތައް ދެކެވެން ޖެހޭ ކަމަށާއި، ރަނގަޅު ކަންކަމާއި ނުބައި ކަންކަން ވަކި ކުރެވޭނީ އޭރުން ކަމަށް މަޚްލޫފް ވިދާޅުވިއެވެ.
ބުދަ ދުވަހު މަޚްލޫފް ކުރެއްވި ޓުވީޓެއްގައި ވިދާޅުވީ، އޭނާ އަކީ ކެސިނޯ އަޅަން ތާއިދުކުރާ، އަދި އެކަމަށް ވަކާލާތު ކުރާ މީހެއް ނޫން ކަމަށެވެ. އަދި އެކަމަށް އެއްވެސް ޝައުޤުވެރިކަމެއް ވެސް ނެތް ކަމަށް މަޚްލޫފް ވިދާޅުވިއެވެ. މީގެ އިތުރުން އެކަމަކީ މަޚްލޫފްގެ މަސައްކަތާ ވެސް ގުޅުމެއް ނެތް ކަމެއް ކަމަށް އޭނާ ވިދާޅުވިއެވެ.
ޓުވީޓުގައި އިތުރަށް މަޚްލޫފް ވިދާޅުވީ އަންގާރަ ދުވަހުގެ ޖަލްސާގައި ދެއްކެވި ވާހަކަފުޅުން އޮޅުން އަރާފައިވާތީ އެކަން ޔަގީންކޮށްދެއްވާ ކަމަށާއި، އަދި އެކަމަށް މަޢާފަށް ވެސް އެދިވަޑައިގަންނަވާ ކަމަށެވެ.
